عمرك جربت تدعي بأسماء الله الحسنى
طيب عمرك جربت تدعي بإسم الله (الواسع)
الله يا واسع ارزقني
الله يا واسع اهدني
الله يا واسع وفقني
الله يا واسع نجّني
الله يا واسع وسِّع عليَّ دنيا وآخرة
هو واسع السماوات والأرض، الله
#خواطر_قد_تصل

اوعى وانت صغير تتذلل عشان درجتك ولا لقمتك
واوعى وانت كبير تذل حد عشان درجته ولا لقمته
لا الدرجة في ايدك ولا اللقمة من جيبك
اللي خلقك وخلقه جعلكم أسباب بس لتنفيذ حكمته وقضاؤه

#خواطر_قد_تصل

الدنيا صعبة اوي يا جماعة
ولا يهوّنها شيء أد كلمة طيبة واستماع واهتمام
راعوا بعض
وما تكونوش حمل تقيل على الآخرين

#خواطر_قد_تصل

أنت في سباقٍ مع نفسك فقط حتى تصل إلى الرضا فإذا وصلتَ فُزت

#خواطر_قد_تصل

اللي عنده أخلاق كويسة يحارب عشان ينقلها لشخص واحد عالأقل.
انقل خلق حميد او عادة كويسة او ابتسامة طيبة او سلام او شيء حلو قرّب يختفي.
سيدنا محمد وصّانا ان حتى لو يوم القيامة جه علينا وفي ايد واحد مننا غرسة زرع يزرعها فورًا ما يتأخرش ودا من باب الخير.
اعتبر كل خير بتعمله زرعة بتغرسها في الأرض عشان يفضل اخلاق كويسة لحد النهاية.
الوقت بقى صعب واللي بيعمل خلق حميد دلوقت بيعمل خير كبير اوي.
#خواطر_قد_تصل

مسموح لينا نغلط
ومسموح لينا نقع
ومسموح لينا نتأخر
احنا بشر

#خواطر_قد_تصل

ما تنصحنيش وانت ما تعرفش أنا فين
وما تنصحنيش وانت ما عدّتش باللي أنا فيه
وما تنصحنيش وتنظّر عليّا
وما تنصحنيش إلا وأنت بتقدّم الاستماع قبل الكلام
وما تنصحنيش إلا لو هتحتوي اخطائي وما تفضحنيش عليها
#خواطر_قد_تصل

يا ريت نبطّل جملة : أنا لو كنت مكانك كنت عملت كذا وكذا
جملة فاشلة لأنك مكنتش مكاني

#خواطر_قد_تصل

ممكن حلمك يتغير بسبب درجة وممكن طريقك يتغير بسبب غلطة.
الحلم والطريق اشياء بنعيش معاها وقت طويل من عمرنا وبتبقى جزء منّا لدرجة انه مش بسهولة نتنازل او نتقبل التغيير.
ومع ذلك من نعم ربنا علينا ان مش كل حلم عشناه كان خير بالعكس يمكن كان في كوابيس في حياتنا كنا فاكرين في بداياتها انها قمة سعادتنا وفي آخرها قمة نجاحنا ولما عشناها لقيناها أسوأ كابوس.
بإهمال وتقصير أو تعب وواسطة او بقهر و ظلم ممكن المصير يتغير لكن يبقى السؤال الحقيقي هل دا فعلًا كان الخير.
من غير ما تحتار: المستقبل المناسب ليك هو اللي انت هتعيش فيه بمشيئة الله مش اللي هتعيشه في أحلامك و بس.
#خواطر_قد_تصل

اوعى تصبر على علاقتك باللي بيقول سرّك
اوعى تصبر على علاقتك مع اللي بتخاف من غضبه
اوعى تصبر على علاقتك مع سابك وقت عوزك
اوعى تصبر على علاقتك مع اللوّام
اوعى تصبر على علاقتك مع الفاجر في الخصومة
اوعى تصبر على علاقتك مع اللي بيتقلّب في مشاعره
اوعى تصبر حتى لو بقيت وحدك
الوحدة افضل من الأشكال دي

#خواطر_قد_تصل

غلطان لو افتكرت ان ربنا ممكن يجيبلك حقك في الدنيا بالسرعة اللي انت بتتمنّاها
غلطان لأنك مش هتبقى فاهم معنى ميقات ربنا للأحكام والقضاء بين الناس.
موقفين في حياتي لاتنين من البشر
حد من زمايل دفعتي غلطت فيّ بشكل واضح وقوي وبيّن على رؤوس الأشهاد وانا سكتّ وقلتلها تمام وبطلت جدال.
وحد من جيراني عمل نفس الحركة بنفس الطريقة وسكتّ ومشيت.
بلاش اقول ان الكل شاهد اني حد كويس ومش مؤذي ومش بحب غير الخير للغير لكن هقول المعظم او البعض شاهد بكده وعارف.
وفي الموقفين محدّش ردّ عني .. اللي رد ّ رد عندي بيني وبينه عشان يطيب خاطري (شيء حلو بس مش كافي) لأنك لو ما قلتش للغلطان انه غلطان يبقى فين شهادة الحق.
عالم ربنا وانا بحكي بقول كده عشان تبقى فاهم الاتنين عايشين عادي ويمكن مش حاسين ان في غلط منهم بل الاسوأ ممكن يكون عندهم حجة اني أنا الغلطان.
وممكن دنيتنا دي تنتهي من غير ما الحق يبان.. لكن هل ممكن ما يبانش عند ربنا!
خوفي اكون عملت نفس الشيء مع حد تاني وظنيت انه غلط واني أنا اللي صح احسن يكون هو كمان مستنيني يوم القيامة عشان يقولي: أين حقي؟
#خواطر_قد_تصل

لمّا تيجي تعمل خير اعمله وما تفكرش بعده في استحقاق اللي قدامك
دا مدخل للشيطان يضيع اجرك بالندم

#خواطر_قد_تصل

الأب والأم هم اكتر ناس يتعبوا عشانك وفي هدوء ومن غير طلبات ومن غير مقابل ومن غير انتظار لأي رد غير نجاحك وتفوقك وراحتك.
بلاش تخبّي عليهم
بلاش تكذب عليهم
بلاش تتنمّر عليهم
بلاش تخذلهم
بلاش تنسى ان رضاهم عليك جزء من بركة حياتك كلها لو مكانش كل بركة حياتك
انت مديون ليهم أوي وكده كده مش هتعرف ترد الدين فبلاش تزوّده بالنكران
#خواطر_قد_تصل

الخوف من الخطوة الجايّة هو السبب انك لسّه ورا الكواليس.
اللي اتجرّأ وصل أو عالأقل اِتعلّم

#خواطر_قد_تصل

أنا زعلت كتير على امتحانات عدّت عليّ او بالأصح عدّت من فوقي زي القطر.
امتحانات أنا كنت ذاكرت ليها وسهرت وتعبت وعييت كمان.
دايمًا وانا خارج من الامتحان كنت بشوف الدنيا سودا ومجهودي راح وتعبي ضاع ونفسيتي كانت بتبقى زي الزفت.
المشكلة ان كان في امتحانات تانية اسهل بتبقى بعدها وبغلط فيها غلطات تافهة لأني كنت لسه مشغول بالامتحان اللي فات.
النتيجة كانت في اغلب الأحوال بتبقى حلوة في المادة اللي كنت زعلان منها ووحشة في المادة السهلة.
عمري ما فهمت ليه بيحصل كده غير لما كبرت واخدت اللي ربنا كتبه مش اللي أنا كنت رسمته لنفسي بالمسطرة.
عرفت اني لولا الغلطة الفلانية مكنتش وصلت لحلم من أحلامي او مكان بقيت فيه دون حول مني ولا قوة .
وعرفت ان الغلطة اللي زعلت عليها زمان يمكن هي اللي غيرت المسار لحاجة تانية احسن.
زعلي دلوقت لما بشوف حد بيعمل نفس الشيء وبيحزن وبيكتئب.
انت مش فاهم يبني.. بكرة تفهم .. هتفهم ان الخير بتاعك متظبط بالمقاس عليك .. بالسنتيمتر والله من غير غلطات حاشا لله.
اتعب.. اجتهد.. عادي تغلط.. بس اوعى تقف عند الغلطة فتضيع نفسك وتضيع نفسيتك.
#خواطر_قد_تصل

خليك طيب احسن وبلاش نوايا وحشة
نام مرتاح مجرحتش حد ولا عوّرت نفسيته
تعال على مخدتك بالليل وافتكر الخير اللي عملته
بلاش تكون كابوس لأي حد
#خواطر_قد_تصل

أخد الحق صنعة
عرض القضية صنعة
ما تبقاش عبيط وتخسر حقك وقضيتك

#خواطر_قد_تصل

ازيّكم
اللي يطلب منك حاجة تقدر تعملها : اعملها
بس بقولك ايه: اعملها بإتقان وحرفنة
جمِّل شغلك بالصبر
اعمل الشغل في أجمل صورة
ربّك بيحبّ اللي بيعمل حاجة يعملها بإتقان
وربّك كريم بيكافيء المحسن أضعاف إحسانه
#خواطر_قد_تصل

أصل قلة التقدير مش هتنتهي فاِفهم وبطّل صياح عالفاضي.
شايف الموازين مقلوبة بطّل تصيح واشتغل انت وذاكر واتعلم او اعمل اللي بتعرفه وأعدل ميزانك عالاقل ولو مش شايف فايدة من وجودك في مكان اجتهد تسيب المكان وتغيّره.. تسافر بقى .. تتغرب.. تهاجر.. ترجع.. ما ترجعش .. دي يبني قصتك انت لوحدك.
انقذ نفسك لو عايز إنما تقعد تصوت وتقول محدش بيقدّر محدش بيقدّر هتلاقي نفسك في نفس مكانك.
ما تقارنش نفسك ببلوجر بتتفسح سحت وشحاتة ولا فود بلوجر بياكل ببلاش ولا تراڤيل بلوجر مقضيها فنادق خوفًا من أنه يفضح الفنادق دي ويقلل الريڤيو بتاعها.. ولا الرقاصة ولا الممثلة ولا اللاعب ولا اي حاجة من اللي انت شايفها ما تستحقش.
تقعد بقى تنظّر على دا وعلى دي من غير شغل ولا فايدة يبقى بتضيع وقت.
بُص لحاجتين: مكانك في الدنيا ومكانك في الآخرة واشتغل للاتنين
#خواطر_قد_تصل

عشان توصل للي انت بتحبّه لازم تدوق اللي مش بتحبه ولا بتستحمله
الدنيا كده

#خواطر_قد_تصل