اتعلّم تدور على معلّم شاطر تكون انت عنده صبي ملتزم
أوعدك هتبقى في يوم معلّم شاطر

#خواطر_قد_تصل

ساعاتك الطويلة بين الصفحات لها أجر
خطوطك اللي بترسمها في كتب مذاكرتك ليها أجر
دعواتك اللي بتكتبها في اعلى الصفحات ليها اجر
رسوماتك واشعارك وحتى خناقاتك اللي بتعبر عنها بشخابيط في الكتب ليها اجر
دموعك وخوفك وقلقك وقلة نومك وأرقك الدايم ليه اجر
بُعدك عن اهلك وعن مناسباتهم وقعداتهم ليه اجر
ربنا ضامن ليك الاجر بتوقيته هو بس
اللي ربنا يريده هيكون كده كده وكل لحظات قلقك في لحظة ربنا هيحولها أمان
#خواطر_قد_تصل

اختيارك في الجواز ممكن يصيب وممكن يخيب , أولا وأخيرا ده نصيب.
المهم انكم من الأول ما تتنازلوش عن حاجات أساسية:
احترام الأهل, احترام العقل, الكرم , التكافؤ , اختفاء الاحساس بالنِّدّية.
دي حاجات لو اختلت هتختلّ العلاقة وينهار الجواز قريب أو بعيد.
بالمناسبة العِشْرة ممكن تخلق حُب لكن العِشرة عمرها ما هتعمل كده لو مفيش احترام متبادَل
#خواطر_قد_تصل

خلّي حياتك بتدور بين التلات جمل دول ونظرتك للدنيا وللابتلاء هتتغيّر:
١- " قدر الله وما شاء فعل"
٢- "قل لن يصيبنا إلا ما كتب الله لنا"
٣- " وما أصابك لم يكن ليخطأك"
#خواطر_قد_تصل

مفيش حد يضمن حسن اختيار الزوج أو الزوجة
مفيش ضامن فعلًا لأنك ممكن تكون كويس وهيا كويسة والكيميا ما تمشيش.
مفيش حاجة اسمها انا اكتشفت انها وحشة ولا اكتشفتي انه وحش:
أولًا قبل الزواج، تقوى الله وعدم ( الصياعة ) ومحدش يزعل من الكلمة وهيا تنطبق على ولد وبنت ، الاختلاط يميت القلب ويذهب الحياء.

ثانيًا قبل الزواج تحري الاختيار الصحيح اللي مش لازم يكون ( نحنحة وسهوكة) ومحدش يزعل من الكلمة لأن مش كل حب كمل إلا بشروط أهمها العفّة ولا كل جواز صالونات وقف.

ثالثًا قبل الزواج الهدوء وعدم التعجل والسؤال والتدوير عن أولويات العريس والعروسة يعني مش معقول بتاع البنات انتي اللي هتروضيه ولا معقول السترونج انديبندانت هتقعد من الشغل عشانك.

رابعًا قبل الزواج لازم نتكلم ونفهم عايزين ايه من بعض: والله يا عم الحج انا عايزة اشتغل ، موافق، توكلنا على الله، مش موافق نفضها سيرة أو والله يا ست الناس انا راجل بحب اخرج مع اصحابي وابقى بحريتي موافقة تمام مش موافقة نفضها سيرة وبلاش شغل شعوذة وهغيرك وتغيريني لأن محدش بيغيّر حد وهتبقى مدعكة.

خامسًا قبل الزواج ايه اللي انتوا عايزينه من بعض ، عايزين اسرة وعيال متربيين ومشاركة ونساعد بعض ونتنازل سوا ولا لأ بلاش خلفة دلوقت ونأجل حبتين ونسافر ونتفسح وكده لأن في ناس بتحب كده وناس بتحب كده وهتبقى صدمة بعدين.

سادسًا ووالله ان الخطوبة مش جواز يعني الايد في الايد وعالكتف والاحضان وخلافه اسمه غلط وحرام ولا يجوز واللي بيبدأ صح بيختم صح.
البناء الصحيح بيساعد والتهاون في الأول بيبني بيت مكسور مفيش فيه أمل للوصول للتفاهم
#خواطر_قد_تصل

لازم تفتخر بكل خطوة مشيتها لوحدك
وكل نجاح وصلتله رغم الإحباط
وكل درجة أخدتها في دار غربة عن أهلك
وكل منصب جالك من غير واسطة
وكل وجع اتغلّبت لوحدك عليه
محدّش عاش اللي انت عشته لما قفلت وحدتك على نفسك وبكيت من التعب

#خواطر_قد_تصل

سبحان الله
الانسان يبقى ساخط على حاجة راحت منه وتعدي سنة واتنين وهو بيتحسّر عليها وفجأة يلاقي نفسه في مكان أحسن او طريق أحسن.
الانسان يبقى زعلان على فقدان حبيب او شريك او زواج وتعدي الأيام والشهور ويلاقي ان دا كان خير ويمكن كل الخير.
الانسان يبقى زعلان انه اتأخر في مواصلات ولا بسبب طريق مقفول ويعرف بعدها ان دا كان احلى حاجة لأنه هرب من قدر كان سابقه على الطريق.
الانسان ضعيف وضعفه هوا جهله بالغيب لكن ربنا عالم ومطّلع ولمّا بيكلّف بيعين ولمّا بيقدّم بيرضي ولما بيأخّر بيحمي وينجّي.
#خواطر_قد_تصل

بييجي في بالي ان الانسان دايمًا بيستعجل الخير ويخاف من الشر وينسى ان ربنا هوا اللي خلقه وعالم الخير فين وامتى وازاي ومع مين!!
ربنا عالم انك النهارده هتفرح لو جالك اللي انت عاوزه في الوقت بتاعك بس ربنا عالم لو جالك بكره هتفرح اكتر ولو جه بعد شهر هتطير من السعادة.
في حياتنا حاجات كتيرة اتأخرت واكيد لسه حاجات تانية هتتأخر بس من واقع التجربة ظهر لينا انها جت في (معادها بالظبط) اللي ربنا أراده وشايفه وشايفنا فيه.
الحمد لله على كل تأخير افتكرناه من وجهة نظرنا تأخير لكنه عند ربنا جه في الوقت المناسب.
#خواطر_قد_تصل

أمور كتير نمنا واحنا شايلين همها، صحينا لقيناها محلولة.
امتحانات خفنا منها ومجاش اسهل منها.
مواقف اتحطينا فيها ومكانش في ايدينا غير السكوت ولقينا الرد موجود وجاهز والناس بترد عنا اللي معرفناش نقوله.
احنا بنشيل اكتر من طاقتنا لأننا اتخلقنا في كَبَد زي ما ربنا قال عننا واتخلقنا زي ما ربنا قال مستعجلين الخير ومش قادرين نصبر عالشر.
الحقيقة الوحيدة ان ربنا بيراقبنا وان ربنا عالم بمشكلتنا وعالم بحلّها وعالم بمواقفنا منها وعالم اننا هنتعب في الحل لو اعتمدنا علي نفسنا وعالم اننا مش هنتعب ابدا لو اعتمدنا عليه.
ارمي همك على باب الله وصلّي من قلبك قبل ماتصلي بجسمك وادعيه واطلب منه قبول الدعاء وربنا بفضله وتقديره مش هيردك غير وأنت راضي عنه سبحانه ، وراضي عن نفسك وراضي عن النهاية اللي مواقفك اتحلت بيها.
#خواطر_قد_تصل

اوعى تكرم اللي مش بيكرمك
اوعى تضحك في وش اللي بيكشّر في وشك
اوعى تلين للي بيقسى عليك
أوعي قلبك يحنّ للي قلبه حجر
#خواطر_قد_تصل

الإنسان يُثاب على قول الخير وفعل الخير
والمشاركة على طريق الخير.
الإنسان يثابُ حتى على نيّة الخير

#خواطر_قد_تصل

مش من حق أي حد يقرّر لأي حد طريقه
اللي عايز يسافر يسافر واللي عايز يقعد يقعد واللي عايز يرجع من السفر يرجع
مفيش كتالوج يا جماعة ثابت عالكل.
في حد تعب من الغربة وحد متعود عليها وحد عنده أهله في مصر ما يقدرش يسيبهم وحد عايز يكبر اسمه في بلده.
كل واحد حر.
النصيحة الوحيدة الثابتة أنه لا مكان بلا تعب ولا عمل مرتاح ولا مدير مثالي ولا كل زملاء العمل أوفياء على طول الخط ولذلك هليك في نفسك وشوف قلبك فين.
قلبك مش عقلك .. لأن الانسان قبل ما يكون مكنة فلوس هو روح وقلب ونفسية محتاج سلام وهدوء وراحة.
قرّر لنفسك عشان ما تندمش
#خواطر_قد_تصل

ما تزعلش على خير تعمله ما يلاقيش شُكر
الخير كمان بيفلتر الناس حواليك
#خواطر_قد_تصل

يا جماعة مفيش حاجة اسمها أن تأتي متأخرًا أفضل من ألّا تأتي
الحب يفرض عليك تيجي في معادك
الاحترام يفرض عليك تيجي في معادك
لو جيت متأخّر ومعاك عذرك هقبله
لو جيت متأخّر بعد ما وصلت كل المحطات يبقى عذرك فين
عيش وانتم فاهم معنى التقدير
وانت فاهم معنى الاحترام المتبادل
وانت فاهم ان اللي قصادك يستاهل ياخد تقديره في وقته دون تأخير
ساعتها بس يبقى ليه معنى
#خواطر_قد_تصل

كل ما تحس ان الطريق مش طريقك افتكر ان ربنا حطّك هنا ولازم تصبر وتبذل المجهود لحد ما ربنا ينصرك أو ييسّر لك طريق تاني افضل.
المهم انك ما تبطّلش سعي
#خواطر_قد_تصل

الدنيا هتظهر ليك بصورة مش هترضيك في أوقات كتيرة:
واحد هيسبقك في دراسة عشان يستحق او حتى لا يستحق
وواحد هيسبقك في ترقية باستحقاق وبدون استحقاق
وواحد هيشتغل قبلك باستحقاق او بواسطة
خليك دائمًا فاهم إن رزقك المتأخر في وجهة نظرك جاي في وقته بالظبط.
#خواطر_قد_تصل

عارف لمّا تجيب آخرك وتزهق اوي من الطريق اِعرف ان اللحظة دي هي فعلا لحظة الاختبار الحقيقي لعزيمتك.
قول لنفسك أنا ما جيتش هنا بالساهل .. بلاش تقف..كمّل كام خطوة كمان لأن الطريق ممكن يكون قرّب يخلص وانت اللي قررت تقف وترجع في الوقت الغلط.
#خواطر_قد_تصل

بنشتغل عشان مأمورين
عشان مسؤولين
عشان عارفين دورنا
عشان كده فاهمين ان مفيش شغل من غير تعب ولا مشاكل

#خواطر_قد_تصل

كلّما ضاقت عليك الدنيا واختنقت أنفاسك تذكّر قوله تعالى
(فَمَا ظَنُّكُم بِرَبِّ الْعَالَمِينَ)
وكلما شعرت أنك وحدك وخذلك كل الناس تذكّر قوله تعالى على لسان موسى عندما شعر انه مطارد
(إِنَّ مَعِيَ رَبِّي سَيَهْدِينِ)
الله قادر في غمضة عين أن يغير حالك من حال الى حال
(فَانقَلَبُوا بِنِعْمَةٍ مِّنَ اللَّهِ وَفَضْلٍ لَّمْ يَمْسَسْهُمْ سُوءٌ)
فأحسِن الظن بالله يهديك، ويمكر لك، ويقلب حالك الى النعمة، ويحميك من المكر والسوء.
#خواطر_قد_تصل

اوعى بعد ما تعرف سوء نية واحد انك تعاشره او تديله فرصة تانية مهما حصل حتى لو مع غيرك
الغدّار لا يؤتمن
#خواطر_قد_تصل