tgoop.com/karar9497/3422
Last Update:
كل لحضه من دنياي
ابلا خدمه يامولاي
نادم عليهه هواي
.....................
ضاع العمر يابو علي .. ونادم اجيتك
اسف عله كل ثانيه.. البيهه نسيتك
ضعت بزمن كله وهم.. وشكد جفيتك
من زغري حد ماشيبت.. يالله اعتنيتك
يابو المحنه.. يالضامي گلبك.. اقبلني يمك
مقصر واجيت انخاك
يحسيني واترجاك
دونك ايام اصباي
....................
بيه الخجل ياكل مثل.. عله وخفيه
خايف انه وكل خوفي ما.. راضي عليه
عبدك اضل خادم الك.. يبن الزجيه
ماريد اضيع اكثر بعد.. الزم بديه
الخاطر دمعتي.. يابو رقيه.. مذنب وجيتك
ايامي كلهه هموم
ماذكرك بكل يوم
من اشرب اني الماي
..................
عيشني بس لمصيبتك.. وجروحك انته
وعوضني عن ذاكه العمر.. بيدي خسرته
خلي يهيم بغربتك.. گلبي بجمرته
ومن ينذكر اسمك تصب.. دمعاتي سكته
يا رحمة الله.. ماعندي غيرك.. حاير وندبك
حزنك يشيب الراس
يالفاكد العباس
بسنيني تاه الراي
....................
بالدنيه خاسر سيدي.. المتشوفه عينك
يحسين اجيت وسلمت.. روحي بيمينك
دكيته بابك وانتضر.. نضرة حنينك
وفقني اخدم ومشي الك .. يوم اربعينك
بحزاني اطوفك.. وابجي الغربتك.. واذكر اضعونك
واصرخ بدمع العين
ماعندي غير حسين
جنت اني مو وفاي
......................
الليل اليمر اعله الخلك.. كون انه اساهر
وبروحي اكتب كل جرح.. من ضهر عاشر
يحسين طفك كل وكت.. يحيي الضماير
ماانسه يومك لاوحك.. كطع المناحر
تلجمي أريدك.. يابو العليله.. الضلت تتاني
كل يوم اعيش أحزان
والمجلسك لهفان
اعترف وبمبجاي
........................
روحي ترد والله لون.. شفت المناره
يرتاح گلبي بحضرتك .. اطفيها ناره
كون اكضي عمري بالصحن.. يابو الحياره
من روحي امل وما امل.. من الزياره
اشتم عبيرك.. وبابك اسجد.. يحسين احبك
يالساكن الوجدان
وبكل زمن سلطان
لو منته ضاع ادواي
محمد العقابي
https://www.tgoop.com/karar9497
BY الرادود الحسيني سيد كرار الحسني
Share with your friend now:
tgoop.com/karar9497/3422