tgoop.com/lukmanbdran1970/4669
Last Update:
لولادة الرسول الأكرم صلى الله عليه و آله وسلم
،،،،،،،،،،،،،،،،،،،،،
بمِيلاد الضوَه
خَل نفرَح سوَه
مَكه استَبشرَت طه انولَد هاي المسِيّه
نجمَات وگمر نزلَن خجَل غطّاها ضَيّه
بمِيلاد الضوَه
**
هالدِنيه حَاروا بيها . عطَش نازِل ليها .
والمطَر ناسِيها .
ومامَرها ليله
وبرَبيع الغيرَه . غَيث اجَاها ابخَيره .
عِشب غطّه الديرَه .
اوَّرْد الخَميله
كل كتر بارجَاءه . خَضِّرت أنحَاءه .
وانتِشَت صَحراءه .
وصَارت جَميله
مَكه استَبشرَت طه انولَد هاي المسِيّه
نجمَات وگمر نزلَن خجَل غطّاها ضَيّه
والظَيم انطوَه
بمِيلاد الضوَه
**
والنِعم مِن أَصلَه . آمنه وعبد الله .
وكل مُوَحِّد صَلّه .
امن الهاشميه
مِن مِنى ومن زَمزم . والحَطيم الأعظَم .
رَبّه صَاغه وتـمَّم .
طَلعه البَهيه
طاهِر اهوه امطَهَّر . كالبَدر بَل أزهَر .
بالمِسك والعَنبر .
غطّه الوِطيه
مَكه استَبشرَت طه انولَد هاي المسِيّه
نجمَات وگمر نزلَن خجَل غطّاها ضَيّه
زَاكي المُحتَوى
بمِيلاد الضوَه
**
هَادي مَهدي بمَهده . يهدي لله السَجده .
اموَحِّد ابن اموَحْده .
سَيْد البرايه
مُعجزة ومَامِنها . صُوره تِزهي بفَـنها .
نِبقى نِكتب عنها .
ونُوصفها آيه
نِعِم مِن هالمُرسَل . بالغَمَام امظَـلَّل .
كلشي صَلَّه وهَلَّل .
عَدَّد مَزَايه
مَكه استَبشرَت طه انولَد هاي المسِيّه
نجمَات وگمر نزلَن خجَل غطّاها ضَيّه
واتغَـنَّه الهَوى
بمِيلاد الضوَه
**
رَحمة الله الكُبرى . منَّه أطلُب نَـظره .
وبالحَياة الأُخرى .
رِدت الشَفاعه
كُونه يقبَل عذري . حَاير آنه بأمري
والخِطاب العُذري .
ايجُود ابسَماعه
من مُحب امتَـيَّم . عالحَنين امعَلَّم .
ليله أصبَح أظلَم .
واعلَن ضَيَاعه
مَكه استَبشرَت طه انولَد هاي المسِيّه
نجمَات وگمر نزلَن خجَل غطّاها ضَيّه
بس اهوَه الدوَه
بمِيلاد الضوَه
--------------
لقمان البدران
BY الشاعر لقمان بدران
Share with your friend now:
tgoop.com/lukmanbdran1970/4669