tgoop.com/kkawwater/7411
Last Update:
أعتقد إن أفضل وأوفى صديق للراجل بعد زوجته طبعًا هي كُباية الشاي!
حقيقي والله كباية الشاي الواحد بيتونس بيها كتير.. في أوقات شغله الحاجة الوحيدة اللي بتفصله عن الشغل عشان يرتاح هي كباية الشاي، وهي هي نفس الكُباية اللي بيعملها وهو شغال عشان يركز في شغله تخيل؟
لو قاعد مخنوق بيعمل كُباية الشاي عشان يهون على نفسه، لو قاعد فرحان بردو لازم كُباية الشاي عشان يوثق لحظة الفرحة بيها!
في حالات كتير الشاي بيتشرب فيها زي: (قايم من النوم، بتذاكر، بعد الأكل، وأنت سهران، مضغوط، واقف في البلكونة -خاصة ساعة المطر- في الشتاء، شغال، خلصت شغل، قاعدة عائلية، قاعدة مع المدام، قاعد لوحدك بردو عادي، بيتشرب في جميع الحالات)
دا لو الواحد قاعد مع حد بيحبه وبيعزه لازم يعزمه على كُباية شاي، وكذلك في أي قاعدة أو تجمع.. الشاي بينزل الأول وبعدها تنزل القهوة، دايمًا الشاي ليه هيبته كدا وشعبيته العالية، حتى اللي ما بيحبش القهوة تلاقيها لازم يحب الشاي، خاصةً الشاي المنعنع!
- دا من حب الناس فيه قالوا فيه شِعر جميل جدًا.. تعال، تعال إقرأ:
«نعنع كؤوسك إن أردت شرابها
لا خير في شايٍ بلا نعناعِ»
الشاي حقيقي صديق وَفيّ ومُخلص، يعني مثلًا عُمرك عملت كُباية شاي وأنت مخنوق وبعد ما عملتها قالتلك: "لا ياعم سيبني في حالي أنا فيّ اللي مكفيني، أو قالتلك أنا مخنوقة ومش عايزة أقعد معاك"؟
عمرك كنت شغال مثلًا وعملت كُباية شاي وجاءت قالتلك: "لا والله أنا مش فاضية حاليًا أدلقني على الأرض واعملني كمان شوية"؟
- أحنا دايمًا بنوثق لحظات حزننا، وفرحنا، وونسنا، وشغلنا مع كُباية الشاي، لما بنحب نشارك حد تفاصيل خلوة أو قاعدة حلوة لازم نشاركه كباية شاي، لما نقعد قعدة تعارف جميلة لازم كُباية الشاي تكون حاضرة، في وسط كل الصراعات الكونية والاختلافات الوجودية بتاعت البشر عمرك لقيت حد أختلف على كباية شاي؟
#أحمد_حسن.
BY Ahmed
Share with your friend now:
tgoop.com/kkawwater/7411