tgoop.com/juratwaay/1706
Last Update:
بمناسبة عيد الحب
اريد احجي عن النقيض المظلوم والي مشوهين صورتة.. الكره !
الكره هو من اوضح واصدق المشاعر البشرية
كل المشاعر الثانية ممكن تتوهم بيها عدا الاحساس بالكره الي تكدر تتاكد منة من اول احساس يجيك تجاه اي شخص او مجموعة او فعل
وصح الموضوع يحتاج شجاعة للكتابة عنة ..
بس الكره حالة صحية ومفيدة!
وببعض الاحيان اجبارية لتقويم الفطرة السليمة وتأكيد واظهار الوعي الاخلاقي
يعني شنو مثلا تريد ما تريد تكره المجرم والقاتل والحرامي؟
اصلا انت بالذات اكيد عندك ببالك كم شخص كلش سيء وشرير لدرجة من واجبك الاخلاقي تكرها وما تحبة .. اذا ما تكرها معناها اكو مشكلة بمعاييرك الاخلاقية
لازم تكره الي يأذيك ويجرحك ولازم تكره الي يغشك ويظلمك
ولازم تكره الشخص الي نصب عليك وباكك
والي غشك وجذب عليك وخانك
والي قشمرك كل مرة ويصعد على ظهرك
لازم تكره المتنمر الي يأذي الناس
والشاب الي يبتز البنات
لازم تبدي تكره حتى تعرف تطلع من دائرة الخداع الي عايش بيهه
علموك ان الكره مو زين والحب هو الاساس الي لازم تتعامل بي وية العالم
بس نسوا يكلولك اكو حب يخليك تصير اثول وفطير
واكو كره يخليك انسان واعي وعندك بوصلة اخلاقية شغالة وتعرف تاخذ موقف بالحياة
نسوا يكلولك انو مو كل الناس طيبين .. واكو ناس اشرار تستحق الكره
الكره مو معناها احنة ناس مو زينين .. معناها انو عندك مستوى وعي اخلاقي وتعرف تقيم الناس
الكره الواعي هو طريقك لفهم الواقع وأخذ مواقف حقيقية.
مو كل الناس يستحقون حبك، بس محيطك يستحق تقييم أخلاقي صادق
تعلم توازن بين حبك وكرهك بنضج،
التغيير الحقيقي يبدأ بالكره الواعي .. مو بالحب المفرط السذاجة
#ما_لم_يلقه_لقمان_لابنه
- علي جليل
BY جرعة وعي
Share with your friend now:
tgoop.com/juratwaay/1706