tgoop.com/kararalmohmdawy/569
Last Update:
حسين ياثار الله ..حسين ياوجه الله..حسين ياروح الله
يا أسم دمعة يخلق بينه
يا أسم عالهوى يدلينا
بالگلب أحرف الحب هايه
بالگلب انت يا بو سكينه
حبك يغذينه يروح ويرد بينه
ما غيره مهجتي وروح الگلب
ما غيره جابني من ابعد درب
بس هوه يدلي بالحب الصدگ
بس هوه عرف والوادم غرب
حسين اي وا ويلاه ..حسين ياوجه الله..حسين ياروح الله
................
لو صحت يا حسين بروحي
لو صحت تفز روح جروحي
هالملك مِلَك كل وجداني
هالملك خلق دمعي ونوحي
وحي للحب يوحي أقره عن مذبوحي
بعيوني دمعة من ذاك الألم
بعيوني طفل يركض وانهدم
ياخذني صدى صوته لكربله
ياخذني اهناك يم ذيج الخيم
حسين يانور الله ..حسين ياوجه الله..حسين ياروح الله
..............
هالصدى يمر بين أوقاتي
هالصدى جمرة يترك ذاتي
من قبل الف عام وزايد
من قبل يحجي وي دمعاتي
وتشتعل جمراتي والگه روح آهاتي
ما باجي حتى لو دمعي يهل
ما باجي دمعة الصعدن هزل
المغربة بضعن دمعتها گلب
المغربة تموت كلما تنسأل
حسين يا أسم الله ..حسين ياوجه الله..حسين ياروح الله
................
واليحب يعيش دمعه احساسه
واليحب يخلص بأنفاسه
والوجود يشوفه بس محبوبه
الوجود حسين وي عباسه
رفع للحب راسه الناس ابد مو ناسه
ما تدري الناس ما عاشت جرح
ما تدري احجاية مرت منذبح
ما منطين حگ هالحجاية ابد
مامنطين بجي لراس اعله الرمح
حسين يا كهف الله ..حسين ياوجه الله..حسين ياروح الله
...........
يا جرح هالضمائر مرها
يا جرح مر هوى بمجمرها
كُلَّ يومْ كون للحب دمعة
كُلَّ يومْ انعيش بيه عاشرها
عاشوراء جمر عابر عالزمن
عاشوراء حزن نسوان انسبن
مسبيه درب ينطيها لدرب
مسبيه من وطن للا وطن
حسين يا حصن الله ..حسين ياوجه الله..حسين ياروح الله
BY الشاعر الحسيني كرار المحمداوي
Share with your friend now:
tgoop.com/kararalmohmdawy/569