tgoop.com/kararalmohmdawy/571
Last Update:
الليلة بحماك جفني ساهر
وعشرتي وياك تگضي باجر
انا البوجودك أميره الليلة يمك كلي حيرة
عشرتي وياك تگضي باجر
...........
خويه وياك بس ليلة خلالي الدهر گوه
بس باجر يبو سكينه وتخلص عشرة الخوه
اخر ليل بيه نورك اشوفه اعله الخيم ضوّه
صبحه ياخذك مني واضل بفراگك اتلوه
ليلة اوداع ومصيبة
تخلص وباجر غريبة
من زمن ميت ضميره الليلة يمك كلي حيره
عشرتي وياك تگضي باجر
.........
بعدكم يمنه يبن امي وضج بين الخيم نايح
شسوي بليلة اوداعك وانه ادريك الصبح رايح
بامانك عايشه الليلة بس دمع النظر فايح
باجر لا امان النه ويوصل للخيم صايح
باجر تروح الضياغم
ولا امان بلا هواشم
من صبح ياخذ عشيرة الليلة يمك كلي حيرة
.........
يلجنت من اگول حسين بس ادللي تگلي
حتى بنومتي توگف وبهدمك تضللي
مهيوبة عشت عمري النسمة بشور توصلي
افتر دهري واجه بليلة تبليني بوداع اهلي
يالتطيحون بنخوتي
بخيمتي التموا يخوتي
شم عطركم يا عبيره الليلة يمك كلي حيرة
.......
انه زينب فخر گومي عقيلة هاشم ام الراي
الشمس ما يوم شافتني الي ضل السيوف افياي
عگب گدري وعگب شاني صرت متحيره ابلواي
اشوفن هيبتي وصيتي حدهن للصبح وياي
الهيبة مرهونه بعلمنه
بطيحته يطيحن خيمنه
ليا ولي الناظر اديره الليلة يمك كلي حيرة
........
حاجيني يشيخ اهلي يا أخر نور لأهل البيت
أذن للصبح وانه لصلاة اوداعك توضيت
توضيت بدمع عيني وألك وانته عدل ونيت
عصر العاشر بيا حال اجي لجسمك واشوفك ميت
واعله تربان الصحاري
راح اشوفك خويه عاري
كلمن يروح بمصيره الليلة يمك كلي حيرة
كرار المحمداوي
BY الشاعر الحسيني كرار المحمداوي
Share with your friend now:
tgoop.com/kararalmohmdawy/571