tgoop.com/lukmanbdran1970/4735
Last Update:
ابوذيات شهادة الزهراء ع
=============
أنا الدمعات عيني ماتملها
على الماتت وماصح ماتم الها
عمر عشرين وسفه ماتم الها
وگضت بت النبي اباب المنيه
*
المنيه امگدره ويصعب دفعها
وتره اديون الدهر واجب دفعها
ثگيله الباب والظالم دفعها
وكسر ضلع النبي بضلع الزجيه
*
گضَيت الليل متمَرمُر وإن بي
واخبرَه المَادرَه اشصَاير وإنبي
الزهرَه البيت بي ، گلهُم وإن بي
أحِرگه وماتِرف اجفُون اِليّه
*
حمَامة نور فارغ مِنّه عَشها
وبَعدها الدنيه ظَلمه من نعشها
أُمنَه الشمس تِطلَع من نعشها
وياگبر اليِطم شمس الضِوِيه
*
قارُورة وإِديـن الغِـل چفنها
ابحَلاة ايّامها ولِبسَت چفنها
الچفوف العَالوَجه ظُلماً چفنها
چِفَن رَحمة الباري اعلهَ الوطيه
*
أمير المؤمنين يقول :
قبله اصبَح گبُر ضَمّچ واطف بي
ودَمع وين الگه لليلهَب واطف بي
بَابچ بي جمُر زينب وطف بي
ودمع سِكنه يزهرَه وهَم رُقيه
لقمان البدران
BY الشاعر لقمان بدران
Share with your friend now:
tgoop.com/lukmanbdran1970/4735