tgoop.com/eshha97/1356
Last Update:
أمس في عز مانحن مقلقين مافي حد قدر ينوم كويس لأنّو الواحد مامطمن ومامرتاح وكلما عاجزين جِدًا لكننا نملك الدعآء بيقين ..
فحقيقي في عز كل الضيق دا الواحد محتاج دعم معنوى، حاجة تشيل قلبه كله كده بره وتمسح عليه عشان يكون كويس على الأقل بس كويس!!
فلمَّا رن المنبه لوقت القيام أنا يادوب كنت نمت..
قفلت المنبه وكملت أنا نعسانة شديد ويادوب النوم جاء أصلًا، فليلة ماحتفرق يعني!!
النوم طار مِن عيني!!
لوهلة حسيت إنّو أنا في القبر طيب وحينور لي شنو؟!
جاء في بالي اليوم بكون كئيب ومتضايقة فيه كيف بلاسبب لمايكون فاتني القيام قبلها! ..
ليلة عند ربّنا مابتفرق لأنّو هو سبحانه الغني!
لكن إنت بتفرق عندك والله!!
في الدعم، في المواساة، في التخفيف، والتهيأة لليوم الحيواجك ..
وفي ليالي القبر الموحِشة!
قسمًا بالله مش لسه الوضع كمّا هو والواحد بواجه نفس الظروف والأقدار الصعبة!..
لكن أنا نفسيًا أحسن بكتيييير مِن أمس!
شفت شعور إنّك مطمن شديد؟! مرتاح مِن جوه؟!
سكت الضجيج الذي كان!
فسبحان مَن جعل كل هذا الأنس والراحة فيه ..
حقيقي لما أقول للأبد مافي راحة ذي قيام الليل دي ماشعارات ولا تطبيل!
دي واقع ناس كتاار جِدًا ..
هم ما أقل في ظروفهم منك، ولا حياتهم ظابطة ومرتاحين مِن كبد الحياة الدنيا!
لكن لو هم كويسين فهم كويسين بقيام الليل، لو هم مطمنين فهم مطمنين به! ..
الواحد مستعد يفقد أي شئ، إلّا أن يفقد قيام الليل!
ماعارفة ممكن أوصف لك كيف؟ ولاأقول أكتر مِن كده شنو يخليك تتمنى لو كل الأوقات قيام ليل!!..
ويخليك تحرص كل الحرص ألا تفوتك ليلة واحدة!
في ظل كل هذا الحروب والضياع..
الضيق والشتات ..
ماأظن في وقت أنسب مِن دا عشان تبدأ فيه جادي قيام الليل بمجاهدة نفسك!
والله لو تعلم إننا في حاجة له أشد مِن الطعام والشراب!!
والله المستعان!
#ترتيل_الخزين
BY عَالْبَال 🍃🌧
Share with your friend now:
tgoop.com/eshha97/1356