tgoop.com/laithjawdat/2931
Last Update:
على بركة الله والامام الرضا صلوات الله عليه
قصيدة استقبال شهر محرم الحرام
...
أقترب يومج كربله وتبدي المصايب
وتنسبي عيال الحسين وي الغرايب
عندي دمعه..
ارد اواسيك على ضيمك..عندي دمعه
وشيجرعه..
شهر بي شتموا حريمك..شيجرعه
▪▪▪▪
النص الأول..
وبمحرم بيه سوله ابقه بعيونك اناجي
كام تلجم بيه عيني من قرب شهر البواچي
صعبه وانت مسلبينك من الظهر اخذوا خواچي
يعينك الله كبال عينك بنتك انسلبت تراجي
وبسلامه ..
عاشور ماظن نيته يكضيهه..بسلامه
والعمامه ..
عالترب متروسه دم تبقه ..العمامه
يا سيد الحب الصدك
بخيامك اتمنى احترك
واقترب يومج كربله وتبدي المصايب
▪▪▪▪
النص الثاني..
هذا كله الي جرالك سيدي كله من ادينه
انت كلبك حيل صافي حتى ماتدعي علينه
احنه دزينه الرسايل بالغدر احنه البدينه
يا حسين شنسوه احنه وانت بجدامك تجينه
وبغربتك..
ماكو احد الك يوكف ..بغربتك
هضموا اختك..
كطعوا جفوف الكفلهه..هضموا اختك
يحسين انت مو سهل
ويموت بأحضانك طف
واقترب يومج كربله وتبدي المصايب
▪▪▪▪
النص الثالث..
زينب الهه" ثنين راحو انت والكافل سويه
من مشيتوا الناس صاحت هاي زينب خارجيه
امنيتي انه الي بديهه الحبل ياريته بديه
زينب جبيره وتكابر شلون لو وصلوا رقيه
من المهه
روحي تصرخ بالمجالس .. من المهه
وشيلمهه..
ذيج لمتكم بعد كلي...شيلمهه
والمات ميرجعه الصبر
لا دمع عين ولا نذر
واقترب يومج كربله وتبدي المصايب
▪▪▪▪
النص الرابع...
شما اقدم خدمه لاجلك مقصر وذنبي وضح
راسك انت وماهو راسي بحجر شمروا وانجرح
ماكو عيله انسبتلي ولا اخو عندي انذبح
لا طفل بين ايدي يعطش وعريسي بالدم ما سبح
بيك انت..
ذني صارن مو بغيرك .. بيك انت
خلهه سكته..
هواي هنه اليوجعنك .. خلهه سكته
سيدي شما طال الزمن
تبقه انت لكليبي وطن
واقترب يومج كربله وتبدي المصايب
ليث جودت
محرم 1442ھ
BY ليث جودت__Laith Jawdat
Share with your friend now:
tgoop.com/laithjawdat/2931