#_ት_ዕ_ዝ_ብ_ት

በበግ ቅዬ ጋጣ...
ቀንድ ከሌላቸው ፥ መሀል የተገኘ
ባጋዘን ቅርፅ ራስ ፥ ጌጡ በተቀኘ
የሳጥናኤል ጭፍራ ፥ መችና ተሰኘ ?

ይማስናል እንጂ
ስምሪቱ መሀል ፥ ግርምት እንዳልታዬ
ዘውድ ጫነ ብሎ ፥
የዋህ በግነቱ ፥ መች ከርሞ ጨቀዬ ?

ተቀጥላ ...
ተደራቢ ...
ተለጣፊ ...
የስም ርቢ ...
ምግባረ ቃል ፥ እንጥልጥሎሽ
አሉባልታ....... ስሚስሞሽ
በበግ እምነት ፥ ይታለፋል
ከበጎች ቤት ፥ በበግ መሀል ።

በእኩልነት..
በሁዳድ መስክ ፥ ያለ ከልካይ
ነጭ ፣ ጥቁር ፣ ቦሀና ፣ ቀይ
ግጦሹ #ወጥ' ! ፥ ጥላው ሰማይ
ሆኖ ያድራል ፥ ባንድ ጋጣ
ሆንተብሎ ለትንኮላ
ከበግ ራስ ፥ ቀንድ አይወጣ ።

ነገር ግን ሲጠጋው....
በግ እንኳን አያልፍም ፥ የመላሸቅ ደዌ
ጆሮው ላይ ሲፈጫጭ...ጥል እንደ ሸውሸዌ
ያኔ ...ገራገሩ
ቀለም ፣ ቀንድ ፣ ልሳን ፥ ስላይደል ሽብሩ ፤

አንዴ ጭንቅላቱ ፥ ለጠብ ካዘገመ
ተንደርድሮ ሄዶ
የሚተመትመው ፥ በግ ቢያጣ የቆመ
ዘረ በግ ቢቀን'ን ...ፍቅርን እያለመ
ካገኘው ሲማታ. . .
ይኖራል ራሱን #እ_የ_ቸ_መ_ቸ_መ ።

#አብርሀም_ተክሉ ( #መርዕድ)

@Abrham_teklu
@getamiyan
@getamiyan
@getamiyan

ዘመንህ ዘመኔ
አፍ ብቻ ቢሆንም
ብታምንም ባታምንም
አንድ ታሪክ ላውራህ ፣ ጆሮ ስጠኝ ልጄ
እንዲህ እንደዛሬው ፣ ኦና ሳይሆን ደጄ
እኔው የተከልኩት
በለጋነት እድሜው የተንከባከብኩት
አድጎ ልክ እንደ አድባር ፣ ሲታይ የነበረ
ቅርንጫፉ ሰፍቶ ፣ ግንዱ የወፈረ
እዚህ እበሬ ላይ ፣ አንድ ዛፍ ነበረ።
።።።
እናምልህ ልጄ
እንዲህ እንደዛሬው ፣ ቆሌያችን ሳይርቀን
ወበቅ ሳይወብቀን ፣ ድርቅ ሳያደርቀን
ንፁ አየር ፍለጋ ፣
ዛፍ ያለበት ሳንሔድ ፣ ቤታችንን ለቀን
እዚህ እበሬ ላይ
አንድ ችግኝ ነበር ፣ አድጎ የሆነ አድባር
ይህንን ዛፍ አይተው
እዚ ነው መሸፈት
ይል ነበረ ቋምጦ ፣ ምድረ ነፃ ግንባር።
።።
እንዲህ እንደዛሬ
የወፎች ዝማሬ
በሰው ልጆች ጩኸት ፣ ሳይጠፋ ተውጦ
ሁሉም ላዚም ሳይል ፣ ማይኩን ጨብጦ
ምስኪን ጆሯችንን ፣
የነጠላ ዜማ ፣ዋይታ ሳይጠልዘው
እኔና እናትህ
ከዛፍ የተቀዳ
የወፍ ዜማ ነበር ፣ ምንገባበዘው።
።።
እንዲህ እንደዛሬው
ዩንበርስቲ በዝቶ
ትምህርት ተስፋፍቶ
ምሁር ነኝ ባይ ሁላ ፣ እውቀት የቸገረው
ከመሆኑ በፊት
እዚህ ዛፍ ስር ነበር ፣ ፊደል ሚቆጠረው።

።።
እናምልህ ልጄ

እንዲህ እንደዛሬው ፣ ፅድቃችን ሳይርቀን
ወበቅ ሳይወብቀን ፣ ድርቅ ሳያደርቀን
ንፁ አየር ፍለጋ
ዛፍ ያለበት ሳንሔድ ፣ ቤታችንን ለቀን
አንድ ዛፍ ነበረ
ቅርንጫፉ ሰፍቶ ፣ ግንዱ የወፈረ
ቅጠሉ የበዛ ፣ ጥላ የሚሰጠኝ
እንጃ ብቻ አንድ ቀን ፣ ምን እንዳቀበጠኝ
ዛፉ የሚጥለው
ጭራሮና ፍሬ ፣ ጣሪያዬ ላይ ወድቆ ፣እያስደነገጠኝ
አላስተኛ ብሎ ፣ ስለበጠበጠኝ
ቅርንጫፉን ልቆርጥ ፣
ግንዱን መውጣት ጀመርኩ ፣ አንድ ቀን በምሬት
ቅርንጫፍ ላይ ሳልደር
ድንገት ዛፉ አዳልጦኝ ፣ ወደኩ ወደመሬት።
።።።
መቼም ሰው ነኝና
ስድስቴ ወድቄ
ሰባቴ መነሳት ፣ እንደ ትል አልታደልኩ
ዛፉ አንዴ ጣለኝ ፣ ሰባቴ ተሰበርኩ
ተሰብሬ አልቀረሁ
መታከሚያ ባጣ
ዛፉን አስቆርጬ ፣ ሽጬው በሱ ታከምኩ።
።።።
እናምልህ ልጄ
ዛፉን የገዛኝ ሰው ፣ ጣውላ ቤት ነበረው
ካላጣው ቁሳቁስ ፣ ሞያ ሳይቸግረው
ባለ ጊዜ ሁሉ
እንዲቀመጥበት ፣ በ"ተራበ"ተራ
እኔ በሸጥኩት ዛፍ ፣ ግዙፍ ዙፋን ሰራ።
የሰራውን ዙፋን
ቤተ መንግስት ወስዶ ፣ በስልጣን ለወጠው
ፀሐይ መንግስት ሁሉ
እዛ ዙፋን ላይ ነው ፣
ህዝቡን ለማቃጠል ፣ ታግሎ ሚቀመጠው።
።።።
እናምልህ ልጄ
ችግኝ ተክዬ ፣ ግዙፍ ዛፍ አሳደኩ
ከዛፍ ላይ ወድቄ ፣ ዛፌን ሽጬ ታከምኩ
እኔ ግን ጥላ አጣሁ ፣ ኦና ሆነ ደጄ
ለመዳን ዛፍ ስሸጥ ፣ ህመም ገዛው በጄ
ከግዜር ፀሐይና
ከፀሐይ መንግስታት ፣ ልጠለል የት ሔጄ?
ከሁለቱም ፀሐይ
ለመዳን ዛፍ ትከል ፣ ዛፍ ጥላ ነው ልጄ።
ዛፍ ትንፋሽ ነው ልጄ
ዛፍ ዜማ ነው ልጄ
ዛፍ ህይወት ነው ልጄ
ዛፍ ዙፋን ነው ልጄ
።።።።
#አረንጓዴ አሻራ

@Getamiyan

የፍቅር ፍልስፍና !
( ገ/ክርስቶስ ደስታ )

..

ጅረቶች ከወንዞች ጋር የሙጥኝ ብለው ተጣምረው፤
ወንዞችም ውቅያኖስ አቅፈው..
የሰማየ ሰማያት ንፋስ ፥ ጣፋጭ ስሜት ሲዋሃደው፤

ተመልከችው !

ከቶ አንድም ነገር..
ባለም ላይ ያለአቻ ያለጓደኛ፤
ሆኖ አይገኝም ብቸኛ።

በውስጠ ምስጢር ህላዌው ይጣመራል ሁሉም በውል፤
በአንድ መንፈስ በአንድ ቃና ስጋና ደሙን ሲያዋውል።

እኔና አንቺስ ምናለበት ፤
አንድ ብንሆን ብናውቅበት!?
እንደመሶብ ከግጣሙ ፤
ተራሮች ሰማይ ሲስሙ፤

ዕይው ጣዕሙን !

ደግሞም የፍቅር ጡር ጣጣ፤
ሴቴ አበባ ያለወንዱ፥አበባነቷ ቅጥ ሲያጣ፤
ወንዴ አበባም ያለሴቷ፥በፀሐይ ሐሩር ሲቀጣ፤

ዕይው ቆንጂት ዕይውማ ፤
ልቦና ፍቅር ሲጠማ።

የፀሐይ ብርሀን ጠዋት፥የመሬትን ከንፈር ሲስም፤
በሙቀት እየዳበሰ ፈገግታዋን ሲያለመልም፤
ለዛው ሲፈካ ሲተም።

የጨረቃ ጨረር ሞገድ፥የባህርን ራቁት ገላ፤
በምሽት የዕንቅልፍ ሰዐት፥ይደበዝዛል እያጠላ።

ስለዚህም አስተውይው፥እኔን ሁኝ አንቺን ልሁን፤
በደም ስርሽ ደሜ ይፍሰስ፥በደም ስሬ ደምሽ ይሁን!

አንድ እንሁን !!

@getamiyan
@getamiyan
@getamiyan

የማርያም ካህን ነኝ!!!!!!


ሩጩ ያልጠገብኩ፤ ገና ብላቴና፤
በአባቶቼ ቀለም ፤
ጎጆዬ የቆመ፤ መንገዴ የፀና፤
የማርያም ካህን ነኝ፤
ጠግቤ የማድር ፤
እመ ብርሃን ብዬ፤ በስሟ ጥፍጥና።
የአሮንን ጥምጣም፤
የያሬድን ዜማ፤ክህነት ተሸክሜ፤
ማህሌት የምሰሙን፤
ደብር የማቀና፤
በገሞራው ዋድላ፤ በተክሌ ዝማሜ፤
በውዳሴ ማርያም፤
በአንቀፀ ብርሃን፤ ይሽራል ህመሜ።
ሸጋው ልጅነቴን፤
ይህ ለጋ ዘመኔን ፤
ሰአሊነ እያልኩኝ፤ የምገብርላት፤
በባዶ እግሬ ሩጩ፤
በውዳሴ ቅኔ የምዘምርላት፤
የጦቢያ ባለርስት፤ ማርያም ናት ማርያም ናት።

((( ጃ ኖ )))

@getamiyan
@getamiyan
@getamiyan

።።።። ዋ! ።።።።
(በረከት በላይነህ)

አይኔ ወደደሽ ስልሽ፣
አይኑን አጥፋው ብለሽ ገባሽ አሉ ስለት
ምኞትሽ ሰመረ
አይኖቼ ጠፉልሽ ይኸው አንደዘበት።

ግን መች ተውሻለው
በልቤ ብሩህ አይን ዛሬም አይሻለው።

ደሞ አንደዚ ስልሽ አትወጅኝምና
ልቡንም አጥፋልኝ ብለሽ ትሳይና
ፀሎት ያልቅብሻል እሞትብሽና።



@getamiyan
@getamiyan
@getamiyan

የድሌ ቀን
-------------
ባልነዘረ ክራር
ባልተነፋ እምቢልታ፣
ባልተመታ ታምቡር
ባልጮኸ ጡሩንባ፣
አካሌ ሲደንስ
እስክስታ ሲመታ።
በሌለ ሙዚቃ
ብለው ለሚስቁ፣
የድል ቀን ሲመጣ፣
"ሹ.ክ.ሹ.ክ.ታ" እንኳ
ቅኝት መሆኑን ባወቁ።
===========

የ"10" ሣንቲም እውነት
በወንድወሠን ካሣ

@getamiyan

ምን ያደርግልኛል ???

ገልጠሽ ስላየሁት
እጄ የነበረን ...በሩቅ ለማተርኩት
ምን ያደርግልኛል
ያንን እቶን ገላ...
በቆፈኔ ወራት...ለብርዴ ካልሞቅኩት ???

ቁር መስመር አልፎ
ቁርጥማቴ ሆኖ...አጥንቴን ሲያኝከኝ
አንድ አካሌ ርቀሽ
አልጋው አንድ ጎኔን ...ለብቻዬ ሲያከኝ
አለሁልህ ማለት ...በሌለሽበቱ
ኮምፒውተሩን አብራ ፥ ብሎ መጎትጎቱ
በይነ መረቡ ላይ...
የተገላለጠ.... ምስልሽ መነዛቱ
ምን ያደርግልኛል ???

እዚህ ጋ እንድትነካኝ ....
ከመቼውም በላይ
ከመጓጓት አልፎ ፥ ግለትህ ናፍቆኛል
እስከግዜው ድረስ ...
በምስለ ቅጂው ላይ ፥ ጅስምህ ይታየኛል
ከሰው የሸሸኩት
ያንተ ብቻም ስጋ
ላንተው ተጠብቆ ፥ አምሮበት ይገኛል ።

አየኸው....

ብሎ መሸናገል
በገዛ ጣቶችሽ ፥ እያመላከትሽኝ ስሜቴን ማባበል
ደብሎ እንደ ሌጣ ፥ለብቻ መታገል
ካንቺ ጋ ፋፍሞ ፥ ተናጠል መፈንገል
ምን ያደርግልኛል ???

✍ አብርሀም_ተክሉ ( መርዕድ )

@Abrham_teklu
@Abrham_teklu
@Getamiyan
@getamiyan

[ሔለን ወንድሙ]
✍@Helen_wd

ከእናት ሆድ አልቅሶ ፤ በእልልታ ሲወጣ
ምድርን ሲቀላቀል የዚህን ዐለም ጣጣ

ለመኖር ሲዋጅር ትንፋሽ ለማቆየት
አንዴ ራሱን ሸጦ ምድርን ሊኖርባት
አፈር ለሚገባው አፈር መስሎ ሲቀር
ለእፎይታ ሲዳክር ለመሞት የሚኖር
100ም ሆነ 50 : የእድሜ አሀዝ ቆጥሮ
እፎይ ሳይል ላንዴ እየኖረ ግሮ
ነፍሱ በዚያ ስታልፍ......
ዋይ!! ይባልለታል አልቅሶ እንዳልወጣ
ስለምን ተወለድኩ ብሎ እንዳልመጣ
:::::::
ዋይ! ከንቱዋ አለም ማን ይሆን ዘላቂ
ለሞት አየኖርን ሆንን አላዋቂ፡፡

✍@Helen_wd

@Getamiyan
@getamiyan

እንግዲህ ይግረምሽ ፥ አይቀርም ማለቁ
ለዚህ ነበር ድሮም ፥ ጉሮሮሽ መድረቁ
ጥሬ ቆርጥሞ አደር....
ሲተልም ለሩቁ
ሲቆርጥ ቆራጥ ነው...ጦብያዊ ለሀቁ ።

✍ አብርሀም ተክሉ ( መርዕድ)

@Abrham_teklu

( በላይ በቀለ ወያ )
.
"በኔ መንገድ ካልሔድክ
መንገድህ ገደል ነው" ፣ ማለት የሚከጅል
"እንደኔ ካላሰብክ
ማሰብ አትችልም" ፣ ሊል የሚዳዳው ጅል
በህይወት መንገድ ላይ...
እንደራሴ ስጓዝ ፣ ነፍሴ ምትሞግተው
ስንት ገደል አለ
"ድልድይህ ነኝ" የሚል ፣ መሻገር ሲያቅተው፡፡

@Getamiyan
@getamiyan

"ደግ አይበረክትም"
፡
፡
©(አበባው መላኩ)
፡
እስከ:ማዕዜኑ
..እስከ፡ማዕዜኑ
አነብር:ውስተ:ልብየ:ትካዘ
ዐሊውየ:ሕገ:ወትዕዛዘ:
ማርያም:ኩነኒ:መናዝዘ።
አቤል: በፀጋ : ርቆ ፣
በየዋህነት:ከመጠቀበት ፣
ቃዬል:በንፍገት:ከብሮ ፣
መቀመቅ:ከወረደበት፣
የዕጓለ መሕያው: ታሪክ ፣
ሲጀመር : የጠቆረበት .
እንውረድ:ብሎት:ወንድሙን ፣
እስትንፋሱን:የነጠቀበት ፣
ኃዘና ፣ ስምዒ:ወብካያ ፣
ለሃገሪትነ:ኢትዮጵያ ።
የሞት:ታሪክ:ሊዘከር
በአዝማናት:ማሀል:ሊነገር
የመጀመሪያው:መልአክ ፣
ታሪኩን:ሲፅፈው:እንደዚህ:ነበር። ....
ክልዔቱ: አኃው: መንገደ:ቀላይ :ወረዱ፣
እኒህ:ሁለት:ወንድሞች:ወደ:አዘቅት:የሄዱ፣
አንደኛው:ሟች:ሊሆን:ገዳይ:ሊሆን:አንዱ፣
አሃዱ:ተመይጠ፣ ወኢተመይጠ አሃዱ ፣
አንደኛው ሲመለስ
ሁለተኛው እዚያው የቀረ፣
ውረድ እንውረድ ያለው
ወንድሙ ገድሎት ነበረ።
ከዚህ የቀን፡ጎደሎ፡ነው ፣
ከዚህ፡ክህደት፡በኋላ፣
ከተራራው፡አናትና፡
ከግርጌ፡በቆመው፡ማሀል፡
መተማመኑ፡የላላ።
የአዳም፡የልጅ፡ልጅ፡ሁሉ
፡ምን፡ቢጀግን፡ምን፡ ቢያቅራራ፣
ምን፡ደግ፡ንግርት፡ቢያስነግር ፣
ምን፡ በማዕረግ፡ቢጠራ ፣
ይገሉኝ፡ይሆን፡እያለ፡ነው ፣
ውረድ፡ሲሉት፡ የሚፈራ ።
እናም፡መውረድ፡ሞቱ፡ነው፡
አንዴ፡ደርቡን፡ ከወጣ ፣
ውረድ፡ሲባል፡በመውረዱ፡ነው ፣
ወንድሙ፡ ሕይወቱን፡ያጣ።
በርግጥ፡ለምን፡ይወርዳል፡
መውረድስ፡ማንን፡ ጠቀመ ?
የወረደውን፡መግደሉ፡ለዘላለሙ፡ካልቆመ !


@getamiyan
@getamiyan
@getamiyan

የሁለት ዓለም ስካር ❖
ምነዋ እቴዋ . . .
ደካማ ገበሬ እንዳቆመው ክምር
ካሉበት ተነስቶ ከራስ ላይ መቀነስ፣
'ያልጠበቁት ደስታን' እጨብጠው ብሎ
ደርሶ ተቀላቅሎ እያደሩ ማነስ፤?
አየር ጋር መነስነስ . . .
መኩነስነስ . . .መዳነስ . . .!
ምነዋ . . .ምነዋ. . .?!
ትከርሚ ይመስል፥ትቀሪ ይመስል
እላይ ላይ መታየት፣
ገለባ ገላሽን . . .!
አንድ የክብሪት እሳት . . .
ጫፍሽን ቢነካው ወድቆ ለመጋየት።
ምነዋ . . .?ምነዋ ተቻኮልሽ?!
ለመጉደል ተቻኩለሽ . . .
ረሳሽው ደብሩን፥ዘነጋሽ አድባሩን
አንቺው አንቺን ስትዪ . . .
ችላ አልሽው ነገሩን?
በያንዳንዱ ሰው ውስጥ
ንቁ የ'ብደት ጽዋ . . .!
በስውር መኖሩን፤!
እንደምን አጠፋሽ . . .
የፍጥረት ምሥጢሩን
የምሥጢር አገሩን?!
-
ይኼው . . .
ይኼው የኔው ነቃ . . .!!
አገረሸ ወጣ ጀመረኝ ወፈፍታው፣
ብቅ ቀረብ አለ የመንፈስ እፍታው፤
የስካር ከፍታው . . .!!
ፉት አለው ጨለጠው ልቤ ማእበሉን
ሞገደ መጠጡን፣
ንፋሱን ዳቦ አርጎ በላው ሰውነቴ
ያዘ መነጥነጡን . . .!!
አዎ . . .
አዎ ባይጎላብኝ እኔም ዛር አለብኝ።
አለብኝ ክፉ ዛር . . .
የሚያንዘረዝረኝ
የሚያቀነዝረኝ
የሚመነዝረኝ . . .!!!
ካመድ ብንንን አድርጎ ጉም የሚሰውረኝ፤
የቃል ቅኔ ድንጋይ የሚያስወረውረኝ።
አለብኝ ክፉ ዛር . . .!
አፌን ከፈትኩ በቃ ምድር ታነውረኝ።
-
ሰማይ ተሰንጥቆ ቢያወርደውም ዶፉን፣
አያጨቀየውም የሕይወት ደጅ ደፉን።
አንድ እውነት አለ . . .!
ይኸውም፦የሴት ኩራት
የወጣት ዝሙት
የመንግሥት ትእቢት
ቢታጠብ አይጠራም፤አይጠፋም፤አይቀርም፤
ሰው ለትልቅ ጉዳይ ዓለም ላይ አይኖርም!!!
በቃሉ ሙሉ
(ዘባህር ዳር)

@getamiyan
@getamiyan
@getamiyan

የኔ ዘመን

አቅሙ የተረታ መተንፈስም የደከመው
በጅምር የቀረ ሀሳብ የገደለው
አስቦ እያደረ አስቦ ሚውለው
የዘመኑ ልጅ ነኝ ዘመኔ ይሄ ነው

ያለሁበት ዘመን የቆምኩበት ቦታ
ወጣት የሱሥ ጣት ነው አቅሙ የተረታ
ወጣት የነብር ጣት ለዘመኔ አይሰራም
ስሙን ብንሰጠውም ተግባሩ አይስማማም

የኔ ዘመን ማለት.........
በብርጭቆ መሃል እራሱን ሚፈልግ
በመጠጡ መሀል ወደ ሠማይ እ'ሚያርግ
አየር ላይ ሚንሳፈፍ ድፍረት የተሞላው
ከብዙ መሀከል አብዛኛዉ እንዲ ነው

በየጥጋጥጉ በስርቻው መሀል
በጫት ተከልሎ ወገን ይታየኛል
ምክንያት እየሰጠሁ ምክንያት እየነፈኩ
ሀሣቤን ሣልዘጋ ሌላ ሃሳብ ከፈትኩ
መንፈሴን ሰብስቤ ባይኔ ስመለከት ካለሁበት ማዶ
ወዲያው ተመለከትኩ አፍላና ምስኪኑ ወጣቱ ተማግዶ

ደግሞ ተሻገርኩኝ.........
ያሠብኩትን ሀሣብ ደግሜ ሳልዘጋ
ከሀሳቤ ሙግት ብቻዬን ላወጋ
አውጥቼ ላወርደው አውርጄ ላወጣው
የኔ ዘመን ትውልዶቼ.......
በጭሱ መሀከል በክብ ተቀምጠዋል
ዛሬም እንደትላት ሊውሉ አስበዋል

የቀን መፈራረቅ ቁብ አልሰጣቸውም
መንጋቱ መምሸቱ አልታወሳቸውም
ቀን ማለት ለነሱ መንጋቱ መምሸቱ
ተፈጥሮ ብቻ ነው ይሄ ነው እውነቱ
የዕድሜዬ ባለጋራ እኩዮቼ ናቸው
በተስፋ መቁረጥ ውስጥ ተቀምጠው ሣያቸው
የቀረኝ የምለው የኔ ትንሽ ተስፋ
ከሀሳቤ መሀል ከመቅፅበት ጠፋ

ጉልበታቸው ሰንፎ በጣም ደካክመዋል
የተነጠቁትን ያጡትንም ተስፋ ፍለጋ ይዘዋል
ከሀሳቤ መሀል አንድ ሃሣብ ተነሣ
ረቂቁ ተስፋ ፈንቅሎ ሲነሣ

ረቂቁ ተስፋ ከጫቶቹ መሀል
ረቂቁ ተስፋ ከመጠጡ መሀል
ረቂቁ ተስፋ ከክለቡ መሀል
ረቂቁ ተስፋ ከስካሩ መሀል

ምክንያት እየሰጠሁ ምክንያት እየነፈኩ
ሐሳቤን ሣልዘጋ ሌላ ሀሳብ ከፈትኩ
ከመቼ ወዲህ ነው ......
ረቂቁ ተስፋ ከጫት የሚገኘው
ረቂቁ ተስፋ ክለብ ጭፈራ ቤት መቼ ነው የታየው
ረቂቁን ተስፋ መጠጥ የከለለው
ረቂቁን ተስፋ ስካር የሸፈነው
ሽፋኑ ተገልጦ መቼ ነው ምናየው

ያልታደለው ትውልድ በሚያምረው ገፅታ
በጫት በመጠጡ በጭስ የተረታ
ኑሮ ሲያስቸግረው ችግር ሲፈትነው
የታሰረበት ውል አልፈታም ሲለው
መፍትሄ ፍለጋ ወደ ሱስ ያመራል
አልችልም በማለት ህልሙን ያጨልማል
የሱሱ መገኛው ጓደኛው ይሆናል

ዞርኩኝ ተመለከትኩ እጅ ሰጥቶአል ወኔ
ወጣት ተሸንፎ ስምም ተሰጥቶታል የሚባል ወመኔ

የኔ ዘመን ትውልድ.....
ፊቱና ገፅታው ጭራሽ አልተከፋም
የሚያምረው ብርሀን ዛሬም ላይ አለጠፋም
ነገር ግን ነገር ግን......
ፊቱ ላይ ሚታየው ያልጠፋው ብርሀን
የውሸት ማስመሠል ነው
የውስጡን ቃጠሎ ሀቁን ደብቆ ነው

የተስፋ ማጣቱን
የምሬት እንባውን
የሠለቸው ኑሮን
የታረዘ ነብሱን
ቀን ከሌት ሚባክን
የታፈነ ድምፁን
ሀሉንም ሸፋፍኖት ደብቆ ነው እንጂ
ከጫት ከሲጋራው በድንገት ነበረ የሆነው ወዳጂ

ቤተልሄም ሰለሞን

@Getamiyan
@getamiyan

#አባይ !
(ሚካኤል አስጨናቂ)
።።።።።።።
#ምድራዊ ወተት ፥ የኤዴን ደምግባት
የኢትዮጵያ ካስማ ፥:የፍጥረታት በዓት
የሀገር ንጥር ቅቤ ፥ የሚያወዛ ቅባት
የቁጭት ማረፊያ
የህብር ማሳያ
ለምን መፍሰስ ብቻ ፥ ክንፍ አውጥቶ መብረር?
ተግ ብለህ ላፍታ አንዴ እንማከር
ብለንህ አልነበር ?
ይኸው ሰምተኸናል.. .
ጆሮውን አውሰህ ፥ ከጉዞህ ታቅበህ
የእናትህ ምልጃ ፥ ልመናዋን ሰምተህ ..
ንሳ እንካ መልዕክት!
የወላጅ ተማፅኖ.. .
ባዕድ ቤት አትክረም ፥ ዳሳችን ደምኖ
አረፍ ብለህ ስራ.. .
የጎጆዋችን ፀሊም ፥ ተገፎልን ይብራ።
እንካ እውነት ንሳ.. ..
ጠቦት በጓን እረድ.. . ስለ ቤትህ ካሳ
እኛም በደልህን ...
እንደ አምናው ሁሉ ፥ ዘንድሮም አናውሳ ።
ይሽከርከር ሞተሩ.. .
ይዘምር ሀገሩ ...
ተነቅሎ ይቀንጭር ፥ የድህነት ስሩ ።
ተንጣለል በሜዳህ ፥ ተዘርግተህ ክረም
ተኮትኩቶ ይክሰም ፥ ያለመቻል አረም ።
በል እንዲያ በል እንዲያ...
አብረን እንበል እስክስ ፥ እንደልቅ ዳንኪራ
እንደ ሀገርህ እንቅጥቅጥ ፥ የጎዣም ጭፈራ
እስክስ በል ደክር ፥ ወንድ ሆነህ አቅራራ
ሀሞትህ ይጋጋል ፥ በበላይ ፉክራ ።
በል እንዲያ ... በል እንዲያ
ዝናር አደግድገህ ፥ ውጣ ከገበያ
በቅጥር መንደሩ...
ያለ አንዳች ከልካይ ፥ በጎፈሬህ ክርክም ተንጎማለልበት
ማማር ሀገር ላይ ነው ፥ አይደለም በስደት።

@getamiyan
@getamiyan
@getamiyan

...... #አንጣር ~~ #ባንጣር ....

ሜሮን ተቀብቶ
በትረ ሰለሞኑን ፥ በደም ለታደለ
በትውልዶች መሀል .... የተንከባለለ
አልጋ ወራሽ እና ፥ አልጋ አፍራሽ ልጅ አለ ።
የተገናኙለት.... እነኝህ ሁለቱ
ሁሌም ጦርነት ነው ...ሁሌም አተካራ
ማር ከሬት ያመራል ...
ከደጋፊ ውጪ ...ለሚሰየም ጭፍራ ።
በተንቆጠቆጠው
በወርቁ ድንክ አልጋ
በዘመነ ዙፋን...
ቤተ-ንጉስ ጣራ
በስተስር ላደረ ፥ ብቻ የሚበራ
ልክነት ቦታ እንጂ ፥ ስልጣን እና ተራ
ፍፁም እውነት የለም !!!
ፍፁም ድንቅ ስራ !!!
ወራጅ ነው ህፀፁ ...በቀን የሚጠራ ።

✍ አብርሀም_ተክሉ ( መርዕድ )

@Abrham_teklu
@Abrham_teklu
@getamiyan

(በላይ በቀለ ወያ) በበእውቄ ስታይል
.
.
ስሚ!
እኔ በዚህ ሀገር ፤ብዙ ብሰቃይም
በወዲህ ዘረኛ ፣ በወዲህ ኮሮና ፣ በወዲያ መሀይም
ዱላ ድንጋይ ክላሽ ፣ ሜንጫ የፈላ ውሃ ፣ ከበውኝ ብታይም
ዘጠኝ ሞት በሬ ላይ ፣ ሲያኳኳ ቢገኝም
ለትውልድ የሚተርፍ ፣ መፅሐፍ ሳላሳትም
አንዱን ግባ ብዬ ፣ ለሞት በር አልከፍትም
አልሞትም
።።።።
ስሚ
ወደ ሳቅ ሳልለውጥ ፣ የምስኪኑን እንባ
እንደዶክተር አብይ ፣ ግራ ሳላጋባ
ለጨለመበት ህዝብ ፣ ብርሐን ሳላነጥፍ
ስቄ ሚያሳይ ፎቶ ፣ ፌስቡክ ላይ ሳለጥፍ😂
ሚለብሰው ላጣ ህዝብ ፣ ሳላለብስ ፀጋ
ከኋላ ሺህ ገዳይ ፣ ከፊቴ ሺህ መንጋ
ደብድቦ ቀጥቅጦ ፣ ሰቅሎ ቢጥለኝም
አፈር ልሼ እንደ እባብ
እነሳለሁ እንጂ ፣ አፈር አይበላኝም
አልሞትም!
።።።
ስሚ
ህንፃ በህንፃ ላይ ፣ ገንብቼ ሳልከምር
ፖለቲከኞች ጋር ፣ ቁማሬን ሳልቆምር
ያባይ ግድብ ሞልቶ ፣ አምፖሌን ሳልቀጥል
በአሜሪካን ላይ ፣ ማእቀቤን ሳልጥል
ወደብ ሳላስመልስ ፣ ገንጣይ ሳልገነጥል
ያሳደደኝ ሁሉ ፣ አይቶኝ ሳይፈረጥጥ
ሀያላን ላይ ሳልዝት ፣ ግብፅን ሳልቆነጥጥ
ለምስኪኖች ሳልቆም ፣ ለደሀው ሳልወግን
ቢራ ውድ ሆኖብኝ
ጉበት ጨጓራዬ ፣ በአረቄ ቢበግን
አልሞትም እኔ ግን
።።።
ስሚ
ፎቶ ባሳጥብም ፣ ልብሴን አቆሽሼ
ግዙፍ ነኝ በሚል ፊት ፣ ብታይም አንሼ
ሀገር እንደ ሀገር ፣
አንድ ሆና እንድትቀጥል ፣ አቅለ ቢስ መስዬ
እልፍ አእላፍ ጎልያድን ፣ በአንዲት ጠጠር ጥዬ
ልኩን ሳላሳውቅ ፣አቅሜን ሳላስቃኘው
ያልታወቀ ኋይል
የሚሉትን አካል ፣ በአካል ሳላገኘው
አጣኋትኝ ብዬ ፣ ብትገድዪኝ አልሞትም
እኖራለሁ በቃ
ካንቺ ተለይቶ ፣ መኖር ቢያዳግትም
አልሞትም

@getamiyan

የወ.ዘ.ተ. ግጥም
(ልዑል ሀይሌ)

የዓይነቶች ዝርዝር
የቀለማት ዝርዝር
የኹነቶች ዝርዝር
ገልጠው!
ገልጠው!
ገልጠው!
እስከመጨረሻ መዝለቅ ሲያቅታቸው፤
ይኸው ታዘቢልኝ!
ወ.ዘ.ተ. ሚለው ነው
ላላወቁት ዕውቀት ከሰው ማምለጫቸው።
.
ይኸው ታዘቢልኝ!
ያፍቃሪ ውዳሴ መች ዘመን ይዘልቃል፤
ትዳር ላይ ይረሳል
ወ.ዘ.ተ. በሚለው በሰነፍ ሰዎች ቃል።
.
እኔም በስንፍና
በዳተኝነቴ ፍቅርን ከማረክሰው፤
ዕድሜዬን 'ገልጣለሁ
የልቤን ውዳሴ ዘመን ማይጨርሰው።
.
ይኸው ታዘቢልኝ!
የጥበብ ሰው ሁሉ
ቀለሙን በጥብጦ ቃል እያሰመረ፤
ሊገልጥሽ ይጥራል
የራሱን ስንፍና ባንቺ እያኖረ።
.
እውነታው እንዲህ ነው...
ወ.ዘ.ተ.
በሚሉት በመቀጠያ ቃል፤
ሊገልጥሽ ሚደክም
ደራሲው ገጣሚው ስላንቺ ምን ያውቃል?፤
.
ሰዓሊው
ወ.ዘ.ተ. 'ሚል ስዕል ሸራ ላይም ሳለ፤
ልፋ ቢለው እንጂ
ከቀለማት መሃል ያንቺ እውነት የታለ?፤
.
እኔንም ታዘቢኝ!
ወ.ዘ.ተ.
የሚል ቃል ምን 'ካፌ ባይወጣ፤
ዘርዝሬ ያልጨረስኩት
ብዙ እውነት አለኝ
ዘመናት ታገሺኝ ከልቤ እስኪወጣ።
.
ነዳጅ ነው ወይ?!
እህእ!
፲፩-፪-፪፳፻፰፩ ዓ.ም.

@getaniyan
@getamiyan
@getamiyan

ሙሾ ላመለጠ ወጣትነት
-------------------------------
ሳይደምን ይዘንባል
ይዶፋል
ከደጃፌ ግርጌ፥ የሕይወት ጎርፍ ያልፋል፤

የክንፌ ርጋፊ
አንድ የላባ ነዶ
ያካሌ ቅራፊ
የቀረ ተጎርዶ
ተጠርጎ ሲወሰድ ፥ በጥሞና እያየሁ
ይሄው ቁጭ ብያለሁ፤

ሲጋልብ በፊቴ፥ ይህ የውሃ ሰጋር
ጀምበሬን አየኋት
ተጥርጋ ስትሄድ፥ ከሰርዲን ጣሳ ጋር

የልጅነት ቅርሴ
ድዴ ያባረራት፥ ያች የወተት ጥርሴ
ካሮጌ ቆርኪ ጋር፥ አብራ ተቀላቅላ
ባረፋ ተከባ፥ በጎርፍ ጀርባ ታዝላ
ስትሄድ እያየሁ
ይሄው ቁጭ ብያለሁ፤

የመጀመሪያዋ፥ የጉንጬ ላይ ቡግር
የመጨረሻዋ የራሴ ላይ ጠጉር
ከሳር ከትቢያው ጋር፥ እንደተቃቀፉ
በጎርፉ ጀርባ ላይ፥ እንደተንሳፈፉ
እንደዋዛ ሲያልፉ
በጥሞና እያየሁ
ይሄው ቁጭ ብያለሁ።
------------------------------

✍ በዕውቀቱ ስዩም

@getamiyan
@getamiyan