tgoop.com/husseinalialtaqi/695
Last Update:
كأني بمولاي الحسين ع
عندما هوى علي الأكبر ع
يالاكبر طايح ويـن دلـيـنـي بـروحـك
يل صايح بويه حسين لا تگطع نوحك
ياروح حسين،، ما اندل وين،، دليني بروحك
-----------------------------
أدركني أبه منها اشدهت حالي
يل صوتك عزيز وطابع ابالي
ولأن نبرة مُنازع هدت احوالي
والغالي تضيّعه طيحت الغالي
من أدركني احتاريت ياصوب امشليك
تيّهت وانه حسين ضيعني اعويلك
يل ردت امعين،، ما اندل وين،، دليني بروحك
-------------------------------
يل الطايح على التربان دليني
أشرلي تره وحقك عمت عيني
صوتك ياعلي چنه خذه سنيني
يل اميبس مهجتي وحيل رجليني
صوتك ضيعلي الرآي يالماخذ حيلي
لو ماتگدر وتگوم بأيدك أوميلي
معمية العين،، ما اندل وين،، دليني بروحك
----------------------------------
علي بويه وصلتك هذا انه يمك
عمت عيني لگيتك سابح ابدمك
صاير وصلة وصلة وبالله شيلمك
حيرة شلون اشيلك وارجع لأمك
شيلمك يل مدلول ياروح احسينك
يچبيري شصاير بيك ليش مطشرينك
رسومك طافين،، ما اندل وين،، دليني بروحك
----------------------------------
يخاطف لوني بويه شصاير بلونك
على الدنيا العفه لو غمضن عيونك
سعفه بريح أظلن تدري من دونك
الفواطم بالمخيم جاي ايتانونك
الظل بخيامي ايتانيك ياروح اخيامي
حيرة شلون ارجع بيك يل كلك دامي
ياتعب سنين،، ما اندل وين،، دليني بروحك
-----------------------------------
صعب فرگاك وگلبي بحبك امتيم
بس موتك اشوفه راحة من كل هم
ساعة وبيك الحگ والشمل يلتم
يل عطشان بالحر وبنزيف الدم
روح اهناكه ايرويك جدك من مايه
ساعة وراح الحگ بيك نلتم بفيايه
ويلمنه البين،، ما أندل وين،، دليني بروحك
-----------------------------------
حسين علي التقي
BY حسين علي التقي
Share with your friend now:
tgoop.com/husseinalialtaqi/695