طاقة إيجابية⁦☺️⁩💜🌺

فتحت التلاجة شلت باغة اللبن، إتسحرت منها ورجعتها التلاجة، قفلت باب التلاجة، اتذكرت حاجة، فتحت باب التلاجة تاني، شلت باغة اللبن من رف التلاجة الفوق ختيتو في رف التلاجة التحت عشان الصغار لما يفتحو التلاجة يقدرو يحصلو اللبن بسهولة.
خاطرة صغيرة زي دي، بتخليني دايما أسأل روحي، في كم ألف خاطرة زي دي مرت علي أمي وأبوي وانا ما عارفها، وهم ما كلمو بيها زول، عملوها عشان أنا ما أتعب، ما أقع ما أتجرح ، ما أتغلغل.
الطرابيز الزحوها من الطريق، المراتب النزلوها في الواطة، المنبهات الظبطوها عشان يصحوني، الشاي البردوه، الهم الشالوه، الفرح الفرحوه، الحب الحبوه، التعب التعبوه، وكثير من ما خفي و ثقل.
"وَقُلْ رَبِّ ارْحَمْهُمَا كَمَا رَبَّيَانِي صَغِيرًا"
قلت لي صاحبنا محمد محجوب، زمان الواحد فينا كان بيسقي شجرة البر من طيب الذكريات. لكن لما كبرنا وولدنا عرفنا إنو لو الواحد بالجد بيخلص في برو لي أبوه وأمو عشان الحاجات البتذكرها ليهم فمن باب أولى إنو يبرهم أكتر عشان الحاجات المابيتذكرها وما عارفها.
وإتعلمنا إنو لو بنبرهم عشان الحاجات العملوها، فمن باب أولى إنو نبرهم عشان الحاجات الحسوها.
شيلة الهم، ده مستوى مختلف من الأحاسيس. ده قدر كبير من الشيل البشيلو الوالد وبتشيلو الوالده، ولا بيحكوه ليك ولا بيشكوه لي غيرك، ودا تقيل ما بيظهر أثرو في الأكتاف ولا بيقدر يشيلو الحيل، ده بالذات بيتشايلوه الروح والقلب، بي رضا وصبر وحب ، حياتهم كلها.
نبرهم أكتر، عشان الحسوه قبل العملوه.
وعشان الدسوه، وما شفناه قبل الشفناه.
"وَقُلْ رَبِّ ارْحَمْهُمَا كَمَا رَبَّيَانِي صَغِيرًا"
نورين
٤-٤-٢٠٢٣

www.tgoop.com/egabuat/8513

757 viewsEmtethal Ibrahim, Apr 4, 2023 at 21:54

فتحت التلاجة شلت باغة اللبن، إتسحرت منها ورجعتها التلاجة، قفلت باب التلاجة، اتذكرت حاجة، فتحت باب التلاجة تاني، شلت باغة اللبن من رف التلاجة الفوق ختيتو في رف التلاجة التحت عشان الصغار لما يفتحو التلاجة يقدرو يحصلو اللبن بسهولة.
خاطرة صغيرة زي دي، بتخليني دايما أسأل روحي، في كم ألف خاطرة زي دي مرت علي أمي وأبوي وانا ما عارفها، وهم ما كلمو بيها زول، عملوها عشان أنا ما أتعب، ما أقع ما أتجرح ، ما أتغلغل.
الطرابيز الزحوها من الطريق، المراتب النزلوها في الواطة، المنبهات الظبطوها عشان يصحوني، الشاي البردوه، الهم الشالوه، الفرح الفرحوه، الحب الحبوه، التعب التعبوه، وكثير من ما خفي و ثقل.
"وَقُلْ رَبِّ ارْحَمْهُمَا كَمَا رَبَّيَانِي صَغِيرًا"
قلت لي صاحبنا محمد محجوب، زمان الواحد فينا كان بيسقي شجرة البر من طيب الذكريات. لكن لما كبرنا وولدنا عرفنا إنو لو الواحد بالجد بيخلص في برو لي أبوه وأمو عشان الحاجات البتذكرها ليهم فمن باب أولى إنو يبرهم أكتر عشان الحاجات المابيتذكرها وما عارفها.
وإتعلمنا إنو لو بنبرهم عشان الحاجات العملوها، فمن باب أولى إنو نبرهم عشان الحاجات الحسوها.
شيلة الهم، ده مستوى مختلف من الأحاسيس. ده قدر كبير من الشيل البشيلو الوالد وبتشيلو الوالده، ولا بيحكوه ليك ولا بيشكوه لي غيرك، ودا تقيل ما بيظهر أثرو في الأكتاف ولا بيقدر يشيلو الحيل، ده بالذات بيتشايلوه الروح والقلب، بي رضا وصبر وحب ، حياتهم كلها.
نبرهم أكتر، عشان الحسوه قبل العملوه.
وعشان الدسوه، وما شفناه قبل الشفناه.
"وَقُلْ رَبِّ ارْحَمْهُمَا كَمَا رَبَّيَانِي صَغِيرًا"
نورين
٤-٤-٢٠٢٣

BY طاقة إيجابية⁦☺️⁩💜🌺