tgoop.com/hxzeu1/72436
Last Update:
يا جداه .... جروحي ما الهه شفه امن الناصبية
يا جداه .... تشبه اجروحك ابدوس الاعوجية
صدرك بحافر تدمه
وبالبقيع اكبور أئمه ..... هدموهه ... هدموهه
.....
ياجد يحسين ... بدموع العين
احجيلك قصة اَلأمي
ابطفك مجموع ... حافر واضلوع
ومنحر مكطوع ودامي
فجعوني جدي ابذبحتك ... واليوم هم فجعوني
اكبور الايمه الطاهره .... هدمو اكبال اعيوني
بين البقيع وكربله .... حاير صرت خلوني
ما انساه ..... يوم طاحت عالارض ذيج المناير
ما انساه ..... عايشه ابروحي مثل صورة العاشر
جسمك امطشرين لحمه
وبالبقيع اكبور أئمه
......
انه الموعود .... ايامي شهود
ما شفت بعمري الراحه
ماظلي احباب .... يوميه امصاب
مخلص ايامي انياحه
يوميه ذابحني شمر .... بمصابكم يحبابي
جبت العمر قهر بقهر ... مكتوبي الي بكتابي
ماعندي بيت الاكصده .... فوك الهضم ومصابي
ياهو انخاه .... من اطيحن بالشدد غيرك يجدي
ياهو انخاه ....ماكو واحد كلبه مثلك على المهدي
سري بس يمك اضمه
وبالبقيع اكبور أئمه .... هدموهه .... هدموهه
.....
لا عندي امجان .... لا عندي اخوان
اشكيلك حالي اوضعي
ياجد مكسور .... كلبي العاشور
محتاج اليمسح دمعي
مارحمت الدنيه ابد ... بية يعز من روحي
وحدي غريب ابلا اهل ... خلتني اني ونوحي
والهدمو كبر الحسن.... هدمو يجد اصروحي
اه واه ... لا صحن ضلتله لا ضلتله حضره
اه واه ... وي ترابات اللحد ساووه كبره
بس عطر ظل النشمه
وبالبقيع اكبور أئمه
........
عايش محتار ... وبكلبي النار
بعداي ارد اطفي ناري
كل يوم ايفوت .... يلفيني الموت
يا جدي اتأخر ثاري
كل يوم اليمرني بسنه ... كضيت هاي ايامي
الليل اخلصنه بجي .... والسهر باك احلامي
ثار الضلع ثار النحر ... ثار السبي كدامي
الحيل اذاه ... كلبي صوت ارقيه من اتصيح بابه
الحيل اذاه ... سبي عمتي زينب بذيج الخرابه
النه ما مسبية حرمه
وبالبقيع اكبور أئمه .... هدموهه ... هدموهه
.......
جيت ابلا روح... شبه المذبوح
يوم العاشر هد حيلي
كل يوم امصاب ... وطولت اغياب
ابتعجيل الثار ادعيلي
كلما اشوفن مقتلك ... بية تشب نيراني
حرك الخيم ركض الحرم .. خلتني اخاوي احزاني
وراسك الشالاه الرمح .... ابجي دمه خلاني
واويلاه .... الكطع منك منحرك كاطع حياتي
واويلاه.... والسلب عماتي سلب ذكرياتي
صور انظر هضمه هضمه
وبالبقيع اكبور أئمه .... هدموهه ... هدموهه
........
جرح الايتام ... واجروح الشام
اكبر جرحين البية
زينب لسوك ... جابوهه بنوك
هزل ويلي ومسبية
ديوانهم عمتي ادخلت ... هاي الي صعبه احجيهه
امكيديهه بحبال اليسر ... شمات تنظر ليهه
اجروحي من طف كربله ... ما واحد اليشفيهه
يا جداه ... لو رجع عمي ونظر حال العقيله
يا جداه ... جا محه الشام ابهلهه ورد عليله
لو يصح يكعد واكلمه
وبالبقيع اكبور أئمه .... هدموهه .... هدموهه
.......
كلمات
✍موسى الخادم
BY الناشر مصطفى المياحي
Share with your friend now:
tgoop.com/hxzeu1/72436