tgoop.com/hosne22/5463
Last Update:
اقرأوا الكلام برااااحة من غير استعجال ومفيش مانع تقرأوه أكثر من مرة عشان تفهموه كويس
في موضوع فقهي مهم جدا يا جماعة لازم تعرفوه عشان بيعتمد عليه صحة الصلاة والصيام وكل حاجة .
الموضوع هو :
إمتى المرأة تغتسل من الحيض أو الدورة الشهرية يعني؟
أنا هتكلم في الطبيعي بعيد عن المشاكل إللي في الهرمونات أو إللي مركبة حاجة او بتاخد حبوب أو...أو...
المرأة بتكون مدة الحيض بتاعها في الطبيعي لحاااااد ٨-٩أيام،
《في نساء ممكن يكونوا أقل من ال٩ أو أكتر من ال٩ لحد ١٥ يوم》
بس أنا بتكلم في المتوسط عشان محدش يفهم غلط.
أول ٤ أيام بيكون نزول الدم عادي بدون إنقطاع،
ييجي على اليوم الخامس كده في بدايته أو في نصه،
يحصل إنقطاع للدم،
-(((في نساء تتسرع وتغتسل بحجة إن الدم وقف وده غلط
لأن الحيض لسه مخلصش)))
يبقى الحيض بيقف في اليوم الخامس كم ساعة كده،
وبعدين على نهاية اليوم الخامس أو بداية اليوم السادس كده يبدأ ينزل الحيض تاني،
وهنا طبعا إللي اغتسلت تحتار وتدخل في متاهة.
المهم هيفضل ينزل دم مع إفرازات بني غامق لمدة يوم أو يومين كده،
طيب إمتى الوقت الصحيح للإغتسال؟
أول ما تشوفي علامة 《الطّهر》 تغتسلي .
إللي هي إيه علامة الطهر دي؟
حاجة إسمها القَصّة البيضاء،
إفرازات كده عاملة زي الجير المبلول بيكون لونها أبيض،
أول ما تلاقي البني بدأ ينزل خليكي منتبهة هينزل بعد كده حاجة اسمها الكُدرة بتبقى لونها بني فاتح كده،
وبعدين بينزل وراها الأصفر،
وبعدين بينزل وراها الأبيض أو القَصة البيضاء دي إللي أول ما تشوفيها يجب عليكِ الغسل خلاص.
(((شوفوا اللون في الصورة 👇 8-9)))
والحاجات دي بتنزل ورا بعضها خلال ساعات في اليوم الثامن أو التاسع بالكتييير،
عشان كده لازم تكوني منتبهة وتتبعي الموضوع بمنديل أبيض أو قطنة بيضاء، مع كل صلاة تشوفي هل نزلت القَصة البيضاء أو لأ👌
يعني تمسحي المكان إللي بينزل منه الحيض وتشوفي هل إللي هيطلع في القنطة بني ولا كدرة ولا صفرة ولا القصة البيضاء،
لااااازم تعملي كده عشان تشوفيها،
وإلا ممكن تنزل وانتِ مش واخدة بالك وتبقي محتارة ومحتاسة ومتبقيش عارفة تعملي إيه.
محدش يستعجل في الغسل،
غير لما تشوفوا علامة الطهر،
طيب في نساء مش بينزلها القصة البيضاء،
وبعد الأصفر بيحصل جفاف تااااام مش بيكون في أي حاجة؟!
هنا بقى تمسح بقطنة فلما تطلع لها القطنة مفيهاش أي حاجة لا صفرة ولا كدرة ولا أي حاجة؛
الجفاف ده بالنسبة لها هو علامة الطهر بتاعتها ، أو علميا يسمى الجفُوف ،
الجفوف بيكون بعد نزول البني والأصفر👌
☆طيب امتى زمن الجفوف؟
بيكون بعد نزول الأصفر الفاتح بحوالي ساعة تقريبا، يعني خلال الساعة دي لو حصل الجفوف زي ما قلنا تمسح متلاقيش حاجة؛ يبقى المرأة تغتسل،
أو القول التاني بيقول إن المرأة تستنى يوم بعد نزول الأصفر وبعد كده تغتسل.
بس انتِ لازم تتأكدي وتعرفي انتِ من أنهي نوع بإنك تعملي إللي قلتلك عليه👆
النوع إللي بينزله علامة طهر ولّا النوع إللي بيحصله جفاف في المكان إللي بينزل منه الحيض بعد ما تشوفي الأصفر.
وممكن يحصل معاكِ الاتنين👌
فلو حصل كده يبقى أي علامة تظهر الأول تقومي تغتسلي،
لو حصل الجفاف الأول تغتسلي، لو شوفتي القصة البيضاء تغتسلي وهكذا.
طيب لو بعد فعلا ما شوفتي الأبيض أو حصل جفاف واغتسلتي لقيتي بعد كده أصفر أو بني فاتح تاني إيه العمل؟
ولا كأنهم موجودين.
الصفرة والكُدرة بعد الطهر عادي،
تستنجي يعني تتشطفي وتتوضي لكل صلاة وتصلي عادي وتصومي،
لكن الصفرة والكدرة قبل علامة الطهر بيكونوا من الحيض.
◇بالنسبة للي بينقطع عندها دم الحيض يوم أو اكثر في النص وبعدها بينزل دم تاني وده اسمه طُهر وسط الحيض،
وده بقى للعلماء فيه قولين:
بعضهم قال لو انقطع الدم وحصل جفاف يعني تمسحي بقطنة متلاقيش فيها أي حاجة نهاااائي،
يبقى تغتسلي وتصلي،
ولو نزل الدم تاني توقفي ويبقى حيض،
وده بيسموه التّلفيق،
وعلماء تانية قالوا:
إنه يعتبر من وقت الحيض ومفيش غسل ولا صلاة ولا أي حاجة،
لحد ما باقي الدم والبني والأصفر إللي هينزل بعد اليومين يخلصوا خالص وتشوف علامة الطهر،
وده بيسموه السّحب،
بس أهم حاجة يكونوا خلال زمن الإمكان إللي هو ال(١٥) (15)يوم بتوع الدورة إللي العلماء حددوها كأقصى حد لمدة الحيض.
طيب ناخد بأنهي رأي؟
الرأي إللي يريحك امشي عليه، أنا شخصيا شافية إن الرأي الثاني أيسر ومفهوش لخبطة.
◇طيب في ساعات إفرازات بتنزل قبل الحيض بكم يوم، دي نعمل معاها إيه؟
لو هي متصلة بدم الحيض، يعني افرازات مستمرة مستمرة مش بتقطع وفي وجع وعلى طول بينزل دم الحيض؛ تبقى دي تبع الحيض.
لكن لو متقطعة،
يعني كل كم ساعة بتنزل حاجة بسيطة تبقى مش داخلة في الحيض والمرأة تصوم وتصلي عادي، بس طول ماهي موجودة لازم الوضوء يعني تتوضي لكل صلاة بعد الأذان.
BY رقيق القلب ♡
Share with your friend now:
tgoop.com/hosne22/5463