tgoop.com/famle11/4507
Last Update:
🤔الحما مش هتبقي زي امك
والحما بردو مش عدوك
وصله رحم زوجك يعني صله رحمك
اوعي تفتكري انك بتتجوزي شخص واحد لا
انتي بتتجوزي عيله
بتوسعي صله رحمك
مش هقولك زي مالناس بتقول عامليها زي امك لان كتير من الحموات مش هتعاملك زي بنتها.. لا زي ضرتها
فافهمي 👇
عاوزه قلب زوجك بري امه وابوه
عاوزه احترام زوجك قدريه قدامهم
عاوزه تقدير زوجك بري اخته واخوه وساعديه انه يودهم وقربيه منهم
🚫 ممنوعات
🚫ممنوع تقوليله مامتك ضايقتني اختك قالتلي ممنوع تنقلي سر او حتي موضوع عام اتناقش قدامك
اعملي نفسك لا بتسمعي ولا بتشوفي ولا بتاخدي بالك غير بالكلمه الطيبه
🚫متنقليش اسراراهم لعيلتك
🚫ممنوع تقارني نفسك باخته بمرات اخوه
♥️♥️كلام الستات للستات ♥️♥️
اخته زعلتك روحي قوليلها انا بحبك بس الكلمه دي زعلتني وانا محبش ازعل منك هتتصالحوا من غير هو مايتدخل
🌹مامته بقي حاجه تانيه هتبقي ذكيه في التعامل
قالت كلمه زعلتك كأنك مش سامعاها
قللت من اكلك من شكلك من اهلك
دي مش صحبتك علشان تردي عليها ده اسمه سوء ادب سكوتك قوه هتعلي ثقتك في جمالك وتعملي اصناف احلي وتقدميها ليها وتقوليلها انا بتعلم منك هتقربيها بذكاء وبحدود بردو 🚫 اهلك خط احمر هتتكلمي بالخير عنهم
🌹لما تروحي انتي وزوجك عند مامته
🌹كل طلباته انتي الي تعمليها هو مسؤليتك مش مسؤليه مامته غدا تقومي تحضريه او تطبخيه وتغسلي الحاجه الي انتي وهو استخدمتوها وتساعديها في البيت
🌹وده مش ضعف ولا انتي مهانه
دي صدقه صحتك وبر لصله رحم زوجك
لو زعل من اهله صالحيهم
🚫متذكريهومش بسوء ابدا
قولنا ايه
🌹كلام الستات مع الستات الرجال ملهاش دعوه 🌹
انتي بذكائك تكسبيهم في صفك
بكلامك الحلو .بقلبك الابيض بمحاولتك لجعل اولادك يحبوا 🌹اهل باباهم زي اهل مامتهم🌹
الاتنين واحد
🚫الحما مش عدوه .والعمه مش عقربا
🌹والاقارب احباب
غيروا اعتقاداتكم .عيشوا بسلام .الحياه الزوجيه ساحه سلام وليست ساحه حرب
اتعلمي تعتزلي الي يضايقك مش تتخانقي معاه
🌹🌹ملحوظه 👇👇👇
انا متجوزه في بيت عيله بقالي 17سنه
حمايا وحماتي و بعض من اهل زوجي بيقولولي بنحبك اكتر منه وصحبات حماتي بيجولي ويتصلوا بيا ويقولولي القعده متحلاش غير بيكي والقليل منهم انا اعتزلهم بود
🌹لأن دي اخلاق ديني وده الي امي ربتني عليه يعني مش بقول حكم و نصايح وخلاص لا انا عيشت كل كلمه كتبتها بما لا تتخيلوا ولا تتوقعوا حصل هبقوا احكيلكوا بعدين
بس الي زرعته صدقوني حصدته اضعاف والي عند الله باقي وعطائه اعلي مما تتخيلوا فقط تعاملوا بأخلاق الاسلام
وادفعوا بالتي هي حسن مع وضع حدود شخصيه قويه وعدم اختراق حدودك من اي شخص
♥️♥️كلامي للناس السويه المتشافيه اما الي عايشه الحياه بالجروح والحروب كلامي مش ليكي ♥️♥️
كتبته
#جنه_دعاء
#كوكب_دعاء
#دعاء_صلاح
استشاري الصحه النفسيه والارشاد الاسري والتربوي
اخصائي تعديل السلوك والعلاج بالفن
ماستر ومعالج الطاقه الحيويه
لايف كوتش وباحث في العلاقات
معالج نفسي معتمد بتقنيات عديده
BY زوج وزوجه وأبناء👨👩👧👦
Share with your friend now:
tgoop.com/famle11/4507