الانسان بيحب الشخص السوي
اللي تسأله عن حاجة يديك نصيحة بدون مقابل
ما يحبش يلف ويدور
ناس بتسميه طيب وناس بتسميه أهبل
لكن رب الناس حفظ له ثوابه لما قال (هل جزاء الإحسان إلّا الإحسان)
وسيدنا محمد قال عنه (من فرّج عن أخيه المؤمن كربة من كرب الدنيا فرج الله عنه كربة من كرب يوم القيامة)

#خواطر_قد_تصل

لمّا بتشقّ طريقك في اتجاه محدش مشي فيه من اهلك او أصحابك قبل كده محدش يقدر يحكم ابدًا على تعبك وكفاحك ..
انت حرفيًا بتنحت في الصخر عشان توصل وعشان تقف على رجليك صح.
لمّا بتقع الكل بيلومك ولما بتوصل قليل اللي بيفرح بيك.
لمّا بنقفل على نفسك اوضتك عشان ترتب خطواتك وتذاكر او تشتغل محدش بيبقى فاهم انت بتعمل ايه وطوّلت ليه وإزاي مفيش انجاز ملموس.
اللي معاه حد يساعده ويشاور ليه فين الصح وفين الغلط لا يستوي مع اللي نحت بضوافره لحد ما وشّه اتعفّر من التراب عشان يوصل.

د/ حازم محمد عبدالتواب

الإنسان لازم ياخد قرار مهما كان
أحسن ما يفضل واقف خايف

#خواطر_قد_تصل

يبني ويا بنتي محدش منكم بيسابق حد
كل واحد فيكم هيوصل لمكانه في الوقت بتاعه هو بس
ما ينفعش تقارن بينك وبين غيرك وظروفكم مختلفة وطموحاتكم مختلفة وتحدياتكم مختلفة.
في ناس بتحارب طول عمرها وتفضل مكانها وناس مولودة فوق السحاب وبعدين تقع وناس ماشية براحتها عالآخر وتنجح وناس مستعجلة وتفشل.
عيش حياتك اللي تناسبك انت وعيش ظروفك انت وتحدياتك انت وافهم ان محدش هيصعب عليه حالك ولا هينشغل بيك إلّا انت بس.

#خواطر_قد_تصل

اوعى تنبهر بحد إلا بعد تجربة
اوعى تتشدّ لشخص إلا بعد عِشرة
اوعى تتسند على حد إلا إذا وقف معاك في ضيقة
اوعى تتكلم مع حد إلا إذا كان عنده استعداد يسمع
التجربة يا جماعة مهمة فبلاش ثقافة ال first impression
لأنها بتخدع والحقيقة انها بتكسر

#خواطر_قد_تصل

ارمي حمولك كلها مهما تقلت على (لا حول ولا قوة إلا بالله)
بتعمل معجزات

#خواطر_قد_تصل

لعلَّ الله حرمك فحماك
ولعلّه أعطاك فمدّ لك مدّة الاختبار
احذر من عطاء الله إذا كان قلبك خربًا
وافرح بمنع الله إذا كان قلبك بالله موقنًا

#خواطر_قد_تصل

قد يأتيك ما كنت تريده عمرًا بعد أن فقدتَ الرغبةَ فيه

#خواطر_قد_تصل

نفوّت لبعض يا جماعة الأخطاء الساذجة
نفوّت الهفوات
نفوّت الحاجات غير المقصودة
نفوّت عشان نرتاح
نلتمس الأعذار في الأخطاء القليلة
ويغنينا عنها الرصيد الكبير من الخير

#خواطر_قد_تصل

ديونك لأهلك لن تُرد.
هم وحدهم من رأوك تسهر وتتساقط على كتبك.
هم وحدهم من كانوا يدعون الدعوة من القلب الى قلب السماء.
هم وحدهم من قاموا يفتحون الباب عليك خلسةً ليروا هل ما زلت مستيقظًا تحارب او نمت على كتابك رغمًا عنك.
هم وحدهم من بذلوا الغالي والرخيص كي يوفروا لك بيئةً صالحة.
هم وحدهم من زرعوا فيك آمالهم واحلامهم وطموحاتهم بل وزرعوا فيك افراحهم ونأوا بك عن احزانهم.
هم وحدهم من لن تستطيع رد ديونهم.
هم وحدهم من اذا مرّوا بخاطرك في أي وقتٍ فقل أهلي بالدنيا وما فيها.
#خواطر_قد_تصل

في ناس فنّانين في الضغط على أعصابك:
انت ما عملتش كده ليه؟
انت الحتّة دي باظت منك!
انت شغلك معقول بس وقتك وحش
انت عارف لولا كذا كان زمانك في حتّة تانية
اللهم هوّا مش هيرضى مش هيرضى، ودا نوعية الشخص اللي ترميه في أقرب صفيحة زبالة وانت ماشي

#خواطر_قد_تصل

في الحكايات الحقيقية الضربة تأتيك في الظهر ، من حيث أعطيتَ الأمان

#خواطر_قد_تصل

يمكن انت مش فاهم ليه مجهودك مالوش مقابل!
يمكن انت مستني الجزاء على مقدار العمل!
او يمكن بتتمنى رد ربنا الفوري لطلباتك!
عمومًا هي مش لازم تبقى كده ولا لازم الجزاء الفوري ولا لازم الجزاء اللي انت متوقعه ولا لازم الجزاء من جنس أحلامك.
الجزاء بتقدير ربنا بالمقدار والكيفية والتوقيت والمكان اللي هو بس شايفه.
وعشان كده بقولك مفيش حاجة بتضيع طالما انت استودعتها لملك الملوك.
يعني باختصار قل: يا رب استودعتك نفسي واستودعتك تعبي واستودعتك علمي واستودعتك مستقبلي.
قل يا رب استودعتك فرحتي فعجِّل بها ولا تحرمني منها وإن أخّرتها فاجعلها أعظم وأجمل وأطيب ريحًا وأثرًا
#خواطر_قد_تصل

كل اللي انت فيه من خير نعمة من ربك بس انت بتبصّ لغيرك ومشغول بيه

#خواطر_قد_تصل

انت مش شاطر
بس ربنا اللي كريم
أي شطارة بدون توفيق الله = صفر

#خواطر_قد_تصل

مفيش حاجة ممكن تخليك تنهي حياتك بسبب مذاكرة او امتحانات او ضغط دراسي.
مفيش حاجة اصلًا تستاهل انك تضيع صحتك مش حياتك.
دوّر عاللي يساعدك أرجوك.. صحتك أهم من اي حاجة.
#خواطر_قد_تصل

عايز اي طالب وطالبة ينتبهوا للكام سطر الجايين:
سهّل على نفسك يبني ويا بنتي
سهّلوا الأمور لأن الدنيا مش هتقف على درجتك في الامتحان ولا زنقتك في المذاكرة
ولا هتقف على الأستاذ اللي ضايقك ولا الأستاذ اللي شجعك
ولا هتقف على اهلك اللي دخلوك كلية لا تليق بك ولم تكن من أحلامك
الدراسة بقت مضغوطة اوي اكتر من زمان وبقت بلا رحمة وفيها تنافس عقيم وفيها غش وفيها واسطة وفيها سمّاعات وفيها قلة أدب من مراقبين في بعض اللجان وقلة تربية من أهالي متربتش في بعض الأحيان
انت لو وقفت لحظة وشفت اللي أنا شايفه دلوقت بعد العمر دا هتفهم ان الناس هتتساوى بشكل او بآخر ، بطريقة او التانية ربنا هيردّ عنّك.
انت لو شفت كام واحد اعرفهم كانوا اقل مني دراسيًا وبقوا احسن مني عمليًا ولو شفت كام واحد انا كنت اقل منهم دراسيًا بقيت احسن منهم عمليًا هتفهم ان الدنيا مش هتقف على كام درجة طالما عملت اللي عليك.
ايوة اعمل اللي عليك ومهما قالولك انه مش كافي انت الوحيد اللي ادرى بمجهودك وطاقتك ولو حسيت المكان مش مكانك قول دا مش مكاني ولو حسيت ان القرار مش في ايديك استعين باللي يساعدك ولو حسيت ان قلبك مكسور دوّر على سعادتك وانبش في الصخور لحد ما تفرح.
اوعى تبادر ربنا بحياتك.. ربنا كريم .. ربنا بيحبك .. خليك دايمًا قريب منه.. لو حسيت انك حزين او مكتئب او يائس اجري دوّر على حد يساعدك وإجري ادعي ربنا ييسر لك أمرك.
مفيش حاجة تستاهل تدوس على صحتك ولا تنهي حياتك.. مفيش حاجة

#خواطر_قد_تصل

(إِن يَعْلَمِ اللَّهُ فِي قُلُوبِكُمْ خَيْرًا يُؤْتِكُمْ خَيْرًا مِّمَّا أُخِذَ مِنكُمْ)
اجعل بينك وبين الله خفيّةً كلها خير
يعوضك الله عن كل ما ضاع منك
واعلم أن ما ضاع منك لم يكن لك
واعلم ان ما ضاع منك لم يكن خيرًا لك
#خواطر_قد_تصل

بص بقى
لو حد أخد حقك اوعى تسيبه
اخد الحق صنعة
ما تستعجلش
اهدى اوي وركّز ودوّر وراه هتلقى بدال الغلطة عشرة
اجمعهم.. حطهم في كيس.. ارميهم في وشه بنفس البجاحة اللي اخد بيها حقك
بس بقولك ايه : في الوقت المناسب
خليه حاسس انك نسيت.. لكن انت عمرك ما تنسى
خليك مش بتاع الصلح خير قوم نتصالح
تعال نتصالح بعد ما آخد حقي يا حبّي

#خواطر_قد_تصل

ما تنبهرش بحد أبدًا
ادّي نفسك فرصة تختبره

#خواطر_قد_تصل