حضر يا جفن دمعات العيون
وابچي ويه الينوحون
گرب حزن اليحبون
انت ودمعتي ما الكم حساب
للغالي ترخصون
اكداً مو بالضنون

ترجم ياجفن دمعات الجروح
من تنزل حزن ويأذن النوح
مايغله البچي وشهر الحزن جاي
شهر بيه الحسين اتسمه مذبوح

ادخل عالم العشاگ.   من ابچي اعله معشوگي
شهر فگد العشگته جاي.    اريدن ينفضح شوگي
دمع ياجفني ابچيله.     ودمي يچوي بعروگي
       __
وحضر ياگلب بجروح الاحساس
خلي جروحي تنجاس
والطم صدري والراس
گرب شهر المحرم ياگلب هاذ
شهر بي يصفر الياس
بمصاب الماله مقياس

شهر بيه الحزن واجب للأحباب
شهر بمصابه ابد ماشابه امصاب
شهر بيه الحسين تحضنه الرمال
وغريبه بلا وطن عايلة الاطياب

غريبه بلا وطن تصبح.     اصل كل الوطن واهله
وسفه الغربه تاخذهه.     بسبي لا بعده لا قبله
لا تبرد ولا ترضى.         جرح من عندك تقله
         __
ادعيلك يگلبي بالحزن دوم
واذا ابرد علي لوم
خل دمعاتي كل يوم
اريدن بس حزن اگضي العمر كون
واريدك كلبي مالوم
طبع ماريده تعلوم

اريدك ياگلب تتطبع احزان
وتصبح للحزن ياگلبي ميدان
ومااريدن حزن دنيا يطب بيك
وبس لأجل الحسين احزاني عنوان


احزانك فقط لحسين. لاتقبل حزن غيره
وتترس كل جزء منك. اصبح للحزن ديره
ديرة تسكنك الاحزان. حتى اتمسك الغيره
__
وتحضر بادمع عيني للالام
كرب شهر السبي وشام
معدودات الايام
احرگني السبي عايلة الحسين
وعفة دين الاسلام
اريدك دمعة الايتام

انزل بادمع لاجل السبيات
لاتبرد اذا تسمع غريبات
اريدك حار كون تچوي الاخدود
احر من الجمر من تجري دمعات

يادمعي مصابك هاذ. بمصابك فلا تبرد
ماريدن احشم بيك. وحدك يادمع تنهد
بالك لا تقل بيوم. شماتنزل اريد ازود
_
#حسين_علي_الياسري

إن الذي قد شَم ريحُكِ كربلاء
رئتاهُ فيكِ تكتفي عن كلِ ريح
فالريحُ فيكِ قد تزكت بالولاء
لأنها قد حُمِّلت عطرُ الضريح

شهگة نفس  تعني امان
والريه تتنفس  حنان
ماتلگه منهه بكل مكان
مزكيهه الحسين
شهگة نفس تسوه الحياة
والريه تحسبهه صلاة
تنقيهه من المهلكات
مزكيهه الحسين

الهوه من كربله يعافي
والكلمن مِرض شافي
هوه اليمر ضريح حسين
من عنده وبعد كافي
__
نسماتُ عطركِ كربلا ليست كما
في غيرِ ارضٍ عطركِ فيه الدَوى
هو بلسمٌ للقلبِ لو شوقاً قضى
في شمةٍ من عطركِ استغنى الهوى

نسمة عطر تسوه الهوه
وگلب ال يحب بيهه ارتوه
والبيهه حس گلبه انچوه
چي بيهه دخان
نسمة عطر من المزار
تبعث امان وانكسار
بارد نفسهه وبيهه نار
چيه بيهه دخان

بيهه احتارت الحيره
بيهه من الحزن ديره
بيهه اجتمعن الضدين
الحزن وشموخ ابو الغيره
___
ان الذي زارَ الحسينُ ما يرى
كلُ الوجودِ لا يساوي منضره
ذا منضراً ليس كمثلَهِ في الدُنا
في جنةِ الباري تجلى حائره

هذا القبر روضة جنان
لا ينتهي بمر الزمان
بي يشعر اليشتم دخان
ويتلفظ حسين
واللي يزوره وبي يطوف
ينسى دنيته وما يشوف
غير أربعة من الحروف
ويتلفظ حسين

هنياله اللفظ اسمه
يعني مسته الرحمه
واليذكر اسم الحسين
يعني يشكر النعمه
__
من زارَ ارض الطفِ فيها ما يجد
روحٌ وريحانٌ ودمعٌ وبكاء
فالروحُ والريحانَ من عطرِ الحسين
والدمعُ يجري والبُكى حزنُ السماء

تضهره الارض حزن السماء
بعاشر محرم بالدماء
بدم اليواسي كربلاء
بالدم بقت دوم
من دم الحسين الشهيد
رواهه من مجرى الوريد
وعاشت على مصابه تعيد
بالدم بقت دوم

الراح لكربلاء يشاهد
ضلت للزمن شاهد
رضخت للدماء سيوف
عن ميت صبح خالد
     ___
ذي كربلاء تبقى ملاذَ الحائرين
من يلتجئ في علمها وجدَ الدليل
سرَ الوصالُ دمعةٌ من مقلةٍ
معراج دربٍ للعلى دمعٌ يسيل

بالدمعة معراج العُلى
والجفنُ حزناً اذ تلى
دمعٌ تدنى ودلى
اليعيش الجروح
وگليبه مكسور وحزين
ولسانه ترتيله بانين
آ ياحسين آ يا حسين
اليعيش الجروح

هنياله النذر روحه
يبچي وينعه مذبوحه
الينصر قائم أهل البيت
كل صبح ومسه نوحه
____
#حسين_علي_الياسري

شنهو السبب. بقسمة وهب
شنهو السبب دون النصاره
ربنه الوهب صار اختياره
شنهو السبب
____
أسأل ردت. عنه وشفت
وهب متأهب يضحي بحياته
شاف العشگ. حسين الصدگ
ومامش مثل الحسين بغلاته
لمحبته. ولنصرته
مايغله العمر وارخص مماته
بحبه ربح. دينه صبح
حب حسين صار بكل صفاته

هيج اليحب. من الكلب
لأجل العشگ گلبه إماره
ربنه الوهب صار اختياره
شنهو السبب
____
ربنه الوَهَب. دينه وِهَب
جيفن عاف دينه واعتقاده
واده الحمد. وصار العبد
لدين حسين اعلنهه العباده
وفه وصدق. ودينه اعتنق
من اختار عن حب الشهاده
نال العله. واثبت اله
طيب المرضع وطيب الولاده

طيب الاصل. وطيب الحمل
من للحسين اصبح قراره
ربنه لوهب صار اختياره
___
سَلَّم گلب. نبضاته حب
تدگ نبضاته صارت بيد الحسين
وكل النظر. لشوفه ذخر
لطلة حسين فدوه تروح كل عين
لحبه وفه. وماخالفه
وعنده حسين تارس شوفه صوبين
وانطاه عمر. فدوه ونذر
الجنه حسين عنده مانشد وين

لا همته. ولا شغلته
چي بالحسين يشوف اجاره
ربنه الوهب صار اختياره
______
ضحى وزهد. عن معتقد
مسيحي وصار اسلامه حسيني
للمعتقد. صار السند
باسم حسين كال يصير ديني
ومنه أغترف. وباسمه أنعرف
حسيني اصبح لمن اذبح سنيني
وعندي الشهد. موتي وعد
شهاده ويه الحبيب تقرلي عيني

عند المحب. ماي العذب
من يرتوي بنضرة بشاره
ربنه الوهب صار اختياره
____
ومادورت وماناشدت
ولا أسأل بعد شنهو السبب چان
صار العِلم. عندي وفهم
الوهب حب الحسين يصير عنوان
ويه العاطفه. چان الوفه
لأن وافه الحبيبه وصار انسان
وذكره يضل. رغم الحصل
رغم مات وتعيده تضل الازمان

تخلد لأن. لإبن ام حسن
خله العمر رهن الاشاره
ربنه الوهب صار اختياره
____
#حسين_علي_الياسري

أنّ الإمام الباقر(عليه السلام) تقديراً لمواقف عمّه أبي الفضل العبّاس(عليه السلام) المشرّفة، وشكراً لمساعيه الطيّبة، وإعلاناً عن مقام عمّه أبي الفضل العبّاس(عليه السلام) عنده ومنزلته لديه، قد لثم يدَي عمّه المقطوعتين، وقبّلهما بحرقةٍ ولوعة؛
وهذا من اعلى مقامات الشكر
فكأني به روحي له الفداء يقول :

چفك من يحارب. راعبهه الكتايب
__
چفك الانه اقبله وچم انام امقبله
صار لاحباب ابو الاكبر اتجاه وقبله
چفك الحيدري اصله وصان كلشي باصله
وانه باقر بيت هاشم مثل ابوي بفعله
من قبل چفوفك. واتبارك حروفك

___
چفك بجيش اميه ضل يصول ابكيفه
مابقت كل كتايب من تهزهز سيفه
والكرم عنده واجب والملاحم ضيفه
عزب بگص رگبهم من علن عن حيفه
بإسم الله يقينك. وفعل الله بيمينك
__
شكراً هواي ابو فاضل يامربي الغيره
اشكرك يابدر هاشم ياامان الديره
يامسنع يالمخلي اعدانه بيهم حيره
ميت ومامثلك احد يرعب اعله السيره
من اسمك رعبهم. يمرجف زلمهم
_____
ها يعمي يبو الغيره يبقه ذكرك هيبه
يرعب حشود آل اميه اسمك امن انجيبه
يعني ذكرك يذكرهم انت اصل النيبه
مسوي بيهم ذكر اسمك رعب خوف وريبه
ذكر اسمك مقاتل. ويشرد الجحافل
__
راسك اعله الرمح لاچن بيك اشدن عزمي
من اشوفك يعم عالي وطاغي نورك يعمي
حگي بيك افتخر انه من اگولن عمي
انت غيره وفخر هاشم بيك ارفع اسمي
يمضحي بدمائك. من أجل انتمائك
___
#حسين_علي_الياسري

يزينب دم على عيني احس بي
وجرح فرگاچ انه بگلبي احس بيه
يخيتي اشچم جرح بيه احسبي
جرح فرگاچ اعظم من اديه

اريد ابدي واسولف من جروحي
بغير حسين مااضن منجه روحي
اذكر مره ذنبي من جر روحي
صحت حسين تشفع أنت اليه

زينب تشكي حالتهه والمهه
تشكي لحيدر الصاير و لامهه
حسين مگطعه جثته ولمهه
علي السجاد من فوگ الوطيه

زينب بعد اهلهه راح املهه
وبين اعداهه مامش راحم الهه
چلمة خويه صاحت راح املهه
شكثر ناديت محد رد عليه

صدگ صوط الشمر بعدي ولاچن
صدگ يضرب ولا يهتم ولا چن
بعد بالي فلا يصفه ولا أچن
إلا اسمع رضت زينب عليه

زينب والحزن بعدك علي حل
ومن بلواي دورلي عله اي حل
اجيت اشكيلك وشأشكي عله اي حال
لگيتك جثه متوسده الوطيه

جيش اعدانه ياخويه علي دار
وحرگوا خيمتي الچانت علي دار
صحت عباس والهاجم علي دار
وجهه ونضرته شمتانه بيه

قصيدة ضلمه ونور



كلشي اسود
نور ماكو ودنيا ضلمه
وصوت طفلة تصيح عمه
وعيني مامش شوف بيهه
وكمت ادور وين شوفي
وصوت وهواس اليكلي
شوفك اعمه
ومن بعيد يبان نور بنصه جلمه
بيهه حرف الحاء واضح
وبيهه لون احمر عجيب
بكل حروف الجلمه طافح
لونه غوش باقي الاحرف والملامح
وينزف بحب وتسامح
شي غريب
منين مااندار اشوفن كلشي اسود
من اباوع
وباقي نور الجلمه طالع
نور يعمي
اقوه من نور الشمس
ينزل بقوته المدامع
وصوت طفله
اعله من صوت الجوامع
بي حزن بچه المسامع
وتاهن الحسبات كلهن
هي حيره
وانه تايه
ولو ردت اندل
عليمن وجهي اديره
وفجأة لن ارتفعت بروحي البصيره
وكلت خل امشي بطريق النور
خل اعرف مصيره
اتقربت عالنور اكثر
بين المكتوب بيه وصار اوضح
من قريت حسين روحي كمت احسن بيهه تسرح
عرفت حسين المخلص
فكرت بالدنيا لعبه.
وكلشي غير حسين جذبه
وعرفت الطفله الحزينه الروح جانت
تبجي يم حسين جي تدري عطوف
والضلام العاش بينه من اثر ضلم الطفوف
وصوت ماي
شفته من جود ايتبده
ويمشي للوادم سبيل
وانه من هاي وفهمته
ماي كل الدنيا شارد
من نزف جود الكفيل
#حسين_علي الياسري

بيه واهس مال ملكه
وازدحام من المشاعر
وصوت لاچن صوت اخرس
وصوره من كل ذكره حلوه
تملي بعيوني بالنواظر
وهوسة افكار وتشضي
تاخذ بعقلي وتودي
وجيش من كسر الخواطر
ودمعة عيوني العزيزه
تسافر اعله خدودي سكته
بدون ما تگطع تذاكر
والخيال الواسع ترسمه صفنتي
وياك اسافر
وزحمه من تخلص صفنتي
الگه اثر يشبه طريقك
دمعي فوگ خدودي حافر
والگه وحشة موت بيه
والگلب مابي يصابر
ها يالمخلي انتضارك يمي يبقه
انه بس لأجل انتضارك كمت اكابر
انه بس لاجل انتضارك عمري باقي
والأمل ترجعلي باچر
هسه لو باقي خيالك 
يمي يضوي
چان يم خيالك اكعد ليك اناطر
انه تارسني غيابك
وبخيالك ردت اسامر
ريت ترجع ليت اشوفك
انت وخيالك وريحك
بكل كتر بالبيت داير
وترجع لشوفي نقل حي ومباشر
وكل اداة تفيد في معنى التمني
استخدمتهه البلكي ترجع
الليت الزمك الريت اقبلك
ماليه اوراق الدفاتر
وگلبي گال ارجع واطشلك
للفرح نبضاتي ناذر
هذا حالي شلون حال
مثل غبشة ثكله صاير
مغربية ليل شاعر
وفوضوية حزني تنطق
عن ضجيج بداخلي
اعله عيوني ظاهر
وعيني من كثر الدمع
رسمت ضباب كبال شوفي
وشوفي حاير
والضلام يدور حولي
والحزن وياي ساهر
والوجع البروحي يكتل
چنة هندس ليل عاشر
وصوتي من يصرخ اريدك
محد يسمعه ولكن
هزله دين من الضماير

عامر
مناير
منابر
عابر
لها بقيه أن شاء الله
#حسين علي الياسري

عباس واگف مشرعة وجود
ماي ويطشونه اعلى الورود
ماهمته شما كثرت جنود
كلما يزيدون العده يزود

طب بوسطهم مثل الاعصار
وجيش العدة تولاه طشار
وامرهم الضل باقي محتار
عباس طب لايسأل شصار

ي والله رحمة من الله موجود
واعد صدك ويوافي الوعود
مايرجع اله مگطع زنود
حالف يضحي بكلشي ويعود

زينب تسمي راحت البال
لو بس تامرة يطيح جبال
مرات اشوفه يشرد رجال
ومرات اشوفة يراعي الاطفال

وفاي اعرفة بكلشي وفاي
زينب يگول احميهة بحماي
طب مشرعة وشو ردد بهاي
عندي عطاشه واشرب الماي

ضلمة اصبحت واختنگت انفاس
حاير صرت مامش بقت ناس
شويه بعد ويروح عباس
چف ينگطع يتهشم الراس

شو كمت احس بضهري حدب
كلما احس بموته گرب
ونار الگلب شو بيه تلهب
يمكن وگع راسه وتخضب


#حسين_علي_الياسري

ها يرايح عني يدواي وياعلتي
اليوم الم كل ذكرياتك
ارد اگعدهن واعاتب
من غيابك تارسه الدنيا وحدتي
شلون لمن يگبل الليل بغيابك
ياهو اليسدلي وحشته
وچانت عيونك تسد خوفي ووحشتي.
وتدري بعيونك كشختي
وصارت الكشخه بعد مافاركتني
دموع تترسلي وجنتي
يالجنت يمي واريدك
تدري مااحمل فراگك
وادري ماتحمل فرگتي.
وانه بس لعيونك اشكي
وهسه عينك فاركتني
ياهو اليسكت عبرتي
وعلگت صورة رجعتك
الرسمتهه من خيالي.
بالخيال الماتحده
تطول لوتكصر نضرتي
ووسط هاي الفوضويه
يفز ضجيج شچم سؤال
ليش راحت عني جفينك يغالي
وَكلهه حاجه
لحضنة جفوفك دمعتي
وهم اشوفك جايني وجايب ضحكتي
ياوطن روحي وغربتي
ياراحتي السكنت حسرتي

ليل وهندس وهوسة هدوء وموت
واصوات الحقيقه تموت
وبس لاجل السراب الصوت
وكلام بلا حچي مفهوم مامسوع
والدرب الحقيقه السجه بس الروح
وبس اللي نطاهه يفوت
وبيهه الموت واگف يم درب مفتوح
وباخر مطافه بي حضن تابوت
بدرب الحگ اذا توصله راح تعيش
هذا الطف
بي تلگه بياض الريش
وبي يونس ولكن مانجه من الحوت
والدم للحياه زاتوت
واذا راح الحمار
شينفع الياقوت
وعجاج الصحره من يثور
متلزمه حدود بيوت
وحزن تارس فرات الدم
وانباگ النده بسكوت
بس اعلام كل حگ
كامرة لاهوت
وقناة الرب اسمهه
عيله مسبيه
وتنقد كل ظلم طاغوت
هذا اعلام طف الله
ومصاب حسين
ضل عايش ولافايت عليه الفوت
ليل وهندس وهوسة هدوء وموت

#حسين_علي_الياسري

خويه بعدك مالي حيله وابقه وحدي
ومن تناشدني العقيله هذا ردي
راح اخويه. راح اخويه
______
خويه راح الحيل من عندي وتهدم
من اجيتك اركض واوصلك اهتم
ولمن شفتك عالوطيه مغرگك الدم
متت يم كل خطوه حد باب المخيم
راح حيلي والحزن بس هو عندي
ومن تناشدني العقيله هذا ردي
راح اخويه. راح اخويه
____
حيلي راح وعثرت الخطوات بيه
لأن اعرف رايح ومترد اليه
وبعدك فگدك خويه تحلالي المنيه
بموتي اصَّبر روحي يالمبعد عليه
راح حيلي وراح فرحي وراح سعدي
ومن تناشدني العقيله هذا ردي
راح اخويه. راح اخويه
_______
خويه حزني اعليك ما ينفك حداده
وبعد ماباقي فرح متمر سعاده
اله اخلي الرمله تصبحلي وساده
لأن بعدك صارت الدنيا سواده
إلا اموت بفرگتك ياخويه وعدي
ومن تناشدني العقيله هذا ردي
راح اخويه. راح اخويه
_____
من تناشدني العقيله عنك انته
والمفارگ تفضح الحرگه نضرته
والدموع التنزل اعله خدوده سكته
ذني كلهن بيه من وجهك فگدته
وطيحة العامود يعني راح سندي
ومن تناشدني العقيله هذا ردي
راح اخويه. راح اخويه
_____
خويه وجروحي بثگل حمل العقيله
من اگللهه الخدر رايح كفيله
خويه والله موتتك كلش ثگيله
اكثر احزان البشر فگدة خليله
خويه غرگان بدموع الحسره خدي
من تناشدني العقيله هذا ردي
راح اخويه. راح اخويه

___
#حسين_علي_الياسري

الدمعه باب

ياحسين الدمعه انه احسبهه باب
ومن تدگه جفوف غربه وتفتحلهم
يشهد الله احرمهه حتى من السراب
انت حزني الناس المن احزن الهم

الله لايبعدني عنك
ياحسين ازگيني حزنك
انه عايش مو لواحد
انه اعيش ابجي اعله ضعنك

گلبي وعذابه وضيمه للخيمه منذور
معبد لطم اهاتي ودمعاتي عاشور

جوه الضريح شمحله الونين
ريحت ضريحك جنه يحسين
ياعطر شاخ اعله البساتين
____

انت يا لذة شكو بهل الدنيه زين
هاك گلبي لتزمه بيدك وانت سيره
الله لا يحرمنه منك ياحسين
كلبي بينك بين دنيه شلون اخيره

گلبي ما يحتاج غيرك
ياحسين انه اسيرك
لغيرك ايدي ما امدهه
وانت المغركني خيرك

يل كبرتني بزودك لزنودك ممنون
يلحبك بوجداني خلاني مجنون

يانهر فايض خيره للناس
انه بخدمتك رافع الراس
ممنون منك ياخو عباس
___
ياحسين الدمعه تزكية العيون
وانت من فضلك نعمت اعليه بيهه
من يمر اسمك يغرگهه الجفون
بفضله اسمك عيني تتزكه ابچيهه

واجب اعله دموعي تجري
مو اريدن منهه اجري
نعمة الشوف لشكرهه
ابچي لاسمك طول عمري

يالمنطي نعمة عيني. يحسيني. مطلوب
كل دمعي لاجل مصابك. وأحبابك. مصبوب

يالمنطي نعمة شوف العيون
لو نشفت من دموعي الجفون
يمك امد جفوني ماعون
_____
كلشي من ايدي اريدنه يروح
وكلشي من ايدك يضل وياي أريده
انت ايدك خير يمزكيلي روح
انه من حبك شفت اصل العقيده

ردت حبك يحتويني
وكلشي منك صار ديني
مو فقط بس بالعواطف
اعتقادي انت ويقيني

شفتك وسيله وغايه. وحچايه. و الدين
لازم اهيم بدربك. وبحبك. يحسين

ياغاية الله ودينه كله
يمخلي كل الصعبه سهله
رايد فقط گلبي تقبله
___
الدنيا هندس وانت حبك بيهه نور
المايلامس حبك اعمى بلا بصيره
وعطرك يفوح ويضم عطر البخور
واليشم عطرك يضل كل عمره اسيره

من الامس حب حضرتك
وابقى احس لوعة حسرتك
يعني من بُعدي وضياعي
لملمتني بفي نضرتك

ياللملمتني بحبك. وبگربك. ناخيك
ماريد اصيرن مره. لو ذره. ناسيك

ماريد ابد لو لحضه انساك
رايد اعيش بحزني وياك
وكل عمري اضل ياسيدي انعاك
__

#حسين_علي_الياسري
#مؤمل_لؤي_الربيعي

جسمك عالارض.      يالشابع ضمه
قربان العشك.           قربانك دمه
يحسين قربان العشك ربك متت
ولهذا ثار الله الجبير انت صرت
_
يمضحي نحرك والولد
وبدمك ال عالرمضه
كل هذا وتنادي يرب
خذ مني حتى ترضه

يمضحي كل غالي.           يالنلت البر
لخاطر امر ربك.              دمك يگطر
فرض العشك يحسين.     بي چان السر
بالدم يتم فرضه

عشكك بي فرض.     بين كل عشگ
ينطي شما ملك.       كل عاشگ صدگ
فرض العشگ عن وقته ابد ما اخرت
ولهذا ثار الله الجبير انت صرت
___
ياعاشگ بربك همت
يالكلشي منطي الربك
يالحيرت اهل العشگ
قدسته بالدم حبك

يالقدست حبك.         موكلمن حَب
كون اليحب يفدي.     بكلشي اليرغب
يالي عبرت البِر.         بمرضاة الرب
چيه لله بس دربك

يم باب العشك.      اسمك ينكتب
كون الي يحب.         مثلك من يحب
يالعاشك الباري وفقط باسمه ذبت
ولهذا ثار الله الجبير انت صرت
_
عطشان دين الله صبح
وبدمك انت اترويه
هذا الفهم مو لاي بشر
بس انت تكدر تحويه

كلش صعب امره.      وانت الاعلم
دين النصر بالدم.        خاطر يسلم
يانور الاهك بيك.          والكون اظلم
وبنورك تضويه

يالكلك فضل.     يا اقدس فرض
تتشكرك تضل.     واجب عالارض
چيفن عليهه ياحسين اتوسدت
ولهذا ثار الله الجبير انت صرت
___
ياچلمة الله الي انحچت
گول وفعل من نحرك
چم ايه يشرح مذبحك
عن العطاء وصبرك

چم اية من ربك.     .    فسر وضعك
خاطر يطش رحمه        ترضرض ضلعك
وخاطر يضل بصمة.       طايح صبعك
يالخلدت ذكرك

يالنحرك رسم.      قرآن النصر
يقتص بالدمه.        من سيف العصر
كل ما يمر عنك زمن تبقه وعشت
ولهذا ثار الله الجبير انت صرت
__
يالجسمك بطف نينوى.               
روه الترب من دمك
صح جسمك انت اعله الثره.
بس الاصح عالي اسمك

يالجسمك اعله الكاع.      دمك جاري
عالغبره بالصحراء         جسمك عاري
بس عالي ضل اسمك.     ثار الباري
ثار الله ويلمك

ياثار العرش.            باچر محكمه
القاضي المنتظر.       واسمك ملهمه
ثارك يرده المنتظر يالماطحت
ولهذا ثار الله الجبير انت صرت
___
ياثار الله تقدست
چيه قدست امر الله
خلاك ربك بالعله
وسلم عليك وصله

ثار الله من ثارك.       ياثار الدين
لازم يرد الحگ.         لو بعد سنين
يالعالعرش مكتوب.    اسمك يحسين
من الاله اصله

من ربك صبح.        ثارك بي وعد
يرجعلك نصر.       شما طال الامد
لازم يرده بأي زمن وبأي وكت
ولهذا ثار الله الجبير انت صرت
____

#حسين_علي_الياسري

إذهَب بِنَفسي انتَ يا انا
فأن بَعُدتَ لا ارى الهنا
ياهيبتي.      وقوتي
__
إذهَب بنفسي يخي صوب النهر
انت سيفي بساعة الشده انشهر
اني شمسك من اگول بنفسي الك
يعني تعكس عن ضوايه ياگمر

انوارك انواري.        ياسري واسراري
اتشكر الباري.           چيف انت الي قدر

أشكُر إلهي يا أخي عَليك
أدعو بقلبٍ صابرٍ إليك
يانعمتي.     وقوتي
__
يا أخي إذهب بروحي للحرب
انه روحي وياك راحت والگلب
روحي ما خذهه ويه روحك عالعده
انت يحزام الضهر بين الغرب

يانفسي يا انفاسي.         واحساسك احساسي
بيك ارتفع راسي.            من دونك اتحير

أركب بروحي يا ابا الوفا
من زمزمٍ كفيكَ والصفا
يا عدتي.        وقوتي
____
خويه يا سر الهنا لا تبتعد
كلبي لاچمني تروح وما ترد
تدري ضهري وانت واكف ماحنه
خويه لاتحنيلي ضهري بالفگد

يمعلگ بروحي.         لاتلچم جروحي
من تبتعد نوحي.        گد الدهر واكثر

فإن بَعُدت ضَهريَ إنحنى
عباسُ يا آمالي والمُنى
يارجوتي.    وقوتي
___
خوية يا حامل لوائي بالطفوف
نضرة موادع انه بعينك اشوف
خل اشَبّع اعيوني بچفوفك نضر
هاي اخر نضره مني لهالچفوف

ياخوية مااعوفك          خل روحي بچفوفك
خافني ما اشوفك.           بچفوفك اتصبر

كَفاكَ تَفدي الدينَ بالدِما
والآهِ فيها تَصرَخُ السما
يامُقلَتي.     وقوتي
__
ها يخويه وضهري بعدك ينكسر
وبيه يتشمت عدوي بهالامر
خويه وتقل حيلتي بفگدك تره
من بعد فگد الاخو شيسوه العمر

ياهو اليشد ازري.       وشيبقه من عمري
بفگدك كَسِر ضهري.      خويه الحزن يكثر

كفيكَ للأمانِ يا عظيم
شيطانهم من كفكَ رجيم
يارحمتي.       وقوتي
_
خويه من استأذنت مني ورحت
گتلي اجيب الماي اموتن ماگلت
راح كل حيلي لمن شفتك مشيت
وانه من شفتك طحت خويه طحت

و اتعثرت اجدامي. لمن طحت دامي
جيتك وانه ضامي. وامشيلك واعثر


إنّي أتَيتُ يا أخي وحيد
مابين اعدائي وحزناً شديد
ياحَيرتي. وقوتي
____
#حسين_علي_الياسري

دماعتي طاحن لمن جفاني
بونين..حسين.. عنّي يهاجر
ادريه يطول مابيه اتاني
بجروح...انوح..حزن المشاعر

راح حسين بضعن جروح
بمگفاه گلبي باقي ينوح
صح ما اخذني بضعنه وياه
لاچن دزيت انه الروح

دزيت انه الروح تمشي ويه الضعن
وگليبي كلساع باحزانه انطعن
من راح الحسين دمعاتي تصب
واصوره بالعين. مابد ينسن
__
رايح انيسي وضليت انادي
بنين..سنين.. فدوه الرجعته
ماهمني ولدي فلذة فؤادي
يعود..يزود.. عمره وضحكته

فدوه اتروح اربع اقمار
بس حسين يرد للدار
كلشي افديه بس سالم كون
و بيوم الطف ما يحتار

كلهم فده اتروح. اولادي اله
بس كون الحسين. ميصيبه بله
انه ام البنين. بس فدوه الولد
بس سالم يعود. من طف كربله
____
سالم يردلي امنيتي يرجع
دعيت .. يريت.. يرجعلي سالم
ادعيله وابچيه وعيوني تدمع
بچيت _ نعيت بس ادري لازم

ما يسلم ضعن الماشين
بالطف يوگع ماي العين
بالطف ايصير اللي يصير
وما يرجع سالم الحسين

ما يرجع الراح من هذا السفر
وتغدره الاوغاد. ويخونه الدهر
والاربع اولاد. يفدونه النفس
محني الظهر لين. يفگدله گمر
_____
آ ياحسرتي وگلبي بفرگته
جريح ..يصيح .. كل نبضه باسمه
آ يا جراحه وآ يا دمعته
الحبيب..بنحيب....فارگني رسمه

وبگلبي وحسراته شلون
من يحزن وين الگه العون
چان بحزنه يصبره حسين
وهسه فراگه يبچي عيون

يامن يصبر. گلبي بهالجفه
ودمعي انه كل ساع. عالخد انچفه
شينشف الدموع .. والرايح نظر
عيني ونضرته.. معنى العاطفه
_____
من الهم دليلي مشتعله ناره
الدليل...ويميل.. كل لحضه حالي
لني ادري ضعنه يرجع باساره
عجيب..غريب. وفاگد غوالي

ضعن البي قائد مهيوب
انه ادري يرجع مصيوب
يرجع فاگد قائد حيد
ويتسمى ضعن المسلوب

ضعن الكلافه..يمشي للأسر
الراح بنسيمه..يغطي كل عطر
راح شحلاته..والقائد كلف
وسفه وحسافه..يرجع منكسر
____
#حسين_علي_الياسري