كل قصة احباط او انكسار دا طريق علاجها لو انت عايز
الطريق: اللي فات انتهى
الطريق: التركيز على اللي جاي
الطريق: صحتك صحتك صحتك هي الأهم
الطريق: الرضا لأن ربنا هو مقدّر الأقدار
الطريق: النفس البشرية لازم تؤمن ان الدنيا دار بلاء لكن دار فناء برضه
الطريق: لَا تَدْرِي لَعَلَّ اللَّهَ يُحْدِثُ بَعْدَ ذَٰلِكَ أَمْرًا
#خواطر_قد_تصل

الصغيّر هيكبر كده كده
لو احتويته يكبر بيحترمك
ولو كبرت عليه يكبر ما يعبّركش
الكبير يحب الصغيّر
فالصغيّر يحترم الكبير
المعادلة كده أصح بكتير

#خواطر_قد_تصل

اللي فات انتهى .. ركز على اللي جاي عشان صحتك هي الأهم وارضى لأن ربنا هو مقدّر الأقدار و لازم تؤمن إن الدنيا دار بلاء لكن دار فناء برضه

لَا تَدْرِي لَعَلَّ اللَّهَ يُحْدِثُ بَعْدَ ذَٰلِكَ أَمْرًا
#خواطر_قد_تصل

اوعى تكشف ستر حد
انت مش أد رفع الستر عنك

#خواطر_قد_تصل

محدِّش يقدر يتصنّع الطيبة
الطيِّب خسارة يضيع منك لو لقيته

#خواطر_قد_تصل

الشغف = الكسل وانتظار ما يناسب او ما هو على مقاسك
المسؤولية = العمل وترويض ما ليس على مقاسك ليصبح على مقاسك

#خواطر_قد_تصل

كل تجربة سيئة بتاخد من روحنا شوية شوية
كل ظلم اتعرضنا ليه بيكسر حاجة في النفس
كل محاولة باءت بالفشل زرعت جوا القلب همّ وتعب
كل حق ضاع وكل طريق اتقفل وكل حجر اترمى قدامنا خلانا نقول الحمد لله ان في يوم كل دا هيتصلّح فيه ونفوسنا وارواحنا وقلوبنا هتفرح بوعد الله فلا سامح الله من كسر نفسًا ولا عفا الله عنهم

#خواطر_قد_تصل

اوعى تردّ لمّا تكون غضبان
اهدأ وفكّر وردّ بعدها
على فكرة: السكوت ردّ

#خواطر_قد_تصل

قريبًا تظهر نتايج الثانوية
واحد هيدخل طب وواحد هندسة وواحد أسنان وواحد علاج وواحد صيدلة وواحد بيطري وواحد زراعة وواحد علوم وواحد آداب أو تجارة وواحد تمريض وواحد علوم وواحد زراعة وواحد معهد كذا وواحد أكاديمية كذا ….
البعض هيفرح والبعض هيتصدم والبعض هيبكي.
البعض هيفوق بسرعة والبعض هيفضل واقف في اللحظة دي ومش هينساها.
الكل قدامه المجال مفتوح يثبت نفسه او يقعد يعيط
صحيح الحلم جميل لأنه متاح للكل لكن الواقع مفروض عالكل والشاطر بس هو اللي ينجح في الواقع

#خواطر_قد_تصل

لن تأتيك لأنك الأفضل.
ولن تضيع منك لأنك الأسوأ.
حين يعطي الله يعطي دون حساب وحين يمنع يمنع دون جدال.

#خواطر_قد_تصل

الإنسان ضعيف
بيخاف من بكرة
بيخاف من أي حاجة ما يعرفهاش
بيخاف وخلاص

يا جماعة ما تسامحوش اللي بيصمم على ظلمكم
ما تسامحوش اللي لما بتتجاهلوه يزيد طغيان
ما تسامحوش اللي لما بتسامحوه بيحسسكم انكم ضعاف
ما تسامحوش اللي بيساعده كمان واللي بيطبّله
ما تسامحوش اللي مصمم يدوس على اخر شعرة ممكن توصلكم
ما تسامحوش واصبروا لمّا الحق يرجع ابقى سامحوا او ما تسامحوش
مفيش مسامحة وحقك ضايع. المسامحة تكون عن قوّة

#خواطر_قد_تصل

أصدقائي ومتابعيّ الكرام
كل حاجة سعرها لسه هيزيد تاني
ما تنسوش الغلابة المستحقين
دوّروا عليهم بجد وبطّلوا تجروا ورا التريند والأخبار العقيمة
مش اللي يقولك اديني ولا اللي بيطلب
في ناس كتير بتستحي تطلب
والله الصدقة جبر، والزكاة فريضة ، والإسلام دين التكافل
#خواطر_قد_تصل

اوعى وأنا متضايق وبشتكيلك من حاجة تلومني وتقولّي أنا حذرتك قبل كده.
أنا جيتلك عشان تهدّيني مش عشان تثبت نفسك عليّ.
لو مكنتش أنا حاسس انك هتقف معايا مكنتش جيتلك.
وقت الشكوى لازم تقف معايا وبعدين تلومني لما اهدأ.

#خواطر_قد_تصل

البوست دا لطلاب الطب بصفة عامة باختلاف التخصصات بشري وعلاج طبيعي واسنان وصيدلة وتمريض وبيطري وغيرها من الكليات والمعاهد المعاونة دون تفريق:
رسالة الطب رسالة شريفة إلى أبعد الحدود وصحيح انها تلوثت بالكثير من التغوّل والجشع الفترة اللي فاتت غير انها تشوهت بالكثير من الهجوم المبرر وغير المبرر بسبب التوجه الاعلامي لابراز الاخطاء الطبية المعروفة على انها مقصودة او متعمدة في غياب قانون واضح للفصل بينها لكن مع ذلك:
👈لا يجب ابدًا ان ننسى كطلاب واساتذة في هذا المجال انه مجال شريف بل من اشرف المجالات بعد دراسة الدين ولذا وجب على كل واحد منّا مراجعة ضميره كل لحظة ومراجعة نيته كل لحظة ومراجعة الهدف النبيل الذي يبحث عنه.
👈هي حياة والحياة اغلى ما وهبَ الخالق ونحن مؤتمنون عليها ونحن قدر الامانة ان شاء الله ان اخلصنا العمل.
لذا لا يأس مهما صعبت الدراسة ولا يأس مهما صعب العمل ولا يأس مهما طال الضيق وزاد السهر والأرق ولا يأس من الأجر فهو مضمون بالتأكيد حتى لو فقدناه بين الناس فلن نفقده عند الله.
الحمد لله على مهنةٍ هي الحياة.
#خواطر_قد_تصل

اما تسألني وأرد عليك قول شكرًا
أمّا تطلب مني طلب وأعمله قول شكرًا
أما تطلب مني طلب واحاول بكل جهدي اعمله حتى لو ما تعملش قول شكرًا
يا جماعة الأصول كده
الأصول كده

قبل نتائج الثانوية العامة
اِفْهم ان الدنيا (مستمرة) سواء دخلت الكليّة دي او أي كلية.
اِفْهم ان القمة والقاع مصطلحات (مجتمعية) فاشلة.
اِفْهم ان نصيبك مربوط بعوامل كتير تشمل مجهودك وتعبك والتوفيق (ورحمة ربنا).
اِفْهم ان ما اصابك لم يكن ليخطئك.
اِفْهم ان السعادة مش كلية ولا الاكتئاب كلية.
اِفهم انك لازم تكون انسان مسؤول بأي حال (وفي كل مكان).
اِفْهم ان رحمة ربنا (بتسبق) كل خطواتك.
ادعي ربنا بالخير أينما كان (والرضا) لازم يكون أهم دعاء.
#خواطر_قد_تصل

الثانوية العامّة اللي مستنيين النتايج
ما كان لكم سيأتيكم طوعًا أو كرهًا وما لم يكن لكم لن يصل إليكم مهما بذلتم.
ان كان نصيبكم التفوق او النجاح او التعثر لا قدّر الله فلحكمةٍ من الله يعلمها وحده.
من كان حلمه دخول كليّة معينة او جامعة معيّنة ونالها فالحمد
لله ومن لم ينل حلمه فالحمد لله فلم يكن خيرًا له الوصول لها الآن او ربما لم يكن خيرًا له الوصول لها من الأساس لا الآن ولا بعد.
فقط ثقوا بالله وفقط اعلموا أنَّ الله قريبٌ مجيبُ الدعاء وما عليكم الآن فقط إلّا الدعاء.
#خواطر_قد_تصل

كل نظريات وكلام الكون اللي هتحاول تطبطب على حد حاسس انه اتظلم في ثانوية عامّة مش هتنجح تطبطب عليه.
لكن مش مكفّيك كلام ربنا لما عرّفك إنّ سعيك هو شايفه وسعيك هو اللي بيجازيه وسعيك هتاخد جزاءه كامل مكمّل وافي.
خُد بالك ربنا مقالش امتى بس كلنا فاهمين حكمته وتوقيته

#خواطر_قد_تصل

المستقبل بيَد الله أينما ذهبْت
لا ثانوية ولا كلية ولا شغلة ولا رزق ولا مكان بيتك ولا مكان استقرارك الدائم بيتحددوا بمزاجك.. دول بيتحددوا بتوفيق الله لسعيك وتوفيق الله لنتيجتك وتوفيق الله لما يناسبك وتوفيق الله لما يصلح به حالك وتوفيق الله لما فيه الخير بتاعك.
طبعًا الاختبار صعب قوي قوي قوي
والنفس دايمًا لوّامة ودائمًا ما بترضاش بسهولة
ربنا لما وصف نفسه انه هو الرزّاق ذو القوّة المتين مش بس بيرزق ، دا مثير الرزق، وواسع الرزق، والقادر على الرزق، والمُحكِم لكل أمور الرزق أينما كان.
اللهم عفوك ورضاك ، اللهم اربط على قلوبنا فإننا لا نعلم وأنت وحدك تعلم

#خواطر_قد_تصل