tgoop.com/kinokono/61
Last Update:
After Life - Суицид бу ечим эмасми? (2019-2022)
Сериал Рики Жервейс ва Нетфликс ўртасидаги ҳамкорлик натижаси ҳисобланади. Сериалнинг продюссери ҳам, сценарий муаллифи ҳам, бош рол ижрочиси ҳам Рики Жервейснинг ўзи. Уни биз Офиснинг оригинал, британча версияси ва “Массовка” сериали орқали яхши таниймиз.
Сюжетга кўра, бош қахрамон ўзининг 25 йил бирга яшаган аёлидан саратон туфайли ажралади. Шу билан унда ҳам ҳаёт қайсидир маънода тугайди. Уни танимаган одамлар учун у токсик, циник, эгоист ва шу каби ўзида инсониятнинг барча ёмон характерларини мужассамлаштирган одамга айланади. Таниганлар эса уни вақтинчалик стрессда деб ўйлаб ҳаммаси яхши бўлиб кетишига умид қилиб туришарди.
Рики Жервейс ўзи яратган образини ичида яшайди, сериални кўрган одам уни ҳаётда бошқачароқ деб ўйламаслиги аниқ. Унинг ғаройиб ҳаётий фалсафаси тахминан бунақа: Ўзимни ўлдирмоқчи бўлиб ҳаракат қилаётган эдим, кейин фикрим ўзгариб қолди. Ахир мен ўзимни истаган пайтда ўлдиришим мумкин ва бунга ҳеч ким қарши эмас. Шундай экан, мен ўзимни ўлдириш олдидан ўзим истаган барча ёмон ишларни қилиб кўрсам нима ютқазаман? Ёмон кўрадиган одамимга уни ёмон кўришимни айтиб, ўзимга ёқадиган одамларга ёқмайдиган ишларимни бемалол қилишим мумкин ва булар жонимга теккач бемалол ўзимни ўлдира оламан. Ахир бу мен учун берилган хаётий бонуску?
Умумий олиб қараганда трагикомедия жанрида суратга олинган бу сериал анъанавий тарзда инглизча юмор билан бойитилган. Бир қарашда ўз ҳаётини маъносидан ажралган одамнинг ҳаёти ҳам тугаб боришини тасвирловчи бу сериалда ижодкорлар қисқа латифаларни сюжетга тахлаб кетгандек тасаввур уйғотади. Баъзи бир диалоглар сюжет чизиғида ҳеч нарсани ўзгартирмаслиги мумкин, лекин томошабинни кайфиятини кўтариб, сериалга нисбатан симпатияни уйғота олади. Бош қахрамоннинг нега ўзини ҳалигача ўлдирмагани тўғрисидаги саволга, агар кучугим консервани очиб, ҳар куни ўзини овқатини ўзи ея олганида мен аллақачон ўзимни ўлдирган бўлардим, деган гапи бир томондан жуда кулгили, иккинчи томондан бу рост гап эканлигини тушуниб бу ерда фақат юмор эмаслигини тушунасан.
Умуман олганда деярли мини-сериал ҳисобланадиган бу сериал ҳақида унчалик кўп ҳам ёзиш шарт эмас, сюжет ҳақида қисқача ёзилди. Сериалнинг ҳар бир қисми 20-30 дақиқани ташкил этиб, битта мавсуми 6 қисмдан иборат ва 3 мавсумни ташкил этади. Бу дегани уни бутунлай кўриш учун 6-7 соат вақт ажратишни ўзи кифоя.
BY Киноконо
Share with your friend now:
tgoop.com/kinokono/61