tgoop.com/doseofoptimismforbacalorea/6159
Last Update:
يسعد أوقاتكن جميعاً💚
رح أحكي تجربتي بالبكالوريا💚و أذكر اخطاء وقعت فيها ..و نصائح مهمة.. ركزوا عليها🍃
كان عندي حلم عم يكبر كل يوم💚 و لما وصلت للبكالوريا...
بلشت الصيفية و سجلت معهد بس للرياضيات و الفيزيا
و كنت عم أدرس علوم و ديانة لحالي بالبيت... 🍃
"غلطي الأول" انو ما درست الوطنية و أنا كان عندي صعوبة فيها..و تابعت مع المعهد و انكسر خوفي بالمادتين و الوضع تمام و المعنويات عالية و يقين بتحقيق حلمي💚..
خلصت الصيفية و سجلت مدرسة كانوا الأساتذة كتير مناح و اكتفيت بهدول المادتين بالمعهد + مذاكرات لجميع المواد ... " غلطي التاني" أنو ما تابعت المذاكرات
و للصراحة كان الوقت كتير قليل ـ ست ساعات فاضية بالنهار كلو ـ فكنت ارجع تعبانة و أدرس من دون تركيز و لا شغف هاد " غلطي التالت" و بعدها انام 3 او 4 ساعات و أرجع ع الدوام ـ 12 ساعة باليوم ـ💔
بين مذاكرات و مدرسة و معهد و هاد كان " غلطي الرابع"...
و هيك بلش مستواي يتراجع و انهارت صحتي بالإضافة للمشاكل الصحية اللي كانت عندي من الأصل + المشاكل بالبيت اللي ما كانت تهدى..و صرت ألاقي انتقاد حاد و مقارنات و بهدلات من اهلي و اساتذتي بالمدرسة و المعهد سوا .. فتأثرت وتعبت نفسيتي و صرت أشرد كتير و فقدت شغفي و حسيت حالي انا خلص مالي قدها و انو ضاع حلمي💔 و هون كان " غلطي الخامس"... فكترت التراكمات و الأخطاء و صرت اتهرب من المذاكرات و إذا قدمت كنت ما اوثق بنفسي و كتير اخاف و اتوتر .. لدرجة انو الخوف سيطر علي تقريباً كل السنة..و هاد كان " غلطي السادس"..
بآخر السنة صحيت و عرفت كيف ادرس صح و كسرت كل الخوف و الحواجز ... ما عدت اتأثر بالمشاكل و لا المحبطين
بس للأسف كان الوقت تأخر كتير💔و بقيت ما اعطي المذاكرات حقها و ضل عندي توتر و أفكار سلبية لآخر السنة و حتى وقت الامتحان..مع انو خلصت المنهاج..
صحتي بقيت تعبانة وقت الامتحان و التوتر و قلة التركيز و قلة النوم لدرجة انو كنت فكر حالي حليت صح يطلع مليان أخطاء💔 هاد:" غلطي السابع".. بالإضافة لانو تحضيري للامتحان بهدول الايام بين المواد ما كان منيح هاد " غلطي التامن"...
و هيك و انتهى الامتحان و انصدمت بالنتيجة لما طلعت
و أهلي و أساتذتي و رفقاتي و الكللل.. انصدموا💔
نجحت الحمدلله بس المجموع كان كتير قليل و ما توقعت تنزل علاماتي كل هاد و ما قدرت اوصل لحلمي و لا حتى بالتكميلي💔 فقررت أخيراً أنو اعيد سنة البكالوريا و اقدمها 2022 .. صراحة عندي ثقة كبيرة انو رح اوصل لحلمي و زيادة بالذات أنو دارسة المنهاج و انو عندي 8 أخطاء قابلة للتصحيح💚و رضيانة باللي رح يخترلي اياه رب العالمين💚
# نصيحتي :
ـ تتمسكوا بحلمكن و الشغف لتحقيقو..
ـ تكونوا قويين ما تتأثروا بشي...
ـ تتجنبوا الاخطاء ال 8 اللي وقعت فيها ...
ـ تستفيدوا من تجارب غيركن و ما توقعوا بأغلاطهن ...
ـ انكن تطلبوا المساعدة و تعالجوا كل المشاكل من البداية...
ـ تحبوا الشي اللي عم تعملوه و تركزوا بكل شي...
ـ توثقوا برب العالمين و تشكولو كل همومكن....
ـ تحاربوا كل الأفكار السلبية...
ـ تنظموا اوقاتكن...
ـ تكونوا جديين بالمذاكرات و الدراسة..
ـ تستغلوا العطل و ايام الامتحان بالدراسة القوية و ترميم التقصير و مضاعفة الإنجاز...
ـ اهتموا بنومكن و صحتكن بشكل متوازن و تتحملوا فوق طاقتكن..
# أخيراً ...
أعتذر عن الإطالة💚
اتأكدوا انو كل شي بصير معكن هو خير ما منعرف خفاياه... و ارضوا باللي بيختاروا ربنا... ما رح يخيبنا...بتمنالكن كل التوفيق💚🍃
#تجربة_طالبة
#Amira
#من_رسائلكم 📨
#بناة_المستقبل_نحو_الحلم
@doseofoptimismforbacalorea
BY بُناة المستقبل😌💪نحو الحلم🔝
Share with your friend now:
tgoop.com/doseofoptimismforbacalorea/6159