tgoop.com/khaledalbderi/3942
Last Update:
واليبقى وحده بساعة الشدة
ينخه الحنينة ومايضل وحده
امان .. امان .. من الخوف إسمها
بساعة الشدة
****
الينخى ام عباس تخلص حاجته وخوفه
اليغركَ وينده بسمها تلزم اجفوفه
الكَلبه مكسور وغريب لعلته موصوفه
تفزع وتكضي الكلايف بهايه معروفه
الغركَان كون بفاطمه يندب
بيد العظيمه يطلع امجلّب
دعاء .. غريب .. كَوله بنحيبك
شراع .. جبير .. من الهم تجيبك
بساعة الشدة
**
بشده من تطيح جرب جرب انخاها
قبل ما تلفض اسمها وياك تلكاها
( جينه ننشد كربلا من الها تقراها )
حاجتك مكضيه يمها الشده تنساها
ام البنين ونعم من عدها
مد ايدك الها وعلي متردها
امير .. تصير .. بس جدي منها
امان .. وراك .. هيه وابنها
بساعة الشدة
*
فرج من تضيج اسمها وتزغر الوسعه
الغريب الضاع كلبه بفاتحه ترجعه
اليبجي لجل حسين ابنها تعرفه وتسمعه
ومنها بن حذلم توفق يندب وينعى
بالخدمة راجع كل أمر ليها
لو ناوي تنعى اتوكل اعليها
لعزاء .. وجوب .. لازم تحضره
اليريد .. دموع .. تسهله أمره
بساعة الشدة
***
لا تدك كل باب تندم والله تاليها
وباب ام عباس اجهبه واكصد عليها
بجاه زينب روح يمها وفاتحه أهديها
بدون ماتطلب تعرف الكلفه تكضيها
وباب العظيمه الطاهره اكصدله
تحيي اليموت المايل اتعدله
حياة .. حياة .. للموته تكتب
اليطيح .. يكوم .. بس بيها يندب
بساعة الشدة
*
خبزه للماعنده خبزه وضايع بهمه
والغريب العاش عمره ودنيته تهظمه
ينخى ام عباس خله وهيه التفهمه
حاضِرَه وَيا يَحِسها واقرب من أمه
من الها جلمت < يمه > تحجيها
ام البنين وياك تلكَيها
حنان .. حنان .. طاريها نعمه
خيام .. عليك .. رحمتها رحمه
بساعة الشدة
***
معلكَه الناس بشوارب وانه بمريه
هيه مو علويه لكن جنها علويه
عنها كالت ناس هاي الحرمه بدويه
واني اشوفنها ام كَمر والحسينية
لحسين انطت كلشي تتباها
ومن فوك الله كلشي انطاها
دعاء .. دعاء .. والله اليسمعه
وتريد .. يصير .. اهديها ركعه
بساعة الشدة
****
الحمد لله
خالد عبد السادة البديري
BY الخادم خالد عبد السادة البديري
Share with your friend now:
tgoop.com/khaledalbderi/3942