إيمانك ان ربنا هيعوضك هو سبيلك الوحيد للخروج من أزمتك

#خواطر_قد_تصل

كأستاذ في كلية الطب أكره أن ابارك للأوائل وانسى باقي المباركات.. إمّا ان ابارك للكل او لا أبارك للكل.
التفرقة تخلق الفتنة والفتنة تورث الكره والحقد.
أنت كمدرس لطلابك إياك أن تحتفي بالمتفوقين على رؤوس الأشهاد وتتنصل من باقي طلابك.
هم بأي حال صنيعة عملك أنت ومنهم من تميّز ومنهم من لم ينل التوفيق.
إن أردتَ ان تحتفل بالمتفوقين فبينك وبينهم ولا تجرح الباقين واترك في قلوب الكل ذكرى تحترمك وتحبك أفضل من ذكرى تأتي في الخاطر فيقول صاحبها (عيب كان بتاع متفوقين بس).
#خواطر_قد_تصل

وتقعد تحسب فيها وتتعب في حساباتها وهي مكتوبة ومقدّرة أصلًا

#خواطر_قد_تصل

الناس هتعتبرك شرّير عشان بتردّ على الغلط في حقك
الناس هتعتبرك شرير اما بيتصدموا ان عندك ردّ على غلطهم
الناس هتعتبرك شرير لو علّيت صوتك وحاربت عشان حقك
ما يهمّكش
انت طيب وهم الأشرار طالما دا حقك

#خواطر_قد_تصل

كل الناس في بداية العلاقات بيظهروا أجمل ما فيهم
أقولك عالأجمل: انك تظهر أجمل ما عندك في نهايات العلاقات مش بس في بداياتها.
التغاضي
تذكّر العِشرة
الاحترام
بلاش الفجور في الخصومات

#خواطر_قد_تصل

الإنسان مش مُلزَم أبدًا يعرّفك العقبات اللي في حياته عشان تعامله كويس
أصلًا مش مهم

#خواطر_قد_تصل

يا ريت نفهم ان مشوار الطب طويل
وقسمًا بالله مش كل اللي بيبدأ في طب بيبقى سعيد وناجح ومبسوط.
يا جماعة بالله عليكم الطب مش عشان ترفع راسك وسط اهلك وناسك وتقول ابني دخل طب لأنه ممكن يدخل ويقع.
الطب مش بالسهولة دي ولا بتنسيق مقاييسه بقت مختلفة بين المصري والوافد والشهادة العربي والأجنبي.
الطّب طريق ومشوار طويل أوي وعايز اللي عايزه بجد ويقدر يستحمله.
لو تعرفوا عدد الولاد والبنات اللي بيزوروا أطباء النفسية بعد اصطدامهم بزحمة الكتب وضيق الوقت ويا سلام لو معاهم غربتهم عن الأهل هتتصدموا كلكم.
الطب رسالة جميلة وعِلم شريف وطريق خير لكن مش كل حد جاب مجموع عالي يدخل طب وخلاص.

#خواطر_قد_تصل

ربنا كريم أوي
مش هيسيبك طول ما قلبك مخلص ومتيقن انه هيستجيب
تأخير الاستجابة ممكن يكون سببه ان الدعاء مش من القلب

#خواطر_قد_تصل

الحياة اللي مفيهاش اختبارات تبقى جنّة
احنا لسّه عالأرض

#خواطر_قد_تصل

ما تشتكيش للناس لأنّك هتبان ضعيف وغالبًا مش هتلاقي حل و هتدّي فرصة للشمّاتين.
ارمي حمولك على باب الله

#خواطر_قد_تصل

ما تتعبش في الحسابات ، ربنا كريم

#خواطر_قد_تصل

اللي يكسر خاطرك وقت احتياجك
اللي يعرف نقطة ضعفك ويستغلها
اللي يبيعك للغريب
ملهمش مكان في حياتك حتى لو باسوا إيدك تسامحهم
دي صفات المنافق والمنافق مالوش أمان أبدًا

#خواطر_قد_تصل

ملناش دعوة بالناس
ملناش دعوة بالناس
ملناش دعوة بالناس

#خواطر_قد_تصل

في ناس حوالينا
يمكن كل واحد فينا اتعامل معاهم مرة واحدة عالأقل
شخص اغلب الناس شايفاه كويس
وهو (مزنبقك وقلبه سواد من جوا)
هوّا بوشّين .. فعلًا
ومش هيتغيّر.. ما يقدرش ما يعرفش
دا طبعه
عرفته؟ علّم عليه بقى وإبعد عنه قدر المستطاع

#خواطر_قد_تصل

رأيي الشخصي في مسألة كلية الطب
١- ألف مبروك لكل اللي دخل بمجهوده وعمله ولا مبروك للي دخلها بالغش
٢- كل ما كانت الكلية قريبة لبيتك كل ما كانت افضل لأنك محتاج وقت تذاكر وما تبقاش مُنهك جسديًا
٣- الولاد ممكن عادي يتغربوا في محافظة تانية . البنات لا يُفضّل إلا لو معاهم حد من اهلهم
٤- كل ما كانت الكلية مركزية يعني قصر العيني عين شمس الأزهر المنصورة الإسكندرية كل ما الترتيب العالمي بتاعها كان افضل ، مع مراعاة نقطة رقم ٢
٥- الكليات الأهلية لسه ما خرجتش دفعات لكن اعتمادها الدولي مسألة وقت اول الدفعات ما تتخرج ويتسجّل منها ماستر ودكتوراة
٦- كل اللي كان طموحه بشري وما لحقهوش على كام درجة وعنده قدرة مادية لا تنهك الأهل يتفضل أهلية وخاصة
٧- الطب مش للمنظرة، والله مشوار الطب طويل ولا يصلح للطالب المتخاذل ولا الطالب الدلّوع ولا الطالب ذو النفس القصير في المذاكرة
٨- اللي فاته الطب ما ياخدش تمريض (رأيي الشخصي) لأنه هيحتك بالأطباء وهيفتكر حلمه وأمله وليس كل الأطباء سويّ النفس ليعامله بنفس الطريقة
٩- العلاج الطبيعي والطب البيطري من الحاجات اللي قريبة جدًا من الطب البشري في الأسلوب والتعامل مع المرض
١٠- التمريض ما زال مطلوبًا بشدة للسفر للخارج ودي نقطة قوة بشرط ميكونش عندك مشكلة نفسية واجتماعية في تعامل اغلب الشعب للأسف مع التمريض
#خواطر_قد_تصل
د حازم محمد عبد التواب
استاذ واستشاري الانف والاذن والحنجرة قصر العيني

مش هتقدر ترضي كل الناس حتى لو حاولت
عشان كده متحاولش

#خواطر_قد_تصل

موت الفجأة كتر جدًا الفترة دي ، إرهاق، ضغط عصبي، حوادث….ومن غير سن معين
اللي بيموت ولسه هيموت عالدنيا الفانية دي يراجع نفسه.
اللي لسه بيعصي ربنا وبيحسد غيره وبيستقصده في حياته ورزقه يراجع نفسه.
اللي لسه فاكر انه بعد ما هيكبر في شغله هيقدر يذل غيره ويصعبها في وشه يراجع نفسه.
اللي بيتكبّر عالناس وشايف نفسه.
كمية الموت حوالينا ما بتقولش غير ان الكل لازم يراجع نفسه.

#خواطر_قد_تصل

خليك
١- صبور
٢- راضي
٣- مقتنع ان ربنا شايفك
٤- متفائل انه هيفرج الكرب
٥- فاكر نعمته علطول
٦- بتشوف الكويس قبل الوحش
٧- عارف قيمتك
٨- كاتم لخططك
٩- عارف ان العسر معاه يسر
١٠- مش مهتم غير بنفسك وطريقك وملكش دعوة بطريق الغير

#خواطر_قد_تصل

لا تسقط حقوق العباد إلّا إذا عفَوْا.

هو احنا هنغيّر في حساب ربنا !

#خواطر_قد_تصل

أمّا حد يقولك إنه تعبان متقولش انت كمان تعبان
اما حد يفضفضلك همّ متقولش كلنا مهمومين
على فكرة هو غالبًا مش منتظر منك حل لمشكلته لكن محتاج حد يسمعله ويطبطب بس.

#خواطر_قد_تصل