" اشتقت لك واللقا معقود بالمستحيل
‏و الروح تطفي من الوحشه قناديلها

‏ارسل سلامك ليا هب النسيم العليل
‏النود ماهيب تبطي في مراسيلها

‏وعذّبني فـ كل شي ، الا عذاب الرحيل
‏عيني ماهي من مزن يوم انك تخيّلها"

‏"تلاحق الوقت لان العمر ما عدّا
‏وأنا انتظر لا يموت الشوق بغيابك

‏للحين وجهك ملاذ وصوتك مبدّا
‏وللحين عذري يسامح جملة أسبابك

‏لا قلت أحبك أبيك تحبني جدّا
‏ترى بقايا العطر تستوطن ثيابك"

"‏لو تذهله نجمة ، و يغريه قنديل (:
‏لو يلعب بنار البطا و الجفيّا

‏قلبه عسفته بالهوى مثل ماقيل
‏يلعب وانا حبل الرسن في يديّا "

"‏ودي أغمض على دمع العيون عيوني
‏وأقفل أذني عن جميع اللي تحب وتكره

‏خاطري سامح وخابت هقوتي وظنوني
‏ مثل طيرٍ فارق سبوقه وفارق وكره

‏أعتذر للي كرهني قبل من حبوني
‏يمكن إن الكره صادق والمحبة سكره"

‏"حْبال الأفكار حرّك -ريحها العاتي-
‏غصن القلق في صحاري البال ورسومه

‏وشْعوري المستريب، وشكّي الذاتي
‏قادوني لمرحله ماهيب مفهومه

‏ما أدري على وين نيّاتك يا خطواتي
‏صاحبك ضيّع قبل وجهاته علومه

‏متمسّك فـ فرصته وفـ يومه الآتي
‏والظاهر إن يومه اللي يرْقبه: يومه"

"أحنّك من دموع التفرقه والحزن بعد البين
‏ومن صمت الوداع، وعبرةٍ فالحلق جَرّحتْه

‏ومن هالليلة الليلة.. ومن بكرة ومن بعدين
‏ومن ليل الحنين وشوقه وباقي أسلحته"

"من ريبة النفس، وإلّا شرْهَة أحبابي
‏ملَّت عيون السحاب، وسالت الدمعة

‏يا الله لا تاه الكلَام.. وضَاقت رْحابي
‏سخَّر لي إنسان يدعي لي مع الجمعة."

‏"يطل القمر ولا يغيب القمر .. لا باس
‏الاغلى تهون بـ حضرته ، قيمة الغالي

‏عن الطلة اللي تنتظرها جميع الناس
‏أنا فـ انتظار !.. الطلة ، اللي على بالي"

"والله مدري وش آقول .. ووش اخلي
‏من يوم قلبك وعدني واختلف وعده

‏وشلون ابنسى هذاك اليوم .. يا خلي
‏يومٍ !.. عن الواقع الملموس يا بعده

‏شكراً جزيلا على جرحك هذاك اللي
‏ماعاد حسيت بـ جروح الزمن بعده "

" تهيّا لـ الشتا صدرٍ صريره من صرير الباب
تلاعبه الهبايب .. مثل ما صدّك لعب فينا

جعل يسقی شتا عامٍ ندوّر لـ الكلام اسباب
و اذا لحْق السوالف برد ، قصايدنا تدفینا

تباعدنا .. ما كنّا يومٍ من العمر كنّا قْراب
و تبهذلنا ، و تشتتنا ، قبل تتشابك ايدينا

أجامل نفسي بـ قولة بخير و خاطري قد طاب
و انا الله يعلم فـ قلبي و فيني .. ما تخطّينا

فتق صدري تنهاتي و لحقه من الحنين اتعاب
و غدت كل حاجةٍ بعدك تضحكنا ، تبكينا

خذانا الحلم في غفله .. و رجّعنا الزمان اغراب
و على الله .. كل ما تطري علي و اذکر ليالينا

يجوز ان الليالي ما تخلينا نعود احباب :(
و لكن الأكيد أن الليالي .. ما تنسّينا "

" أنت لا رحت غالي حيل وإن جيت غالي
مير ياليتك - تصون الغلا والمحبة -"

"ليلة من ليال الشتا والهوى الهاب
‏يلعب بـ روحٍ .. ما قدرت أحتويها

‏متعلقة نفسي ورى .. درفة الباب
‏تسعى ، خلاف الحاجة اللي تبيها

‏ذكرى ووقتٍ راح .. و وجيه غيّاب
‏قانع .. بـ فقدان الأمل ، وأحتريها

‏مالي سوا السجادة الليلة أحباب
‏بـ آمدّها .. وآسوق نفسي ، عليها

‏ياربي أنقذني من أعراض وأسباب
‏الوحشة !.. اللي قاعد آحس فيها"

‏"متى يحن الحنين و يعتق نْعاسي
‏من حبك اللي تعتّق في شراييني

‏فاضي ومن ذكرياتك ممتلي راسي
‏والمؤلم إني ذكرتك وأنت ناسيني

‏اليوم ماكل كلمة تجرح احساسي
‏ولا يعّنيني إلاّ شي يعنيني

‏شعوري إنّك مخليني ماهو قاسي
‏القاسي إنّك قدرت إنّك تخليني"

‏"في طريق الردى المليان غدر وشماتة
‏ماني بْـ مستغلّ الفرصة !.. إليا تهيّت

‏وش يعذّرني مْن اللي ، عطاني وصاته
‏مستحي منه حيّ ومستحي منه ميّت"

"دريت اني سمحت من المواصل يوم دمعي سال
‏وانا تحت المطر.. طرِّيت حيِّيني وامواتي

‏ولا اجهشت بْدموعي في رجا تتحسن الاحوال..
‏ولا كانت عسى ربي يردِّك ضمن دعواتي."

" يا حظ من لا عرف منهو ولا شيف
إن طاب يحمد ، وإن تردى .. بكيفه "

"بلاني والا أنا ماكنت اعرف إن الهَوى غلاب
ياليته صد عني قبل أجيه مشرِّع أبوابي"

"كنت اسمع الشعر واتهجاه واستعذبه
‏واخايله برق وسميّه لو انه سراب!

‏-يمرني وجه احبه بيننا كم شبه
‏وادفن بقاياه ما بين الخطأ والصواب-

‏آحن وألقى .. جفافه روضةٍ معشبه
‏وتموت لهفة سؤاله في جحيم الجواب

‏كذا .. تسللت لـ انفاسه وجيت اكتبه
‏حرفٍ تعلقت في ظله وطاح الغياب"