tgoop.com/doseofoptimismforbacalorea/6034
Last Update:
- مـشـكـلـة الـنـعـس والـإرهـاق عـنـد الدراسـة🥱😴
كتير منا وقت بكونوا بدهن يبلشوا دراسة بصيبهن تعب وإرهاق ونعس فظيع، وكل عادة بيتركوا الدراسة وبقولوا "بنام هلأ وبكرا بدرس"😅😁 طبعاً في عدة حلول ممتازة لهي المشكلة رح أقدملكن ياها بهالمنشور وإن شاء الله رح تخلصوا منها ..✨🤍
• كوب من القهوة☕️: القهوة متل ما منعرف عنها بتحتوي على الكافيين والكافيين يعد منبه للجهاز العصبي فلهيك القهوة رح تساعدكن تصحصحوا منيح ..💪✨
مع ذلك لازم ما نكتر من شرب القهوة لأنو رح تضر الجهاز العصبي على المدى الطويل ويفضل نستبدلها بمنبهات صحية متل: الشاي الأخضر.🍵
• حمام بارد🚿: طبيعي انو الماء البارد رح يفيقكن منيح فحاولوا تاخدوا دوش سريع بارد رح يفيقكن منيح كتير .. وممكن للسرعة بس تغسلوا وجهكن بماء بارد بدل الدوش ..🚿
• شرب ماء بارد🚰🧊: كمان انو تشربوا ماء بارد فعال للقضاء على النعس والخمول .. ممكن كمان تشربوا مشروب بارد بتحبوه مشان تكيفوا بهالحريق🙂🔥 رح يعمل مفعوله كمان .. بس لا تنسوا تشربوا الماء لأنو فوائدها للتركيز رهيبة وحطوا قنينة جنبكن وانتوا عم تدرسوا حتى ما تقطعوا تركيزكن كل شوي ..👍
• نظام نوم مناسب💤✨: طبعاً يمكن يكون العيب من نظام نومكن .. يمكن تكونوا ما عم تناموا مدة كافية فلذلك حاولوا انكن تحطوا نظام نوم بحيث تناموا فيه لساعات كافية لتجنب الخمول أثناء اليوم ..🛌
• بدء الدراسة بمادة محبوبة❤️📚: يمكن يكون المادة يلي بتبلشوا فيها الدراسة مملة بالنسبة الكن أو ما بتحبوها بالتالي بتنعسوا بسرعة .. حاولوا تبلشوا دراستكن بمادتكن المفضلة .. فمثلاً أنا كنت قبل كل دراستي أبلش بالرياضيات😍❤️ لأنو بحبها كتير وبتخليني أصحصح وأستمتع كتير ..👍😁
• قيلولة قصيرة😴✨: إذا حسيتوا حالكن فعلاً نعسانين كتير وما بتقدروا خدوا قيلولة قصيرة .. ركزوا على كلامي "قيلولة وليس غيبوبة"🌚✨ ساعة ساعتين أكتر شي وخلص كافي .. مع انو أنا من الناس يلي إذا ناموا قيلولة قصيرة بفيقوا نعسانين أكتر من قبل بس إذا بمشي حالكن بالقيلولة، قيلولة شو عليه ..☺️👍
• الرياضة🏋🏋♀: شوية حركة ما رح تضيع وقتكن .. اعملوا رياضة بسيطة لفترة قصيرة مشان تتنشطوا بس لا تطالعوا البهلواني يلي جواتكن🤓🌚 لأنو مو مسؤولة عن أي إصابات أنا ..👍👌
• الأكل🥖😋: بس تاكلوا رح تتنشطوا شوي وتحسوا حالكن فقتوا وصار عندكن طاقة .. بس الرياضة قبل الأكل مشان التذكير ..😅😁
وكمان لا تطالعوا الوحش الكاسر🌚👻 يلي جواتكن وتكسروا البراد وتفضوه .. أكل خفييييييف .🌚🌯
• هواء الصباح🌤✨: خاصةً وقت الفجر بكون الهواء كتير نقي وبساعد على انو الشخص يصحصح ..✨☀️
• استراحات قصيرة أثناء الدراسة📚: حاولوا تاخدوا استراحة كل فترة زمانية محددة لحتى تجددوا طاقتكن وما تملوا بالتالي تضلوا مصحصحين😁
• الفيتامينات💊: في احتمال يكون الإرهاق أثناء اليوم والتعب مشكلتو مشكلة فيتامينات متل B12 لذلك استشيروا طبيب عن الفيتامينات يلي لازمتكن وبتتعلق بهالموضوع ..
ولا تاخدوا أي حبة دون استشارة طبيب مختص ..🩺👩⚕👨⚕
بتمنى تكونوا استفدتوا منيح من هالنصائح استنونا بنصائح جديدة ومميزة قريباً ..❤️
#نصائح_دراسية📚✏️
#Elma⚡️
#بناة_المستقبل_نحو_الحلم🌤✨
@doseofoptimismforbacalorea⭐️
BY بُناة المستقبل😌💪نحو الحلم🔝
Share with your friend now:
tgoop.com/doseofoptimismforbacalorea/6034