tgoop.com/faqdalmawsawi/1269
Last Update:
(#اول_امير)
#ليش_تعطش_من_اجلنه
احنه مانستاهلك يحسين حگ
هـــواي اشــوفـنّـك تـحـبـنـه
ها يبو صدر البالخيول نسحگ
أنــت مــاتـحـتـــاج وادم
العنده الأكبر بيش يحتاج الخَلَگ
أنتَ يا أول أمير الخدم عنده يعاتبونه
ـــــــــــــــــــــــــــــــــــــــــــــــــــــــــــــ
اليگصد بحاجة لضريحك
شرايد اباله يصير
واعله بابك كلها توگف
لا زغير ولا چبير
يملك الدنيا بكبرها
يم ضريحك يزدحم وي الفقير
انت اول شيخ يفرش
للضيوف المايجونه
أنتَ يا أول أمير الخدم عنده يعاتبونه
ـــــــــــــــــــــــــــــــــــــــــــــــــــــــــــــ
بيك هايم واجب ومومستحب
بيك الهيام
شكثر شايل
بيك حنية وسلام
عگلي حاير
النخل عافه.. وساكن الگبه الحمام
ليش اليشگ ثوبه لاجلك
بعض ناس يحاربونه
أنتَ يا أول أمير الخدم عنده يعاتبونه
ـــــــــــــــــــــــــــــــــــــــــــــــــــــــــــــ
طشريت اهلك لاجلنه
فدوة لترابك هلي
الهوا البالطف يچوي ريجك
ياهو مثلك مبتلي
الماي شنهي ينعز عليك
عود يارية علي
المثلك يعبدونه لازم
موش ضامي ايگطعونه
أنتَ يا أول أمير الخدم عنده يعاتبونه
ـــــــــــــــــــــــــــــــــــــــــــــــــــــــــــــ
شنهي اليطخ راسه لاجلك
عود ترفع راسه
شنهي اليگصدك يزورك
الكل تبوس امداسه
شنهي اليخدمك بيومه
يصير سيد ناسه
هذا انت وياهو مثلك
الماشي ليك يقدسونه
أنتَ يا أول أمير الخدم عنده يعاتبونه
ـــــــــــــــــــــــــــــــــــــــــــــــــــــــــــــ
✿ اداء : سيد فاقد الموسوي
✿ الشاعر : احمد المشرفاوي
@faqdalmawsawi
BY قصائد سيد فاقد الموسوي مكتوبة
Share with your friend now:
tgoop.com/faqdalmawsawi/1269