ШОИР ДЎСТИМГА ҲАСРАТ

Биз ғалати авлод бўлдик, жиндай шоирроқ,
Қалбимиздан туйғуларни қолдик чегириб,
Аросатда қолиб кетди бизни севганлар,
Биз севганлар кетди биздан юзин ўгириб.

Бўлсин дедик шаънимизни шонларга тўлиқ,
Гард юқмасин дея унинг ғамини едик.
Бойвучча қиз жандалардан ор қилган каби:
«Ишқ дегани бизнинг шаънга ярашмас дедик.»

На қалб билан кенгашдик биз, на ақл билан,
Икки ўтнинг аросида юрдик саросар.
Бир ҳайдалган остонага одам қайтмайди,
Ишқ қайтарми энди бизнинг қалбга, биродар?

Бекор бўлди туйғуларни қийнаганимиз,
Билдик бизлар ғамни эмас, ғaм бизни чеккан.
Дунё бизни олма янглиғ отиб ўйнади.
Биз кеч билдик: шоирлик бу ошиқлик экан!

Шоирмиз деб яшамабмиз шоирга ўхшаб,
Ишқдан боллар йиғмабмиз ҳам биз боларидек.
Турибмиз биз даврнинг энг мансуб одами,
Ва давлатнинг энг фидоий аскарларидек.

Орзу эди менга Машраб осилган дорлар,
Бор борлиғим билан бугун исёнга ётман.
Олдга қадам ташлай десам оёқларим йўқ,
Мен қўрқаман дўстим, ахир тараққиётдан!

Жасоратдир бу замонда шеър ёзмоқ балки.
Балки шондир гап бошламоқ ишқ сурасидан,
Мен англамоқ истайдирман моҳиятим не?,
Чиқиб кетсам дейман баъзан ер куррасидан!

Йигирманчи аср, менинг қалбим қаерда,
Дўстим, нега оқибатнинг меваси тахир?

Биз асрнинг фожеаси эмасмизми, айт,
Аср бизнинг фожеамиз эмасми ахир?

Қалбимизни асраб келдик боламиз каби,
Бўлмасин деб, уни риёларга ҳамхона.
Биз ўшамиз: боласини бағрига босиб,
Асрай-асрай боласини ўлдирган она !!!

Биз қалбига аза очган авлодмиз, дўстим...

2000 йил

@Guljamol_Asqarova

Очарование осени
https://youtube.com/watch?v=8xY2vqByZWs&si=79WIlu3Dixuu87tI

Муборак бўлсин

Кўзлари порлаган эй азиз синглим,
Ёрнинг бағирлари муборак бўлсин.
Кузнинг қуёшидек ёп-ёруғ кўнглим-
Бахтнинг баҳрлари муборак бўлсин.

Ёмғирлар шивири - ҳеч тинмас зорим,
Бу йўқликлар аро эй йўғу борим,
Менинг дийдоримдан бенасиб ёрим-
Дарднинг оғирлари муборак бўлсин.

Ёмғир томчилари тушди юзимга,
Хазонлар бир ҳазин боқди кўзимга,
Кўнгилга борар йўл топдим, ўзимга-
Йўлнинг чағирлари муборак бўлсин.

Эй олий Мусаввир, эй олий  Ҳилқат,
Раҳмат ёмғирлари учун минг раҳмат,
Қақраган қалбимга ишқ берди беҳад-
Кузнинг ёмғирлари муборак бўлсин!

17.09.2024 йил

@Guljamol_Asqarova

Муқимиёна

Бир ишқ кечди, руҳинг янглиғ афсунгар,
Табассумим каби тоза, самимий.
Сенинг севмай қўйганингдек муқаррар,
Менинг севиб қолганимдек табиий.

Бир тоғ эдим, сенга қирдек туюлдим,
Кўзларингга қўрғошиндек қуйилдим,
Ва олмадек буғзимдан жим сўйилдим,
Товонидан сўйилгандек Насимий.

Ишқ риштаси жодир  одам наслида,
Сенга ёмон боғландим ишқ фаслида,
Менинг бобом бўлса керак аслида,
"Ҳар ердаким умид этган Муқимий".*

Кетди оҳор - ўчди чеҳрам ранги, ёр,
Сенда эса яшил ишқнинг жанги, ёр,
Тушунаман: келганида янги ёр -
"Ёд этилмас қадрдонлар қадимий."*

Авзойи кўп бузуқ экан бу чархнинг,
Бозорлари кўтармади ҳеч нархни,
Кел, жаннатга айлантир шу дўзахни,
"Эй истиғно фирдавсининг насими"*.


***Муқимийнинг "Ёдимга тушди" ғазалидаги сатрларига ишора.


17.09.2024 йил

@Guljamol_Asqarova

ГУЛНОЗ! ❤🙏

Сени туғилган кунингда доим нима деб табриклашни билардим, бугун билмаяпман.

Бағримга босиб "Муборак бўсин, соғ бўл. Кечир... "  дегим келяпти холос.

Чунки, шу қадар ҳарирлик борки руҳингда, капалак ҳайрон бўларлик, шу қадар  наъра ва ўкирик борки ичингда, она арслон тугул, ота арслон ҳам жим қоларлик...

Мен 30 йилки кўриб, лекин ҳеч қачон артиб қўйолмаганим кўз ёш бор кўзингда,   малҳам қўя олмаганим бир яра бор қалбингда...

😉Дил берганим баъзи қадрлилар айтишича, мен одамни тушунолмасканман.Ростданам  чуқур қайғукаш эмасман, шекилли. Кечир. 🤗🙏😔🫢

Аслида сенга юрагим уйғунлиги, қайғуларинг илдизи руҳимга туташлиги учун ҳам қаршингда жим ва ожизман. Зиддиятни қараки, давраларингда шўху хандон, яқинларинг ҳузурида доим ҳузурлиман.

🙏Ҳа, катта қизлар бўб қолдик. Зато, энди яшаш тажрибамиз бор.(Шу ўринда болалигимда батинкамни ипини боғлашни ўрганганимда хурсанд бўлганимни эсладим😔🤗)

Энди ўз юрагимизни ўзимиз, ҳа фақат ўзимиз кўтариб юра оламиз.(Сени билмадиму, мен ҳамдарду ҳамроҳларга эҳтиёжсиз бўб қолдим)...

🙏❤Хуллас, табрикламоқчиман. Тақдир ёзувлари, ким ким учун яралгани каби баҳсли мавзуларни бир четга суриб айтоламанки, Сени биз учун, мен учун Яратган.
Дўст, жигар, қалбдош қилиб яратган Худойимга раҳмат, шукр! 🙏❤

❤🤗Қара, Худо ташқари бахтнинг ҳамма шаклларини жо қилган тақдирингга. Оналик, бувилик мақоми,  тўрт кўз тугаллик, улкан шоирлик юраги, атрофингда ҳаёт барқ уриб тургани...❤🙏(Ичкари бахт бўйича фалсафа сўқишга ақлим етмайди,узр)😄

Бахтимга соғ бўл, Гулнозжон❤🙏
Яна 46 йил табриклаб юраманов, бу кетишда😉😄❤🙏

🤗Мажлисда ўтириб ёзяпман. Ҳам кулгим келяпти, ҳам буғзим ачишиб, кетяпти...😔
Ўзинг ёзганингдек:  Асли йиғлаш керак, сен эса, ўзни тутолмайсан кулгудан😔🤗

😉Қисқаси, ўзинг айтмоқчи, "шеър ёзадиган прокурор"чилик буёғи😄🫢😉

Соғ саломат бўл, Гулнозжон🙏❤

Гулжамолинг❤🙏

18.09.20224 йил

@Guljamol_Asqarova

👆Guljamol opa,sizda aruziy ohang saqlanib qolgan.Siz bahtli shoirasiz ,so'zni o'ylabmas balki o'ynatib yozasiz.🙏🙏🙏🙏🙏🙏🙏🙏🙏🙏

https://www.tgoop.com/qalbic

Муслим Мусаллам❤🙏

Gulnoz Moʻminova

КУНГАБОҚАРЛАР

Қуёш табассумли дугонам,
Сен юрган йўлларда очилади кунгабоқарлар
Чағир тошлар қувватлайди қадамларингни
Жавоб берармисан, сўрасам савол...
Фўруғ* нега борди моховлар орасига?
Эмили* не учун узлат тобутига тушди тириклай?
Нега Альфонсина* қўнғир кафанининг этагига
Долғалардан тикди бурмалар?
Айт менга, Гулжамол!
Дунёга сиғмаган бошин Сильвия*
Газ печига сиғдирди қандай?
Касалхона деразасидан термилган Ҳалина*
Севмоқни қандай уддалади?
Нималар ҳақида ўйлади
Худкушлик олдидан ўғлига
Кечлик ҳозирлаган Марина?*
Дидем* қандай кашта тикди нолаларидан?

Майли, саволларни очиқ қолдирамиз...
Яхшиси, ҳеч қачон инсон олдида
Отилмасликка қасам ичган фарёдларимизни
Жойлаймиз бир қора қутига.
Кейин кодлаб қўйилган қутини
Олис юлдузларга томон йўллаймиз
Токи милярд йиллар кезиб юрсин
Эврилиб коинот чорловига...
Токи камроқ фарёд чексин Ер аёллари...

Ишон, ҳали рақамланмаган
Сайёраларнинг қудратли мавжудотлари-да
Бизнинг Пандорани очолмаслар
Зеро, калит сўзни Фўруғ, сен ва мен биламиз:
(“Хонэ сиёҳ аст”)

Қуёш табассумли дугонам,
Ўлсам, мозоримга
Кунгабоқарлар билан кел.

*Фўруғ Фаррухзод
*Эмили Дикинсон
*Альфонсина Сторни
*Сильвия Плат
*Ҳалина Посвятовска
*Марина Цветаева
*Дидем Мадак

ШОИРА БИБИСОРА ТУРОБОВАНИ
ЭСЛАЙМИЗ

Халқимизнинг яхши шоираларидан бири, атоқли шоира Зулфия опанинг шогирди Бибисора Туробова 2024 йил 15-сентябрда (1446 йил Робиъул-аввал ойининг 12-кечаси), якшанба куни 72 ёшида дунёдан ўтди. Шоира опамиз икки бемор ўғли билан Дўрмон Ёзувчилар ижод уйининг 19-далаҳовлисида яшаб турган эди.

Бибисора Туробова 1952 йил 1-сентябрда Самарқанд (ҳозирги Навоий) вилояти, Ҳатирчи туманида туғилган. Ўрта мактабдан кейин Мактабгача таълим техникумида ўқиб, сўнг Самарқанд давлат педагогика институтида таълим олган. 1990 йилларда Ўзбекистон Ёзувчилар уюшмасига аъзо бўлган.

Баъзи башарий сабаблар билан вилоятдаги уй-жойи, мол-дунёсидан жудо бўлиб, икки ўғли билан Тошкентга келиб, ижараларда яшаб юрди. Кейин Дўрмон ижод уйидан қўним топди. Дўрмондан бошқа ёққа кўчишни асло истамас эди. Чунки ҳаётининг мазмуни ижодкорлар билан бирга бўлишда эди.

Шоиранинг ўнга яқин шеърий китоблари нашр этилган. Лекин сўнгги ижод намуналари бўлмиш “Келин салом” (“Муҳаррир” нашриёти, Тошкент, 2020 йил), “Мен излаган қувонч” (“Адабиёт” нашриёти, Тошкент, 2021 йил) кўпроқ эътибор қозонди. Бу китобларни камина бир оз машаққат билан нашрга тайёрлаган эдим.

Бибисора Туробова истеъдодли шоираларимиздан Ҳалима Худойбердева, Фароғат Камол ёки Қутлибека сингари катта миллий ғоялар билан яшаган эмас эди, лекин ватанпарварлик руҳидаги самимий шеърлари, устози ва дўсти Зулфия опага, отага, онага бағишланган теран битиклари, илоҳий мавзудаги илтижоли нидолари бор эди.

Жуда дуогўй аёл эди. Умрининг охиридаги шеърлари дуо тариқасидаги нидоларга айланди. Унга Дўрмон ижод уйидан макон қилиб берилганида икки нотовон ўғли билан жойлашиб, Ёзувчилар уюшмаси раиси Сирожиддин Саййид, Дўрмон ижод уйи раҳбари Асқар Умматқулов ҳақларига кўп дуолар қилди. Менинг ҳақимга ва оилам аҳли ҳақига ҳам дуо қилар эди. Ҳақ таоло ижобат қилганидан умидворман. Чунки ғариба, бемор, уй-жойсиз, мол-дунёсиз аёл эди.

Халқимизнинг дардкаш шоираси Бибисора Туробова 15-сентябрда пешин арафасида Дўрмон Ёзувчилар ижод уйининг 19-далаҳовлисидан чиқарилди. Жаноза намози пешин вақтида Дўрмон масжидида ўқилди. Сўнг Қибрай туман қабристонида дафн этилди.
Қизлари Самарқанддан ва Туркиядан етиб келишди. Икки бемор ўғли эса нима гап бўлганини унча идрок қилганлари йўқ.

18-сентябрь, чоршанба куни Бибисора опанинг қабрига чиройли гуллар эктирдим. Гул эккан биродарларимиз сўзича, гўрковлар айтибди: “Бу қабр жуда осон қазилди, ҳатто ўзи қазилиб кетаверди, қабр эгаси жуда яхши одам эканми. Бундан икки кун олдин шу ерда бир қабр қазган эдик, ер жуда қаттиқ чиқди, қийналдик. Бу қабр эса жуда енгил қазилди”.

2024 йил 19-сентябрь, пайшанба куни Ёзувчилар уюшмаси ташаббуси билан Дўрмон ижод уйида хайр-худойи қилиниб, Бибисора Туробовани хотирлаш тадбири бўлмоқда.

Аллоҳ таоло Бибисора опамизни раҳматига олсин! Чеккан дардлари, қайғулари, ташвишларини, фарзандларининг бахти, соғлиги борасида тортган изтиробларини Ҳақ таоло билиб-билмай қилган саҳву хатоларига каффорат айласин!

Мирзо Кенжабек
19.09.2024. (1446, 16-робиъул-аввал), пайшанба.

@m_kenjabek

***
Тушин!
Руҳимнинг энг хилватларини,
Куздай маюс сувратларини,
Ёлғон дунё талъатларини
Кўргим келмаяпти, Художон!

Бузилганин китоблар тархи,
Чархлаганин бу чархнинг чархи,
Нимага тенг қадримнинг нархи,
Билгим келмаяпти, Художон!

Парим куйди васлига учиб,
Маюс қолдим шамларим ўчиб,
Ўтирибман тиззамни қучиб,
Тургим келмаяпти, Художон!

Руҳим кўнмас, пандга, даъватга,
Ким чорлади кўҳна равотга,
Дўззахга тушгим йўқ, жаннатга
киргим келмаяпти, Художон!

Жонми, танми, сен ўзинг берган,
Кўкка чорла, эй Олий Мерган,
Ерда яшаб, ўзимни ерга
ургим келмаяпти, Художон!!!


@Guljamol_Asqarova