tgoop.com/laithjawdat/3009
Last Update:
السيده زينب تخاطب النهر..
وين راح..عباس يمك يانهر ضيعته
خو ما طاح..بس كله لسه تنتظر جيته اخته
لمن اجالك مارجع
كله ترى حسينك وكع
خو ماطاح..بس كله لسه تنتظر جيته اخته
النص الاول..
كله العفتهه بغيبتك لسا بعدهه اتانيك
وياك تحجي ولو رحت وي روحهه تسولف بيك
مو خوف طفتهه الخيم خافت النار تجويك
ترسم عيون بلاسهم خاف الرسم هم ياذيك
احجيله عني و وصل الصار وياي
عباس هذا الشوفته تعادل ماي
فراكه مثل نار وشمع
مثل امي كاسرلي ضلع
لو ضاع مني اني الومك انته
بس كله لسه تنتظر جيته اخته
النص الثاني...
مو هو يتركني بغرب وابقه بهضم روحي احتار
عالكاع لو خلي اثر يمحيهه ماتبقه اثار
عشنه كلب يعشك كلب مملوح عشك الزغار
لو صوتي هو يسمعه من روحه هم يبقه يغار
لو ماتعرفه اني اوصفلك زين
اوصافه تشبه شامه بخدود حسين
كمر العشيره مهندم
مثل العطر هم ينشم
وشما اوصفه جني ما وصفته
بس كله لسه تنتظر جيته اخته
النص الثالث...
ماظنه من يمك عبر وبروجتك تبقه انفاس
ياهو التجر ريته النفس وبصفه يعبر عباس؟
بس انه لاجمني الكلب وبروحي صاير احساس
ايكلي اخوج بلايه جف وبحافر الخيل انداس
اذاني جفي..جفوف اخوي شبيهه؟؟
عيوني رفت..عينه من عاميهه؟؟
بس كلي هسه وينه
مشتاكه ابوسه بعينه
امنيتي احجيله الحجي الماكلته
بس كله لسه تنتظر جيته اخته
النص الرابع...
حسيته مايرجع لمن حاطني خيل وخيال
عباس واحد..من رحل حسيت راحولي رجال
وكطعت ظني وايست من صار بجفوفي حبال
تدنيت يم المشرعه وصار الحجي الماينكال
اعرفته مذبوح وشنو الصاير بي
لاكيت جفه الباقي وين اني الكي؟
مر بيه ولله منظر
اخوي شفته موذر
امنيتي لو من شفته ما جن شفته
بس كله لسه تنتظر جيته اخته
BY ليث جودت__Laith Jawdat
Share with your friend now:
tgoop.com/laithjawdat/3009