tgoop.com/hussein_alekaby/2050
Last Update:
قصيدة للسيدة زينب ع
مسبيه. شافوهه. بت حيدر شلون
شفناهه. سلطانه. حيا الله ام عون
نقراهه بسمله. شاهدنه كربله
…….
عميانه الكلوب. وتشوف مكلوب
مأذنة الطف زينب صارت. صوت الحريه
كالو سبوهه. وعذراً لخوهه
حاشا لله ياهو اليكدر. يسبي العلويه
لبوة حيدر. خطنه الاحمر. والله ولاينعبر
من هيبتهه. ومن نظرتهه. ظل مختل الشمر
مهيوبه. قديسه. اخت الكمر هاي
العادوهه. ما باقي. بكصصهم الماي
الطف انتي بكمله. شاهدنه كربله
……..
نجمة سهيل. ضاويه الليل.
انتي العلمتيني الخدمه. وبكل احساسي
كل عام بالنوح. ناذرلج جروح
ومن طكت راسج بالمحمل. انه اطبر راسي
الدمعه الطاحت. منج صارت. لو موكب لو نهر
ياهو الشام. ومن يعرفهه. لو ما ضعنج حضر
ستر الله. من الله. باراهه جبريل
علويه. متعوبه. وتوزع الحيل
خدر الله واعتله. شاهدنه كربله
………..
انتي عنوان. رغم الاحزان
لوما انتي وشيلة راسج. ماظلت شيله
العبايه. سوده غايه
يعني تخلي الينظر اعمه. ولو صد ياويله
ليش الكعبه. هم متحجبه. تأكيداً للستر
راس الحرمه المايتحجب. ناقص دين وفكر
اختاري. وبكيفج. الدنيا مدوم
هالدنيا. مكضيه. يوم بأثر يوم
ولاهيه معضله. شاهدنه كربله
……..
الطف يأم عون. منج اخذ لون
لون الكلمه المصبوغه بدم .هيهات الكلمه
انتي الحضارات. وكل الديانات
عالتل بيدج عصة موسى. يشوفونج قمه
حاشا لله . واحد بالطف. منج لحظه انتقص
جدمج من داس. تراب الطف . خلينا عالكصص
مشكوره. يازينب. وبكد ضوه العين.
والعدنه. كل هذا . من خير الحسين
بالهيبه ياهلا. شاهدنه كربله
……
شفتج مناره . وخدمه وزياره
كبال الشامت هزيتي ايدج . ياروح الزهره
بالشام انتي. يوم الوكفتي
كل مثمر يرمونه حجاره. ويقدم ثمره
روحج ترجع. هاي الليله. وتاريخج بي فخر
خدام احنه. يظل موعدنه. وي جية المنتظر
نحچيله. نشكيله. نتأمل الثار
نتمنه. بظْهوره. نتسجل انصار
ماتبقه مشكله. شاهدنه كربله
……..
نسألكم الدعآء
حسين صادق العقابي
BY الشاعر حسين صادق العقابي
Share with your friend now:
tgoop.com/hussein_alekaby/2050