tgoop.com/laithjawdat/4114
Last Update:
أم البنين.. بهالاسِم تكَفي فَخامْه
أمُ البنين.. نِنادي لو أم الشَهامه
أم البنين.. مؤنِسة قلبي وهيامَه
مْولاتي إنْتي الطاهرِه المرضيه
الحَاير يجيچ..ويرد بالمَگضيه
لو خَيروني الناسْ اجَاوب عَالناسْ
لو هيه انه اختارهه لو هيه
مولاتي يا ام البنين
▪▪▪▪
النص الثاني..
أم البنين..الخالِقه الونه لجُروحي
أم البنين..لو لا نورچ عَتمه روحي
أم البنين..طِلبه مِنچ زيدي نوحي
خَليني إبچي وأفهم ليا مَصّرع
والدَمْعه تاخِذ روحِي لمَن تِطلع
قَربيني بس على الهَضُم والآهات
وغير الحَچي المابي جرِح ما إسمع
مولاتي يا أم البنين
▪▪▪▪
النص الثالث...
أم البنين..رُضى حَيدر إنتي بابه
أم البنين..وفَحوة الفِكره بخِطابه
أم البنين..إنتي عالزَهراء نيابَه
أنتي الأميره الفاضِله من التُربه
والما يحبچ هذا شله بگلبه
بعض البشر يتعَذرك بالصَعبات
الا انتي يمِچ ماتِضل الصَعبه
مولاتي يا ام البنين
▪▪▪▪
النص الرابع..
أم البنين..انتي بالبَسمهْ ودمِعتي
أم البنين..فاتِحَة گلبي وكِلمْتي
أم البنين..ما ترَس عيني الا أنْتي
شتْنطيني قابِل وأنِ ما تْنطيني
مو مهم عَطوّه..المُهم مَا تِنسيني
أستغفرچ من كل عِشگ مو وَياچ
ما إطِخ راسي ألج أطِخ سْنيني
مولاتي يا أم البنين
▪▪▪▪
النص الخامس..
ام البنين..شيجي مِن خَيرچ أقِبله
أم البنين..اليجي مِن غَيرچ أهِمْله
أم البنين.. أول..تالي..أنتي كِلهَ
بالخَير مِن غَيرچ ولا أسْتبشِر
وياچ راضْي تگضي بالمُر والمُر
سِر بدِليلي وصَار وَكته إن احچيّ
مَولاتي أحبچ..هذا عِندي أعْظَم سُر
مولاتي يا ام البنين
أستشهاد مولاتي الطاهره الزكيه أمُ البنين صلوات الله عليها وعلى بَنيها
1441ھ
BY ليث جودت__Laith Jawdat
Share with your friend now:
tgoop.com/laithjawdat/4114