على الله يالبعيد اللي مشى هالقلب مشواره
على الله نلتقي يمكن تحن وتذكر عيونك
انا لولا الوفا ماجيت درب الشوق واقداره
وتركت اللي يبي قربي عشان اكون مسجونك
إذا قصدك تخيرني بعادك كيف ابختاره
وانا حتى زوايا البيت تسأل عنك وشلونك
تصور كل ماصديت احس الخطوة محتارة
يناديني الفراق وليه توقف خطوتي دونك
واقول بخير مازلنا حبايب وانكر طعونك
عسى نور الفجر يطوي ظلام الليل واسراره
واشوفك في المدى تضوي حياة وعمر مظنونك
كثر مازاد هجرانك يزيد العاشق اعذاره
احس انك تبي ترجع ولكن ظرفك يخونك

غريبه مافقدني يوم ولا حتى سأل عني
غريبه ماشكى بُعدي ولا همته اخباري
تركني وحدي بدربه اداري وحشة افكاري
حسبت انه معي يبقى ولا لحظه يفارقني
ولا يرضى بحزني يوم ولا يهجر ابد داري
اسابق بخطوتي يمه ويبعثرها عناويني
تعبت اعاتب طيوفه تعبت وطالت مشاويري
وانا ودي يشوف الحزن بعده كيف طاوعني
ويلمح دمعة عيوني اذا جابوه بالطاري

يابنت انا للشمس في جلدي حروق
وعلى سموم القيظ تزهر حياتي
اطرد سراب اللال في مرتع النوق
ومن الظما يجرح لساني لهاتي
عاري جسد والليل هتان وبروق
دفاي انا والبرد سمل العباتي

على تغريبك اللي ابتدى يجرح امل رجواي
تهاديتك وداع وليت ما لوحت لك كفي
انا محتاج لك محتاج اغني لك على ليلاي
ومحتاج معك انسى متاعب تصعد بكتفي
فقدت الضحكة اللي في رحابتها دفى ملفاي
ولا عقب الدفى بلقى قلوبٍ تستحق حرفي
بكيتك لين ماقاعي نبت عشبه تحت ماطاي
وعرفت اني محال انسى ليالي طالت بخوفي
نديمي والله اني فاقد في وجهتك مسعاي
وعلى وين اتجه اليا صار عمري واقفٍ خلفي
تذكرني لا تنسى يوم انادي قلبك النساي
كثر ماني اعانق صورتك واتخيل انك جاي
كثر ماني اتلمس لك عذر لين انجرح كفي
نهض صدري حنين يرتجف لهفه ويجر خطاي
عجزت اوصل طموحاتي واعانق حلمي الريفي
دعيت بليلتي ليت الضما بي ينهيه دعواي
عسى احضن طموحاتي عسى اقدارنا تصفي

يمر العمر وجروحي ماكن مرّت عليها سنين
مثل ماهي تمر اكثر من وجيهٍ على بالي
انا اذكر يوم فرقانا تغيّر ما اعرفه زين
عقب ما قال لي آسف عيونه قالت التالي
تركني وراح في دربٍ انا مدري خذاه لمين
وكملت الطريق اللي تركني فيه بلحالي
رحيله ضيّق الدنيا وطيّح دمعي من العين
وعوّد من بعد ماكان غالي ! ماهو بغالي
نساني واختلف ظنّه وانا ما اذكر الناسين
ليا من اشرقت شمس الحزن بيدوّر ظلالي
وحالي ماتغيّر من هذاك الوقت لين الحين
ذكرته قال لي مرّه تزين وشانت احوالي
انا ماعاد ابي يرجع ولا اشوفه ولا اعرف وين
ابي بس القصيده هذي تمرّه ويقرا لي

"وأجمل أغاني الغزل شعري وتلحينه"

من يقول الزين ما يكمل حلاه
كل شيٍ في حبيبي إكتمل
الله اللي كمله و الله عطاه
ما بقى للزين في خلّي محل
العيون أحلى من عيون المهاه
شافها قلبي و صفّق و احتفل
نظرته من فتنته شعلة حياه
والجفون من الحيا فيها كسل

كل عام وانتم بخييير 🤍🤍

سهرت الليل كلّه في رجا لقياك
وغلبني الجهد وانتصرت معاناتي
حسبت ان المسافه تقصر بطرياك
وتبدد وحشة الليل بمواساتي
حسبت اني ابسري للحلم ويّاك
وتلاشى حلمي وطالت مسافاتي
على دربك سعيت لشوفة محيّاك
معك .. حتى اللقا يلملم لي شتاتي
تنفّستك حياة وبتّ في دنياك
وظميتك عمر يازمزم مسرّاتي
عرفت ان القدر مكتوب لجل احياك
واصرّ امشي لك بأربع تجاهاتي
وش الدنيا اذا ما عشتها برؤياك ؟
تضيق ارضي وتذبل فالمدى ذاتي

يا شروق النور داهم تفاصيل الظلام
وانتشلني من مغبّة شتاتي وكمدي
بين نيبان التفاكير وسهوم الهيام
قامت الذكرى تتابع وانا في مرقدي
يالنجوم البيض مني على كفي سلام
كل ما فاضت عيوني تغطيها يدي
والله ان اقسى من البعد لا قل الغرام
في عيون اللي وهبته قصيدي وجهدي
صاير ليلي بدونه يمر تقوله عام
والليالي معه كانت عجوله وتعدي
انهزم صبري ومل الكلام من الكلام
كني اللي بالعيون الضريره مقتدي
ينتهي عمر الغلا لا بدا عمر الملام
والتغاضي يترك الضيق وللوم يغدي
يا وليفي هجر الأحباب مكروه وحرام
وانت في عيني وقلبي وبالي وبلدي
لا تخلي قصة الحب يلزمها ختام
خلنا قبل النهاية نعيد ونبتدي

يمر الوقت وايامك تشابه السنين وتطوف
ولا لك غير مشوارٍ قديم بسكّة الذكرى
عليه تمر لا بان الحزن في وجهك المخطوف
من الشكّ الوشيك اللي ليا مرّ الوهم يطرى
غريبٍ كل ما طاح الظلام وبان فيك الخوف
هربت من ارتيابك والقلق للشعر والمسرى
تفكّر في لياليك القِدام وحلمك المكتوف
وامانيك القديمه في زنازين الظروف اسرى
نسى وجه المدينة وجهك المتوهج المألوف
وفقد درب المرابي خطوتك بالليله الغدرى
بهت وجه الحياة بداخلك واستنزفتك حتوف
بهوتٍ ما شعله ضحكة صغير وسلهمة عذرى

-

اكتشفت ان من مُعاناة الشخص انه يصبح شاعر ! يلجئ له وقت فراغه ، وقت مُعاناته ، وقت حزنه وهمومه ، وقت حُبه ، ايضاً وقت مشاكله

اشهد ان المفارق من عظيم البلاوي
مير هذا نصيبك يالعيون الشقيّه
اتجلّد واقول انّي على البعد قاوي
والله اعلم بقلب فيه الأشواق حيّه
كيف راحت يابو تركي حياتي شقاوي
وين درب السعاده والحياة الهنيّه
ليت لأهل الهوى والحب قاضي دعاوي
كان اداعي عيون اللي فراقه خطيّه
كنّي المبلي اللي قطّعته المكاوي
كلّما جظّ بالونّات زادو كيّه

على الهون ياجرح المفارق وضيق البال
على الهون ياهم سطابي وقدرته
اعزك لوانك جرح ومجاهدك قتال
وروضت جسمي لاجل سقمك وصبرته
لاجل من ملك قلبي من الجال لين الجال
وفجيت له باب عن الناس سكرته
وحطيت له عن شمس قيظ الغرام ظلال
وشيدت له بيت بقلبي وعمرته
عشقته ودللته وجريت له موال
وتخيرت قربه ليتني ما تخيرته
رعى ريف قلبي لين صار الحشا مدهال
وعن مدهله جنبت غيره وذيرته
سقيته من عدود الغلا والغرام زلال
بعد ماجذب من دم قلبي وصدرته
اداري عليه من الزعل وازعل العذال
وخطاه ان كبر في عين غيري تصاغرته

- تركي الميزاني

تحت رحمة وداع وليل مابان ظلامه نور
تركني للسنين اللي معي فيها تخيّلته
هقيت ان المصايب لا بغت تقبل ! تجي بالدور
وانا جتني على هيئة عذاب ما تحملته
مشى من غير لا يترك جواب يجبر المكسور
وانا باقي على شفاهي كلام وراح ما قلته
تجاهلني قبل يلمح في عيني نظرة المعذور
وانا لاحتاجني جيته ولا لحظه تجاهلته
وقفت بصمت لا راضي ولا في صدته معذور
ولا من جرح بقلبي تسبب فيه حللته
قدر يقسى ويبني من حجر قلبه لحزني سور
ولا يدري نزل دمعي على سوره وزلزلته
انا مركب هواه اللي قطع به فالغرام بحور
وانا البحر العظيم اللي رسى بي ماتثاقلته
قتل بإدينيه احلامي ولأحلامي حفرت قبور
على نفس الطريق اللي تركني به وكمّلته
يليته حن لو مره قبل يقفي بدون شعور
اقله لو عذر واحد يبرر له ولا نلته

قلبي اللي - خالد الفيصل