tgoop.com/frgstl/1342
Last Update:
عباس يابو الغيره
ضليت انا ابحيره
،،،،،،،،،،،
الطف بعده جرحه مانشف
متعوبه منه
ونه اعله ونه
مـــن طب الحسين الخيم
وسلمني خدره
بالگلب جمره
وتاليها اصــــعد عالهـــزل
واخذوني غربه
ياخويه صعبه
ليش الدهر وي بـت علي
شتت شملها
چاوين اهلها
شيسد ذيج السيره
ضليت انا بحيره
،،،،،،،،،،،،
وديت طارش للوطن
يخبر الهواشم
بحال الفواطم
لي هسه ما ردلي بخبر
ومحد اجاني
بالحسره اعاني
وين النجوم الساطعه
الجرحوا دليلي
واحــد يجيلي
وين البخت يأهل البخت
زينب وحيده
ماتت بعيده
الهموم فوگي إجثيره
ضليـت انا بحيره
،،،،،،،،،،،،
عــــباس ياعزوة هلي
وحشه الجنازه
عازتك عازه
ام عون رادت بس اخو
يطبگ رمشها
ويجدم نعشها
وين الگمر اسمع حجي
يحضر خواته
كلهم شماته
خويه دمعتي تصب نهر
اختك غريبه
هاي المصيبه
عباس غربه الديره
ضلـــيت انا بحيره
،،،،،،،،،،،،،
إلشام لوعه ومو سهل
من اطبله حرمه
يترسها هضمه
كل اه اجرها وانتحب
يثلم جروحي
خلصانه روحي
جا ال اميه اتجددوا
وردوا عليه
وكالوا سبيه
وانه ودمعتي ننتضر
قائمنه يخرج
وبتاره يبرج
الثار لاهل الغيره
ضليت انا بحيره
،،،،،،،،،،،،
متعوده زواري تجي
تخفف غربتي
وتنزل دمعتي
محد يجي هاي السنه
ترجع عليه
چلمة سبيه
زينب تعاتب والعتب
مجّمر كلبها
فارغ دربها
اللهُ اكـــــــبر يا دهر
ماكافي منها
تزيد حزنها
مايرحم حرمه إچبيره
ضليت انا ابحيره
،،،،،،،،،،،،
خادم القصيده
عزيز المياحي
BY الشاعر عزيز المياحي
Share with your friend now:
tgoop.com/frgstl/1342