tgoop.com/ghad1984/1658
Last Update:
[[💔رسالة:إعتذار وشوق للغائب الحاضر💔]]
[[في ليلة الجمعه السلام عليك حيثما كنت]]
☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆
مو چنهه صارت غيبتك طويله
كل جمعه اليحبك يفز دليله
ندري إحنه المأخرينك .... يالمهدي فدوه لعينك
لكن يمهدي لخاطر العقيله
لكن يمهدي لخاطر العقيله
☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆
اسأل عليك بكل كتر ... محد جواب انطاني
محد يجاوبني بخبر ... لا قاصي ولا داني
يبن الاطائب في طوى ...أم هل مكانك ثاني
لو طيبه لو برض الغري .. لو بالطفوف تعاني
مدري تواسي زينب الوحيده
على إخيها المنگطع وريده
وتگلك إمحشمينك .... يالمهدي فدوه لعينك
يمتى يعمه تعدل النه الميله
مو چنها صارت غيبتك طويله
☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆
يالمهدي غلطان اعترف .... وما انكر انه ذنوبي
بس يشهد الله والنبي ... مشتاق يا محبوبي
خلصني فدوه لشوفتك .. طهر لي روحي وثوبي
وبدربك انه ارد التحق ..... خلصني من دروبي
آنه الذي ما تنذكر عيوبه
وبس الله يعلمها عدد ذنوبه
بذنوبنا متعبينك ......يا المهدي فدوه لعينك
انت الامل يالمهدي و الوسيله
مو چنهه صارت غيبتك طويله
☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆
صعبه اشوفن هالخلگ .... متجمعه و فرحانه
وانت ولا حس لا خبر .... يا وسفه يا مولانه
ارحم دليلي بغيبتك ..... و رويحتي الولهانه
راح ابقى ادعي بالفرج ... لحد ما اشوفك آنه
تعبنه یالمهدي حچي الملامه
يالغالي يمتى ترجع بسلامه
ونشوف نور إجبينك .... يالمهدي فدوه لعينك
يبن الاطائب والمجد سليله
مو چنهه صارت غيبتك طويله
☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆
يا ايها المهدي الذي ...... عالي مقامه وقدره
من عندك نريد العذر ...... نمشي عليك الزهره
والله ما نستاهلك ....... يبن آلآيات الكبرى
بس انت ابن المصطفى .. تصدق علينا بنظره
يبن النبي المصطفى و حبيبه
وابن الزچيه الطاهره النجيبه
كل جمعه نندب وينك ..... يا المهدي فدوه لعينك
گلي شوكت يشفى المحب غليله
مو چنهه صارت غيبتك طويله
☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆
يبن النجوم الطالعه ..... ويبن المقام العالي
عيني لغيابك دامعه ..... ذاب بحزن دلالي
اقرا الزياره الجامعه ... واهديها لك يا الغالي
ورب السماء السابعه ... بس هو يدري بحالي
وادعي الهي عجل بظهوره
ويا ربي نور كربله بحضوره
واتفرح امحبينك .... يا المهدي فدوه لعينك
وتشافي كل روح الصفت عليله
مو چنهه صارت غيبتك طويله
☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆
يالمهدي طالت غيبتك .......... وعداكم يعيرونه
لكن يغالي وداعتك ............. ما گدرو يغيرونه
بعين البصائر شيعتك ......... يومك إجه يشوفونه
من الكعبه تنطر صيحتك .... وذاك النده يجيبونه
خلي النواصب ترتعد بالصيحه
ونادم يظل الماخذه النصيحه
وتأدب امچذبينك ..... يالمهدي فدوه لعينك
وترد شكو طاغي وصنم تزيله
مو چنهه صارت غيبتك طويله
☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆
✨️ ثواب هذه القصيدة✨️
الى روح السيدة الطاهرة العظيمة✨️ (نرجس)✨️
أم الأمام الحجة المهدي(عج)
🤲مع الفاتحه والصلوات🤲
[جهاد البصيراوي]
BY الشاعر جهاد البصيراوي
Share with your friend now:
tgoop.com/ghad1984/1658