انا ماكنت خاين العهد وناوي الوداع
لا والذي خلقني ناوي اختم فيك امنياتي
لين هاك الليل لوح بكف الضياع
واستقرت بالجوف اصعب معاناتي
لازلت افكر فيك واذكر ليالينا باقتناع
ولا مره طرت لي فكره تجاهل ذكرياتي
ظلمتني بالخيانة وانا كنت احسبك شجاع !
وما رضيت تسمع الصدق في ظل مأساتي
افهم قبل تجرح قبل تتهمني بالخداع
انا لاني لك خوان ولا انت اصغر حكاياتي
كنت اشوفك من بينهم الحب المتاع
ولازلت اشوفك بين همي وضحكاتي
تشتت مشاعري في دروب الإنقطاع
ولا ادري همي راحله او تجدد نهاياتي
ماراح تلقى مثل حبي والقلوب وساع
انا الصادق وانا الثابت رغم متاهاتي

احس الصمت بعض احيان يشرحني
‏و أسمع منّه احيانًا كثير أجراس
‏تدليني .. توعيني .. تنبّهني
‏تقوي الباس قبل اطيح باللا باس
‏احاسيسي بعض احيان تذهلني
‏و بعض احيان ودي اني بدون احساس
‏اعرف الناس كثر ما الناس تجهلني
‏و هذا اللي وقف بيني و بين الناس

-

انا البدوي
الجنتلمان
الذي يهوى
صيد الغزلان

جيت اتوقّى عذابات المدى واهتديك
شوقي مسافة وهمساتك مدار وفلك
ان ماظميتك غلا يا علّني ما ارتويك
ايه اعرفك واعرف اني من غلاك اجهلك
مرّات اضمّك واخاف اني مشبّه عليك
مرّات اشوفك بنفس الوقت واتخيّلك
وانشد كفوفي عن آخر سالفة من يديك
اعنّ لك لو تصبّ الموت واتهيّلك
واجوع لك واتمنّى خنجرك واشتهيك
ما قلت لك عمر سيف العشق ما يقتلك !
ماتشوفني حي قدامك وانا اموت فيك
اشتقت لك قبل اجيك وجيت واشتقت لك
البارحه طول ليلي بين هذي وهذيك
مليت جمر انتظارك واستحيت اسألك
واحسبتني ما بعد جيتك وفكرت اجيك
اثرك بقلبي من البارح وانا استعجلك
واثري نسيتك من الفرحة وقمت احتريك

ياعل قلبٍ ماشكى الحب والتاع
تنهار من فوقه محاني ضلوعه
ياما نهيت القلب لا شك ما طاع
ما طاع يدله والليالي تلوعه
اثر المولع دمعته تجرح القاع
والى ذكر مافات هلت دموعه
يفز قلبي تالي الليل مرتاع
اخاف تبعد عن ربوعي ربوعه
الموت كان العرف عقب البطا ضاع
والمنتحي ياسعود صعب رجوعه
في غير شوف العين مانيب طمّاع
حقه علي امشي في درب المطوعة
ابو عيون رمشها سود ووساع
في ذبحها العاشق فتون وبتوعة

صباح الخير ..

بينما وانا اشرب قهوتي الصباحيه واسمع لأم كلثوم لفتني كلامها يوم قالت غلبني الشوق وغلبني وليل البعد ذوبني ، هيّضت مشاعري شوي صراحه

مابقالي قلب يشفع لك خطيّه
ذوبته جروح صدّك والخطايا
صاحبي بالله لا تعتب عليّه
العتب ماعاد تاسعه الحنايا
كل جرحٍ فات لي منك هديّه
وش بلاك تخاف من ردّ الهدايا
الله اكبر كيف مالك مقدريّه
وكل ما تحمله من همّي بقايا
لا تمنّيني بسراب المهمهيّه
القراح اليوم ما يروي ظمايا
وان غدى للحب في قلبك شظيه
وش يقول الي غدى قلبه شظايا

صباح الخير ، احس منزمان مانزلت لكم شيء ، والحقيقه انكم واحشيني حييييل

لو وفيت وجيت يوم زرتني
لو صدقت افنيت روحي في هواك
لو سمحت بنظرتك وامهلتني
احضن عيونك بقلبٍ ما نساك
لو لمست الوجد بي ولّعتني
واهتديت بنور قلبي وافتداك
لو نظرت بعين قلبك شفتني
ما معي مخلوق يستاهل غلاك
ليتك من الحب ما خوفتني
كان اعيش الفين عمر في رجاك
يا قليل الحظ لو رغّبتني
كان اخجّل كل بدرٍ من ضياك

كل عام وانتم بخير 🤍🤍

ياوش بقى بعطيك مني ولا جاك
ماباقي الا روحي احيا بها لك
اوصف جمالك كل ما نشدت واهواك
وازين ايامي بجلسة خيالك
يالغايب الحاضر بقلبي ولا القاك
اقرب من عروقي وصعب منالك
شالك زماني عن عيوني ووداك
لا شك وثق في ضلوعي حبالك
ياحاجب شمسي ورا ليل جفواك
مابالعهد بك قاسي في دلالك
وش غيرك يامنوة القلب واطغاك
على حبيب ماتخير بدالك
دنياي ما تصلح بلا شمس دنياك
والليل يوحش لو تغيب هلالك
ما ينقطع ظمى الهوى الا على ماك
ولا يهون حره الا ظلالك
ولا تشوف العين زينٍ بليّاك
ولا يطرب سمعي الا مجالك
ولا انتفض قلبي من الحب لولاك
ولولاك ما يطري علي بدالك

كيف اتوبك يا اجمل ذنوبي واوقف عند حدي
"وانت ذنبً لا غفره الله ولا لي عنه توبه"

صوتك اللي بقى لي من ليالينا
عاد لو غاب صوتك وش يبقى لي
صوتك المُوج والمجداف والمينا
صوتك الناس لو اني في خلا خالي
صوتك الذكريات اللي تدفينا
كل ما هل شفت العيد يبدا لي
صوتك بعيد مثل البعد يطوينا
صوتك اغليه .. صوتك يابعد حالي
من غروب الكلام لشرق اسامينا
ياحبيبه ... وصوتك عندي الغالي
سولفي .. لعنبو همً يبكينا
انتِ اقصى مدى الهقوات والتّالي
مالها حد شرهتنا وامانينا
والمسافات قشرى مالها والي
يقبل اللّيل لا مرفأ ولا مينا
عاد لو غاب صوتك وش يبقى لي ؟

سألت عنك ظلام الليل و نجومه
وين القمر قال لي باكر مواعيده
مشتاق انا للقمر مشتاق لعلومه
الله يزيده بحبي شوق و يزيده
له صورةٍ في عيون القلب مرسومه
الى ظما القلب يلقاها مواريده
الحبّ نشوه ودمعة شوق مظلومه
و القلب تسمع عتابه في تناهيده
يا سيد الليل لو يبكيك ما ألومه
يغيب منك على ذكراك و تعيده
يا شاغل الناس خذ قلبٍ نسى نومه
يا ساكن القلب يا محبوبه و سيده

السلام عليكم ، ماوحشتكم ؟

عطيني حلمي الليله وخلي الي يجي باكر
انا مدري عن الأيام والي فالزمن باقي
تحينت الأمل لين الأمل جابك وانا صابر
تغافلت الحظوظ بدرب نامت فوقه اشواقي
ابي قربك مدام انه تهيالي وانا حاضر
اوريك الغرام اللّي ربى في داخل اعماقي
لأنك فالهوى نعمه تجي للحامد الشاكر
لو انك فاللقى ايّست قلب فطيبتك هاقي
تدري بترك اعتابي وادوس بضيق واكابر
بقول ان فدوتك قلب المحب الطيب الشاقي
وبصدق موعد اللّقيا الى من قلب باكر
وبحس ان الزمن ما راح وان الليل به باكر

"وربي طالت الغيبة"