tgoop.com/karbalahussein2023/52
Last Update:
العباس عليه السلام
مملوك العمر يا ناس بعت الدنيه و البيها
جنني هوى العباس روحي الجوده افديها
و اليعشق كفيل...يخسر مستحيل
بالأكيد
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
اذا اذكر اسم عباس الارض قبل السمه ترعد
اشوف الطير بيه المار يخشع يركع و يسجد
والله الماي يرجف خوف و بظهر الترب يلبد
و اذا چفه خطر علبال احس حته الفكر يشرد
بكلهن اول العباس صبره و غيرته و دينه
ارض الطف ترسها انهار لمن أشر حسبنه
واقع بالدليل...يخسر مستحيل
بالأكيد
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
عشقته و امشي بس اجنون بحر يتباها علساحل
الف موت و قيامة و نار ترهب هيبت الكافل
عساكر تمحي صدر الگاع اجت و الجايه تستاهل
موج الروس فوگ الغيم بين الصاعد و نازل
طب هيجت أسد للغاب و الكل تطلب الرحمه
و الروس اعله صوت السيف صارت بالهوى زحمه
شما مالت يميل...يخسر مستحيل
بالأكيد
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
ملكني من وصل للماي گلبه من العطش يلهب
و اجتمعت بشر و الجان كل ضنها الگمر يشرب
ذب طوله اعله چفه الماي ادري الماي يتعذب
غير اعرف طبع عباس ما يشرب قبل زينب
تأمرني يصيح الماي بكيفك و امتثل كيفك
وين اتريد اخذني و روح شيحمله زعل سيفك
لأمرك سلسبيل...يخسر مستحيل
بالأكيد
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
اكبر عاصفة اعله الماي هبت و الهوى يسعر
هيه الجايها العباس وين اليا كتر تفتر
شما يقرب صغير الجيش و هوه شما بعد يكبر
من دمدم عليها الموت صاحت يا نهر انغر
طشرها بمهب الريح صد لاخته و رجع لمها
مبحر و الزنود اشراع غصت كربلا بدمها
لا يوجد مثيل...يخسر مستحيل
بالأكيد
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
يذهل بالحرب عباس ما شايف هوى ينلم
هوه اول شخص بالكون سكت و اچفوفه تتكلم
نظراته حجر سجيل و سيفه اعله الرقب سلم
الشاف الراية من ابعيد يحير ييقضة لو يحلم
كلمن يوصل العباس حتماً ينحسم امره
اليهرب تره من السيف اخيال الكافل ايشطره
و الحتف المهيل...يخسر مستحيل
بالأكيد
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
من حقي احب عباس و اعذره الحقه ما يعرف
شما سولف عن العباس وحق عباس ما انصف
كلشي انذار ذاك اليوم طبيعي الموت من يرجف
من كد ما تطيح اجساد وحده الجود ضل ينزف
و بهذا الوضع زلزال كبر عاشت ايمينك
زينب ما تريد الماي تكفيها بحر عينك
والحب الأصيل ...يخسر مستحيل
بالأكيد
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
كلمات: جعفر الزرفي
BY الشاعر جعفر الزرفي
Share with your friend now:
tgoop.com/karbalahussein2023/52