tgoop.com/jawadkr/813
Last Update:
يادنيا غري غيري....يادنيا غري غيري
غداره انتي وضحكتچ يادنيا مدوم
لا ماتغريني ابفرح وافرحلچ ابيوم
---------------------------------------------
انه حيدر يدنيا وانتي تدريني
مااطخلچ ابد هام وتخدعيني
ماتغريني بغرورچ ماتغريني
بثلاثه مطلگچ يادنيا عوفيني
يادنيا اگطعي ضنچ...يادنيا اگطعي ضنچ
مابيچ بس حزن وقهر ومحمله اهموم
لاماتغريني ابفرح وافرحلچ ابيوم
-------------------------------------------
عوفي يادنيا كل هذا الامر عوفي
ماتخطرين اعله بالي وحتى بطيوفي
شكم عزيز الي اخذتي من وسط شوفي
شكم حبيب الي دفنته بدمعي وچفوفي
يالطبعچ الخيانه.....يالطبعچ الخيانه
من گد مصابچ والنوايب گلبي مالوم
لاماتغريني ابفرح وافرحلچ ابيوم
-------------------------------------------
شگد اخذتي من اهلنه الچنه وياهم
ومثل روح بجسد يادنيا نرعاهم
فارگونه وبقت بس دمعه ذكراهم
فارگونه يادنيا اوين نلگاهم
يمفرقه الحبايب....يمفرقه الحبايب
ومعيشه كلمن فاگد بلوعاته مهظوم
لاماتغريني بفرح وافرحلچ ابيوم
------------------------------------------
يلي عمرچ حزن ومصاحب الدمعه
وامنياتچ خيال وضحكتچ خدعه
ماتمرين بخيالي ماالچ رجعه
يالخطفتي من اديه محسن البضعه
يالصحبتچ ندامه...يالصحبتچ ندامه
وبيچ المنايا اعله الخلگ مسروجه وتحوم
لاماتغريني ابفرح وافرحلچ ابيوم
-------------------------------------------
يالتركتي مكان اهل الكرم خالي
يالاخذتي هلي غالي بأثر غالي
خذتي مني محمد حصني العالي
وروعيتي يدنيا بفاطمه اطفالي
بعيني يدنيا شفته...بعيني يدنيا شفته
ضلع الزچيه الطاهره من العصره مهشوم
لاماتغريني ابفرح وافرحلچ ابيوم
--------------------------------------------
يلي دار النوايب والندم دارچ
وياي ثارچ قديم وماخلص ثارچ
ادري بطفوف المنايه تحضر اشرارچ
وتحرگ اخيام الفواطم بالحقد نارچ
ماانثني وساوم......ماانثني وساوم
شما جرتي بسيوف الذبح واشكال السموم
لا ماتغريني ابفرح وافرحلچ ابيوم
( جواد كاظم الگرعاوي)
BY جواد كاظم الگرعاوي
Share with your friend now:
tgoop.com/jawadkr/813