tgoop.com/husantangriyev/4060
Last Update:
2025 йил 20 февраль куни ижтимоий тармоқларда Тошкент халқаро аэропортининг учиб келиш залида йўловчилар ўзлари билан олиб келган мобил қурилмаларни UzIMEI тизимида рўйхатдан ўтказишда навбатлар юзага келгани ҳақида хабар тарқалди.
Мазкур масалада Божхона қўмитасининг Божхона назорати ва расмийлаштирувини ташкил этиш ҳамда Ахборот технологиялари ва киберхавфсизликни таъминлаш бошқармалари, “Тошкент-Аэро” ИБК мутасаддилари вазиятни жойига чиққан ҳолда ўрганишди. Жараёнга Ўзбекистон телекоммуникациялари тармоқларини бошқариш республика маркази (тизим оператори) вакиллари ҳам жалб этилди.
Маълумки, Ўзбекистон Республикаси Вазирлар Маҳкамасининг 2023 йил 26 октябрдаги 563-сон қарори билан жисмоний шахслар томонидан мобил қурилмаларни олиб киришда божхона тўловлари ундирилмайдиган чекланган меъёрларидан қатъий назар, мобил қурилмаларнинг ўзига хос идентификация кодлари (IMEI коди) кўрсатилган ҳолда йўловчи божхона декларацияси тўлдирилади.
Ушбу декларация мобил қурилмаларни UzIMEI тизимида рўйхатдан ўтказишда асос ҳисобланади. Бунинг учун мазкур тизим Божхона қўмитасининг Маълумотлар базасига интеграция қилинган.
Ҳаво йўллари орқали ҳаракатланаётган юртдошларимизга қулайликлар яратиш мақсадида аэропортнинг ўзида йўловчилар томонидан тўлдирилган йўловчи божхона декларациялари асосида мобил қурилмаларни UzIMEI операторлари томонидан тизимда рўйхатга олиш йўлга қўйилган.
Навбатларнинг олдини олиш мақсадида ушбу жараёнга жалб қилинган ходимлар ва операторлар сони оширилди.
Божхона қўмитасининг Маълумотлар базаси ва UzIMEI тизими интеграциясида ҳам қатор техник чоралар амалга оширилиб, ўзаро ахборотлар алмашинувининг янада тезлашувига эришилди.
Эслатиб ўтамиз, йўловчилар мобил қурилмаларни бевосита аэропортнинг ўзида рўйхатдан ўтказишлари мажбурий ҳисобланмайди.
Мобил қурилмалар олиб келинганда тўлдирилган йўловчи божхона декларацияси асосида йўловчилар мобил қурилмаларни Ўзбекистонга кириб келганларидан сўнг 30 кун, чет элликлар эса 60 кун давомида ўзларига қулай фурсатда UzIMEI тизимида рўйхатдан ўтказишлари мумкин.
Шунингдек, келгусида йўловчи божхона декларациясини онлайн тўлдиришни йўлга қўйиш, бунинг учун мобил иловалар ишлаб чиқиш устида ҳам ишлар бошлаб юборилган.
Яқин кунларда декларацияни онлайн тўлдириш тест режимида ишга туширилади, халқаро аэропортларнинг учиб келиш залларига декларацияни онлайн тўлдиришга мўлжалланган инфокиосклар ўрнатилиши режалаштирилган.
BY Husan Tangriyev I Rasmiy kanal
Share with your friend now:
tgoop.com/husantangriyev/4060