tgoop.com/hosne22/5460
Last Update:
موضوع التردد في ارتداء النقاب خد أكتر من حجمه يا بنات ..
انتي دلوقت بتحبي النقاب، ايه اللي يخليكي مترددة؟
خايفة من ايه ؟ من عدم الثبات؟ ومين قالك ان اللي لابسينه ضامنين يثبتوا عليه باقي العمر ؟ احنا بناخد خطوة الطاعة وبنسيب الثبات على ربنا ...
مترددة عشان مش هتعرفي تعيشي حياتك؟
ليه؟ هو عائق عن الأكل والشرب ولا النوم ولا التنفس؟
ولا انتي شايفة ان النقاب مينفعش معاه اغاني ومسلسلات وذنوب كتير فمستتقلة الخطوة عشان مش قادرة تسيبي الذنوب دي ؟
هو بعيداً عن حتى لو لبستي النقاب هتفضلي تعصي بردو وتتوبي ما حييتِ، بس هل ترك المعصية اصبح عذر لترك طاعة؟!!!!!
يعني عشان مش قادرة اسيب ذنب معين، اسيب طاعة! سبحان الله، دا الواحد لو عارف ان النقاب هيغيره ويقربه من ربنا اكتر المفروض يلبسه فوراً !
ولا هي مشكلة الأهل اللي رافضين؟ طب وهو المؤمن اللي بيستعين بالله يخاف من ايه بالله عليكم؟
ربنا يقول ادعوني استجب لكم، وانتي تقولي لا اصل اهلي مش هيوافقوا ألبسه!
يا بنتي فوقي، انتي معاكي الدعاء، يعني محدش هيمنعك عن حاجة لو ربنا أراد يستجيب لكِ !
لو انتي مش عارفة قدر النقاب كويس، اعترفي بـ دا ، لكن متتحججيش بظروف حواليكي، عشان اللي عايز حاجة بصدق بيعملها ! انما اللي بيتحجج بالظروف دا عمره ما كان عايز الحاجة دي بصدق !
الصدق والاخلاص في الطلب يعني كل الدنيا تقف في وشيء وانا مكملة في طريقي ! زي النبي بالظبط .. كل الناس عارضته وهو مكمل في الدعوة لإنه عارف ان التأييد جاي من الخالق ، ملك الملوك !!!
يبقا مالي ومالِ الناس !!.
الواحد لما ربنا يلقي في قلبه حب طاعة، فيفضل يتحجج عشان ميعملهاش مستني من ربنا ايه؟
طبعاً هينزع حبها من قلبك ويمنحه لغيرك اللي هيحارب ظروف كتير بسسس عشان يوصل لربنا من خلال الطاعة دي ..
لما بنوتة تقولي ابويا منعنى من الجامعة والامتحانات والنزول عشان النقاب ، ومع ذلك ثبتت وفضلت تدعي رغم الاهانات اللي بتقابلها من أهلها، وفي الآخر جالها التأييد والنصر من ربنا ولبسته !
اللي قدر يخلي مريم تنجب عيسى عليه السلام بغير زواج، وزكريا ينجب يحيى وامرأته عاقر، ويردّ ليعقوب يوسف رغم إن طول السنين يوحي بفقدان الأمل، ازاي يصعب عليه يرزقك بحتة قماشة تستري بيها نفسك وتكوني بسببها مع امهات المؤمنين والصحابيات !
ولا يزال أقوام يتأخرون حتى يؤخرهم الله..
عايزة تأجلي وتأخري براحتك مفيش مشكلة.. بس متجيش بعد فترة تشتكي ان إقبالك على النقاب قلّ ومعدتيش عايزاه ..
النقاب مش هو الجنة، بس وارد جداً لفساد الزمن وانتشار التبرج يكون سبب دخولك الجنة، كل ما الزمن فسد كل ما كان أجر الطاعات أكبر..
عايزين نبطل حجج.. ونصدق مع نفسنا ونعرف ان اللي مانعنا عن طاعة ربنا مش حجة تستاهل كل الشكوى دي !
عايزين نصدق ونسيبنا من الهمم المخنثة دي والوهن والضعف، احنا عايشين في أوهام ! اللي عايز ربنا بصدق ربنا بيوصله!
هنجاهد بقا ولا هنفضل نعتذر عن فعل الطاعات كتير !!؟
لست آسفة على شدتي، لأنها ما بَدرَت مني إلا لخوفي وحرصي عليكنّ ..#نورالهدي
BY رقيق القلب ♡
Share with your friend now:
tgoop.com/hosne22/5460