tgoop.com/haaaaaaaa22222/455
Last Update:
باب اجذوع وطاح .. واسمع بس اصياح
عصره ومحسن راح ..جوه تراب
ما شفت بدنياي .. نار ابيت الماي ..
وحده وهمه اهواي.. وستري الباب
غريبة يروحي .. غريبة يروحي
…………………
انه بت المات توه وربع ابوي اتهد عليه
باب من اجذوع كله وهمه ماگالوا خطيه
همه اكثر من ذنبهم وانه بس الله واديه
باب اجذوع .. فوگ اضلوع
ونايم بين اضلوعي المحسن
طاح الباب .. وايدي احجاب
وبوكت الاذان يأذن
يسمع صوت اذان.. ويعصرني الشيطان
مايتسمه انسان .. لا والله
ام وابني يموت.. وبطن امه التابوت
ماطلّع اي صوت .. لا شفناه
غريبة يروحي .. غريبة يروحي
………………
گبره ما ناشف محمد وربعه حرگو بيت بته
جاي اسبّح لله وادعي وصوت المرافس سمعته
دفعو الباب وحجابي لزمة المصحف لزمته
صار الصار.. ناس ونار
اثلثميه وبس آنه وفضة
بالحيطان .. بس دخان
بيتي امن الدخان اتوضة
صحت لفضه ابساع.. شيليني امن الگاع
والمكسورة اذراع .. بيش اتگوم
مختنگه ام احسين .. وزرگة اجفون العين
اتبدل شكلي اسنين .. بليلة ويوم
غريبة يروحي .. غريبة يروحي
………………..
طايح ابيّر وتجره هيچ اجر النفس گوه
موتت المكسور ضلعه تصير من يمشيله خطوة
آنه من اتوضه اموتن جرح ايدي وعيني بلوة
حيل يريد .. رفع الايد
اشهگ موت بكل تكبيرة
حيلي يذوب .. كل غروب
چني اخيال وآنه ازغيرة
اضعف اضعف حيل .. من عصرات الليل
حتى الليل يعيل .. بالموجوع
بس بَصَمات اقدام .. متروسه الاحلام
واسمع كل ما انام .. طگ اضلوع
غريبة يروحي .. غريبة يروحي
………………
اوگف اعله اعصابي گوه وماوصل عشرين عمري
والوجع بعيوني يطلع و ابتسم بوجوه بزري
ومن يجي احسين اعله حظني يرجع الحيل اعله ظهري
ست اسنين .. عمر احسين
و امه اگباله اتموت بعصرة
صار ايام .. من اينام
يتحلم بس بإسم الزهرة
متخيلته اجروح .. شابگني ومذبوح
ويصيّح مبحوح .. يا زهراء
لازم ادير اگفاي .. امن اشرب يمه الماي
يعطش راح اهواي .. بعاشوراء
غريبه يروحي .. غريبة يروحي
………………..
ايدي متعوده اعله رحه وسبحتي وروس اليتامه
الشوگ كاتل ناسي كلهم و انه ما اگوم بسلامة
همه المتانيني اگومن ناس فقره وچم حمامة
اتريد الناس.. تردلي انفاس
و ياروحي ايامچ معدودة
گطعة صوت .. وباچر موت
ايظل حيدر حيطانه تگودة
باچر دمع اغياب.. باچر طيحوا الباب
ظلي يصير اتراب .. عنكم راح
عندي وياكم دين .. دفنو وياي اثنين
تربة وثوب حسين .. حتى ارتاح
غريبه يروحي .. غريبه يروحي
…………..
علي هادي الخزعلي
BY الخادم علي هادي الخزعلي
Share with your friend now:
tgoop.com/haaaaaaaa22222/455