tgoop.com/hamzaabo/1341
Last Update:
هوامش على المنشور السابق .. "طالب العلم":
- متعود جدن أتسأل عن بعض معاني الألفاظ الفصحى؛ الجديد في المنشورات بالعامية أسئلة عن بعض معاني ألفاظها؛ أول غياب لي الفترة الجاية غالبا سببه حسم مسألة الانتحار.
- بعض الحبايب حسِّسني إن المنشور جزء من مقدمة كتابي المعرض الجاي -اللي هيتنقل بالمناسبة العاصمة الإدارية- "القول الموزون في تحرير الفروق بين الإنيمي والكارتون".
- عارف إن فيه أفلام كارتون سيئة، وسيئة لأقصى درجة، وأشرت لكده في المنشور، وميرسي -من قلبي والله- للأفاضل اللي ذكَّروا بشأنها تفصيلًا في التعليقات؛ أكيد نخلي بالنا منها.
- لا يوصي المنشور المقصرين في الكارتون باستدراك ما فاتهم منه؛ قبل مداهمة الموت.
- الكارتون عند ناس كتيرة "إدمان"، وألوف مؤلفة مخلَّصة سلاسل مئوية، وبالمناسبة مليش في الكارتون بربع جنيه، وكمية القيود اللي في المنشور تمنع من أي سوء فهم الصراحة.
- بلاش طول الوقت نفكر (يا صفر - يا مية)؛ بين الرقمين تسعة وتسعين رقم للتفاهم.
- استهانة الآباء مع أطفالهم في الكارتون (أي نوع بأي كم وأي كيف)؛ هو نوع من ترييح الدماغ، وبيفوقوا عالكوارث متأخر، وبالذات في السنوات الأولى، أما لو عند طفلك "توحُّد" فالكارتون شبه ممنوع، وكارتون كتير + موبايل كتير = بلاهة حقيقية، وكل شيء لازم يوزن بميزان.
- نسيت أذكُر لعب الكورة، وشابوه جدن للي فكرني بيها، ياريت والله فعلن، واهي وسيلة للتخسيس كمان، نجربها مع نظام "التخسيس بالنية" المعتمد عند جماهير الملتزمين؛ يمكن تنفع.
- بلاش تسألوني عن الفرجة على ماتشات الكورة؛ عشان مش هطلع سو كيوت خالص.
- فيه أصدقاء اعتبروا المنشور عرض مؤقت لرُخص فقهية، وبدؤوا يسألوا عن حكم مشاهدة الأفلام الأجنبية؛ أحب اطمنهم إن مفيش update للأحكام الشرعية، والممنوعات لا تزال كما هي.
- فيه ناس اقترحوا "الزواج" حل لمشكلة طالب العلم ده، وانا كحمزة اقتنعت جدن بيه وبقترحه عليكم، وانتو كمان لو اقتنعتوا بيه اقترحوه عالناس، ولو كده نتجوز كلنا الأسبوع الجاي.
- الناس اللي اقترحت "الصيام" كحل عام؛ ازاي مخدتش بالي منه؟! يمكن عشان صايم؟!
- مش هعلَّق على اقتراحات جت لي في "الخاص"؛ من عينة "روح اشتغل في الاستثمار".
- اخواتي اللي بيخافوا جدن على الناس من أي رُخص؛ أيون احنا بنتلكك لأي توسعة على نفوسنا بموازين شرعية، وكل ما هتنفتحوا على بلاوي "واقع ما بعد السواد" أكتر؛ هتفهمونا.
- أكيد مش قصدي أسخر من أي حد تكرَّم علي ومرَّ بالصفحة، وربنا يحفظكم أجمعين.
- الفرحانين بالمنشورات بالعامية؛ الفسحة خلصت، ورانا فصحى؛ كله على فصله.
- الصديق اللي داخ من كلمة "بحبك"؛ أمَّال يا مدهول لو قلت لك: هات بوسة؟
BY قناة حمزة أبو زهرة
Share with your friend now:
tgoop.com/hamzaabo/1341