tgoop.com/hsaennn/6589
Last Update:
لسان حال مولاي أمير المؤمنين عليه السلام يحاجي مولاتي زينب
راسي ينطر من اباوع صوبج
امن المخيم باجر يطلعونج
يا درة علي يا خدري وحساسي
لا تبجين بويه ايخمدن انفاسي
اذا نزلت ادموعج ينفتح رأسي
يا جرح الجبير ويا اعز ناسي
بويه لا تبجين ليسمعونج
امن المخيم باجر يطلعونج
شمحلاهه يزينب هاي لمتنه
اخ امن الدهر باجر يشتتنه
باجر بالبراري اتضيع عيلتنه
يوصل للنجف دخان خيمتنه
من اخوتج زينب ايبعدونج
امن المخيم باجر يطلعونج
حسينج بويه باجر محد بحاله
عاري اعله الرمل ومسلبه اعياله
حسين يموت بالطف لو نظر حاله
اذا خدره طلع ويشوفه جتاله
باجر يسحكونه ويشوفونج
امن المخيم باجر يطلعونج
امنتج يبويه بيد ابو الكلفه
بس معذور اذا طاح الكمر جفه
خل يطيح بويه وتوكف العفه
بس عين الزلم صوب الخدر صلفه
طاح جفه وكامو يضربونج
امن المخيم باجر يطلعونج
مذبوح وسليب وعينه لخيامه
من جسمه الزلم جابتلج اعمامه
اشرلج ارجعي بزحمة اسهامه
لتلميني كلج لمي ايتامه
يا هو ضايع دوري من اضعونج
امن المخيم باجر يطلعونج
هاشم الله صايغ منهم الحشمه
عطر زينب وحي بس النبي يشمه
ماعدهم مره تتماشه وي زلمه
زحمه ام الخدر من توكف بزحمه
وي اجانب باجر يمشونج
امن المخيم باجر يطلعونج
باجر شامهم شيصدلج اسهامه
بالديوان وي يكلبون بيتامه
حسينج بالطشت اشرو كدامه
اشر عله سكنه يكول خدامه
بالخرابه باجر يكعدونج
امن المخيم باجر يطلعونج
خادم مولاي أمير المؤمنين المقصر حسين حيدريه المالكي
BY قناة ابو محمد الاسدي
Share with your friend now:
tgoop.com/hsaennn/6589