tgoop.com/gazetaerkeii/40613
Last Update:
Амма Эмиһигэр ыалдьыттаатыбыт
🛤️🚌 «Проба пера» эдэр кэрэспэдьиэннэрэ Валерия Романова уонна мин ааспыт сайын Аммаҕа Олоҥхо ыһыаҕын сырдата баран иһэн, Эмис нэһилиэгин баһылыгар Прокопий Бубякиҥҥа «манна кэлиэхпит» диэн тылбытын биэрэн, бу күннэргэ Чыамайыкы орто оскуолатын «Саха kids» тыйаатыр-устуудьуйа оҕолоро уонна «Проба пера» эдэр кэрэспэдьиэннэрэ Амма улууһун Эмис нэһилиэгэр табаарыстыы көрсүһүүгэ айаннаабыппыт.
☀️🏛️ Сарсыарда 6 чаастан оскуола оҕолоро, учууталлара, нэһилиэк баһылыга Александр Захаров, кулууп дириэктэрэ Д.Г.Максимова үс массыынанан уһун айаҥҥа туруммуппут. Сарсыарда 10 чааска Саппыйа алааһыгар минньигэс алаадьылаах, сахалыы таҥастаах кулууп үлэһиттэрэ биһигини көрүстүлэр. Күннүк Уурастыырап тэлгэһэтин, мусуой балаҕаннарын, Олоҥхо дьиэтин көрдөрдүлэр, кэпсээтилэр. Кулууп дириэктэрэ Анжелика Иванова Эмистэн төрүттээх биллиилээх улуу олоҥхоһуппут Тимофей Васильевич Захаров‒Чээбий бүүһүн, саха билимин сайыннарсыбыт Василий Назарович Чемезов олорбут дьиэтин көрдөрдө.
👫🤝 Оскуолаҕа Күннүк Уурастыырапка аналлаах кылааһы, мусуойу көрбүппүт, табаарыстыы волейбол оонньообуппут. Оскуола уонна нэһилиэк бибилэтиэкэлэригэр оскуолабыт 100 сылыгар аналлаах «Кэскил» хаһыат нүөмэрин бэлэх ууммуппут. Салайааччыбыт Ольга Захарова “Caxa kids” туһунан кылгастык сырдаппыта, оҕолору кытта билсиһэр-алтыһар сыаллаах оонньоппута. Салгыы 5 хамаандаҕа арахсан бырайыактары суруйбуппут, көмүскээбиппит. Ол кэмҥэ кулуупка П.Ф.Никитина нэһилиэк олохтоохторугар туойга маастар-кылааһы ыыппыта, салгыы дьаһалта үлэһиттэригэр «төгүрүк остуол» буолбута.
Киэһээ 18 чааска кулуупка «Олоҥхо ‒ өбүгэ алгыһа» туруоруубутун көрдөрбүппүт.
Сиһилии
@gazetaerkeii
@ulusmedia
