tgoop.com/lukmanbdran1970/4453
Last Update:
النِيَّه ويَّه الزهره اذا انصفِّيها
الليله بالمجلس تره انلَاگيها
**
بكلشي إخلاص النوَايا ايفِيد عِند الباري
واجب اعلى الشاعر وعاليلطُم وعالقاري
وبالرياء العمل يُحبَط والعَبد مو داري
وخل يگول الجنه أدخل بِيدي وادخل ناري
وشنهي أزرَع آنه
ابمزرعة دِنيانه
الشُوكه لو خير الثِمار اجنِيها
النيَّه ويَّه الزهره اذا انصفِّيها
**
الزهره منّي اتريد عِفَّة عيني ويّه الساني
اتريد بِر ابوالِديَّه ورحمه ويّه اخواني
ومَحضَر الخَيرين احضره وزهره بي تلگاني
مو أصاحِب من يذِمَّه القاصي ويّه الداني
تره الصاحِب ساحِب
ولِـعيون اتراقِب
ويغضِب الزهره الفعِل تاليها
النيَّه ويَّه الزهره اذا انصفِّيها
**
الزهره تحضَر لليعـزِّي اليِحترم أولادها
ويترك اسلوب المُـغالي الّي أبَد مافَادها
مو يرَدِّد بالروايه الي ضُعُف باسنَادها
وينطي لَزمات العدُوَّه الصرّح ابتِعدادها
ويِضِر نفسه ودِينه
وللمُضاد ايعِـينه
ويدري هوَّه الزلَّه يفرَح بيها
النيَّه ويَّه الزهره اذا انصفِّيها
**
ألله يرحَم من بِعَد عن نفسه طاري الغِيبه
هذا حَچيَ آل النبوه الأعظم بتَرتيبه
أحضَر وماخلِّي نفسي ابمَوضِع امن الرِيبه
بهَيئه طَيبه ولاني لابِس ماينَزْلِ الهَيبه
الزهره عِفَّه وغِيره
والوَجه مَتـدِيره
لليجي وفِعله الصِدَر ياذيها
النيَّه ويَّه الزهره اذا انصفِّيها
**
بهذا تشمِلنا ابعَـطُـفها الزهره واتلاگِـينه
بمجلس المذبوح ابنها اوتگعد اتنادِينه
كلمن بإسمه اوتِگلَّه : إنعَـه لِموَذرينه
وگوم يفلان اوتحَـزَّم للعَـزه اوَّاسِينه
يَبني دُومَك سالم
اليوم اقِبلَك خادم
اوّگفتك هاي ابشَفاعه اجزِيها
النيَّه ويَّه الزهره اذا انصفِّيها
============
لقمان بدران
https://www.tgoop.com/lukmanbdran1970
BY الشاعر لقمان بدران
Share with your friend now:
tgoop.com/lukmanbdran1970/4453