tgoop.com/hsaennn/6701
Last Update:
يحسين الحرم بحماك خويه اتطول النومه ؟
يبن أمي العلى التربان جسمك تارس الحومه
*****
جينه ونار بالخيمات
ما ندري العدل والمات
هذا السلبوه وطاح
ركضت ونه علونات
نركض خويه مدري الوين
كلهه تصيح وين حسين
وين الوالي دربه منين ؟
عين وظل تناشد عين
يحسين ،، الطفل سحگوه
يحسين ،، العلم حرگوه
يحسين ،، الوجه مسطور
يحسين ،، الگلب منحور
جيناك ونريد انشوف طولك خويه ورسومه
يبن أمي العلى التربان جسمك تارس الحومه
****
بعدك خويه ضيم هواي
من فدوه العطش والماي
كلشي الطولك المهيوب
غير انته الاخو الحماي
يحسين وصدگ مذبوح ؟
وسفه اعله الترب مطروح
خويه جروح فوگ جروح
يمك ردنه ما مسموح
يحسين ،، العطش چتال
يحسين ،، وبلايا رجال
يحسين ،، ونروح الوين ؟
يحسين ،، وبعيد حسين
محد من اهلنه أيگوم وين الوالي وعلومه
يبن أمي العلى التربان جسمك تارس الحومه
**
هونك يا رمح خليه
نزله وخل اشمن بيه
هذا الغالي اخذني وياه
مني بعيد لتوديه ؟
رافع راسمن تدري ؟
هذا اعبايتي وخدري
يم نحره وخلص عمري
اجيته ومختنگ صدري
يحسين ،، وعماني الصار
يحسين ،، الشتم والنار
يحسين ،، الحبل جابوه
يحسين ،، وبدي شدوه
گوم افزع يبو النوماس جيتك والله مهضومه
يبن أمي العلى التربان جسمك تارس الحومه
**
وين انروح من الشام
وانتم روسكم گدام
نركب هزله خويه حسين
ما دام الاخو ما دام
يا ليل البعد يا ليل
خلصنه الدمع والحيل
فوگ الناگه گمنه نميل
شامت بينه گام يعيل
يحسين ،، وركبنه النوگ
يحسين ،، ودخلنه السوگ
يحسين ،، وشمر حداي
يحسين ،، تعبنه هواي
زينب ياهو يمشي وياي من اخواني محرومه
يبن أمي العلى التربان جسمك تارس الحومه
****
خلصت وانتهت يلحيد
منك رحنه خويه بعيد
تدري الحادي مو عباس
نمشي وبس دمعنه يزيد
نمشي ونلتفت يخوان
تعبان بظهر تعبان
اه يا وحشة الوليان
هسه الحادي ياهو الچان ؟
يحسين ،، الاخو مذبوح
يحسين ،، الكمر مطروح
يحسين ،، ولفانه الموت
يحسين ،، وگطعنه الصوت
مالومه ومشت للشام ها يحسين مالومه
يبن أمي العلى التربان جسمك تارس الحومه
كلمات الخادم / رعد الفريجي
محرم الحرام
BY قناة ابو محمد الاسدي
Share with your friend now:
tgoop.com/hsaennn/6701