tgoop.com/khaledalbderi/3931
Last Update:
وعيوني باول خدمتي مخليها بعيونك
وميت عدل ماعندي بس < يحسين ممنونك >
ماقصرت وياي •• فضلك عليه هواي
يحسين ممنونك
•••••••••••••••••
بالليل اصفن بالسما وبالدمعه اكتبنك
والله كل جرت نفس يحسين احبنك
مرات الزم صورتك واميه اشربنك
الف انعم الله هالسنه مخليني اخدمنك
بالبيت عدنا صورتك لمتنا جواها
كل ما تضكني دنيتي ابقى احجي وياها
وللصوره اجيبن ماي ••• ماقصرت وياي
••••••••••••••••••••••••
من ذاك عاشور الجزه شديت انه حزامي
وممنون منك سيدي جي طالن ايامي
ثوب اسود البس هالسنه يحسين بحلامي
وين انطي وجهي لياكتر. تتراوه كَدامي
عطشان خدمه كون اضل وبداعت ارقيه
وخل تزعل عليه الخلكَ وانت اقبل اعليه
انت المهم مولاي •• ماقصرت وياي
•••••••••••••••••••••••••
ايام عمري الي جزن هواي اخجل اذكرهن
بغيرك لان جنت التهي ومو انت شاغلهن
اتوبه اذا جدامي بعد يم غيرك اخذهن
وسنين عمري الجايه الي يم رجلك اشمرهن
الايام ماعدهن جنت يمشي الوكت كَوه
لمن خدمتك سيدي صار الوكت يسوه
حبيت عمري الجاي •• ماقصرت مولاي
•••••••••••••••••••••••••••••
و كل ما يمر اسمك احس بالدمعه تاخذني
ويجرني كَلبي المنكسر و ابكربلا ايذبني
ادبني اصيح برحمتك مولاي ادبني
وسويني زلمه يحب عزه شتريد رتبني
مو كَعده وتصفط حجي عدنا الرجل اسمه
عدنه اليخدمك سيدي هذا الصدك زلمه
مخليني اون بهداي •• ماقصرت وياي
•••••••••••••••••••••••••••••••••
لوجه الله اليخدمك نحس بعماله مقبوله
الما يخدمك مو حلو ونشوفه بي لوله
والما يرق كَلبه الك تضل ذمته مشكوله
الماااا فكر وبسمك سرح افكاره مشلوله
ياهُوُهَ يسوه وننشغل بعيونه ونعوفك
وكاع الله هاي انه اعتقد لازمها بجفوفك
بكيفك يموج الماي ••• ماقصرت مولاي
•••••••••••••••••••••••••••••••
و ما نبرح اعتابك عهد ونضل عمر يمك
منا لحد كطع النفس ان شاء الله نخدمك
ومن ايدنا نضيع الضنه انتيهه وانلزمك
هذا الهوه كَبالك خشن انعوفه ونشمك
لا ابرحَ البابِ عهد حتى تِعِدلوني
لو عيش وياكم عبد لو يعمن عيوني
منك اريد فياي •• ماقصرت مولاي
الحمد لله
BY الخادم خالد عبد السادة البديري
Share with your friend now:
tgoop.com/khaledalbderi/3931