«ታይፕ አደራረግሽ ነዋ! ፊደሎቹን እያፈላለግሽ ነው የምትጫኝያቸው… አያቴ ነበር እንደዚህ የሚፅፈው . . . ይገርማልኮ አሁን አንች የተማርሽ ዘመናዊ ታዋቂ የፊልም ተዋናይ ነሽ! ታይፕ ማድረግ እንኳን በወጉ አትችይም! ይመስለኛል ታይፕ አደራረግ ወደፊት ማስተማር ሳይኖርብኝ አይቀርም!

ፊደል በስጨት አለች « አሁን የጀመርነውን እንጨርስ ወይስ ልተኛ ?» አለቻት በቁጣ !

«አትቆጭ ፊደል! ኢትዯጵያዊያን አለመቻላችሁ ሳይሆን አትችሉም መባላችሁ ያበሳጫችኋል! ቀኑን ሙሉ ስልክና ኮምፒውተር ላይ አቀርቅረሽ እየዋልሽ ታይፕ ማድረግ እንኳን በስርዓት አለመቻልሽ ሊያስቆጭሽ ነበርኮ የሚገባው!

ትልቅ እውቀት መሆኑ ነው? አለች ፊደል

ነውና! እኔ በአስራሁለት ዓመቴ ነው ጥንቅቅ አድርጌ ኪቦርድ አጠቃቀም የቻልኩት

«የራስሽ ጉዳይ ወሬ አለብሽ. . . በነገራችን ላይ እየረዳሁሽ መሆኑን አትርሽ »

«ሂሂሂሂሂ ሂጅ ካሜራ ማኖችሽን ጥሪና "ኒላን እየረዳኋት" ብለሽ ነገ ለአድናቂዎችሽ እዩልኝ በይ! . . . እሽ እያሳደድሽ የአባቴን ስም ፃፊ!

እንዲህ እያሉ ለኒላ አዲስ አካውንት ከፈቱ! በመጨረሻም ኒላ በምትነግራት መሰረት የኒላን ቤተሰቦች አካውንት ከፈቱ ! ኒላ መጀመሪያ ያየችው የወንድሟን አካውንት ነበር . . . እንደነፍሷ የምትወደውን ወንድሟን ! ፕሮፋይሉ ላይ «ውቧ እህቴን ካጣኋት ሁለት ዓመት ሆነ እንወድሻለን» ከሚል የእንግሊዝኛ ፅሁፍ ስር እጅግ ውብ የሆነች ሴት ፎቶ ይታያል!

ፊደል ልቧ ስንጥቅ አለ! ካሰበቻት በላይ ቆንጆ ሴት ነበረች ! ፀጉሯ በቀኝ ትከሸዋ በኩል አልፎ ፊት ለፊት እየተዘናፈለ ይወርድና ተፋዋ አካባቢ ድረስ ቁልቁል ወርዷል! ፈገግታዋ ሲበዛ ውብ ፊቷን የበለጠ አስውቦታል! የለበሰችው ደማቅ ቀይ የህንድ ባህላዊ ልብስ ድምቀቷን አጉልቶት ፎቶ ሳይሆን ህያው ስጋና ደም ያላት ፍጥረት አስመስሏታል!
«አንች ነሽ ? » አለች ፊደል ! ኒላ ግን ማልቀስ ጀምራ ነበር!
ፊደል በዝምታ ቆየች! ኒላ ለቅሶዋን አቁማ ሌላ ስም ነገረቻት! ፊደል ስሙን አስገብታ ስትከፍተው አንድ መልከመልካም ወጣት ከአንዲት ሴት ጋር በባህላዊ የሰርግ ልብስ አምሮ የሚታይበት የሰርግ ፎቶ ስክሪኑን ሞላው! ከጎኑ ቆንጆ ሚስቱ በፈገግታ ቁማለች!

ኒላ « ይሄ ቀልድ ወይም ህልም መሆን አለበት » አለች በቀስታ ! ከዚያም ድንገት «ውሻ የውሻ ልጅ » ብላ ጮኸች በጩኸቱ የፊደል ሰውነት ተናወጠ!
«ምንድነው ኒላ ?» አለች በፍርሃት ! «ፍቅረኛየ፣ ባቡር ላይ አብረን ሞትን ያልኩሽ ፍቅረኛየ ! ገና ከሞትኩ በሁለት ዓመቴ ጓደኛየን አግብቶ ነዋ! ይሄው አይታይሽም ይች ውሻ ጓደኛየ ናት . . . ጓደኛየ ! የራሴ ጓደኛ »

ፊደል ግራ ገባት « ቆይ ባቡሩ ላይ ሞተ አላልሽኝመረ . . .? »

«እኔጃ እኔ ስለሞትኩ የሞተ ነው የመሰለኝ ! አላውቅም . . . ምናልባትም ውሻ ቶሎ አይሞትም » ኒላ ዝም አለች ! ረዥም ዝምታ !

ኒላ አለች ፊደል የምታደረገው ግራ ገብቷት መልስ የለም . . . ኒላ ትሰሚኛለሽ ? ዝምታ ! በቀስታ ላፕቶፑን ዘግታ ወደምኝተዋ ሄደች! ዝምታው ያስፈራ ነበር።
ይቀጥላል!

@maninet1
@maninet1
@betsiroyal

ያ ዘመን...

1. ሬድዮ የማድመጥ ዘመን
- እነ የገቢ ምንጫችን ቡና ቡና በፍቅር የተሰሙበት፣ ማታ ዜና መስማት፣ ሬድዮ ነገ ይዘንባል ብሏል ብሎ ማውራት የአውሪውን የመረጃ ቅርበት የሚያሳይ የነበረበት ዘመን ነበር፡፡

2. የትረካ ዘመን
- እነ ፍቅር እስከ መቃብር ፣ ካድማስ ባሻገር - ሌሎችም በፍቅር የተሰሙበት ነበር፡፡ ከመፅሐፍት ዓለም የተሰኘው ፕሮግራም ብዙዎች ልብ የገባበት ዘመን ነበር፡፡

3. FM ሬዲዮ የመስማት ዘመን
- ይህ ጊዜ ብዙዎች ውሏቸውንም ሆነ አዳራቸውን ከሬድዮ ጋር ያቆራኙበት ዘመን ነበር፡፡ RISING የተሰኘችዋን ጥቁር ሬዲዮ ይዘው የዞሩበት፣ ኤፍ ኤምን ከጧት እስከ ማታ የሰሙበት ነበር፡፡

4. የሬዲዮ ድራማ ዘመን
- በዚህ ዘመን ብዙዎች የሬድዮ ድራማ እንዳያልፋቸው የእጅ ሰዓታቸውን አሁንም አሁንም ያዩበት፣ እነ የቀን ቅኝት የሁሉን ቀልብ የሳቡበት ጊዜ ነበር፡፡

5. የዘፈን ምርጫ ዘመን
- በዚህ ጊዜ ደግሞ ሰዎች ለኤፍ ኤም ደውለው ለፍቅረኛቸው ዘፈን መጋበዝ እንደ ብርቅ የታየበት ነበር፡፡

6. የቀጥታ ውይይት ዘመን
- ይህ ዘመን እነ አከራይና ተከራይ ፣ ከገንዘብና ከፍቅር የቱ ይቀድማል… የመሳሰሉ ጉዳዮች እንደ ጉድ ያከራከሩበት ጊዜ ነበር፡፡

7. ደብዳቤ የመፃፍ ዘመን
-ይህ ዘመን የተለያዩ የፍቅር ደብዳቤዎች ፣ ግጥሞች ፣ መጣጥፎች በፖስታ እየተላኩ ፣ አገሌ ከእንትን የላከው እየተባለ በሬድዮ የተነበቡበት ዘመን ነበር፡፡

8. የኤች አይ ቪ ኤድስ ውይይት ዘመን
- ይህ ዘመን ኤች ይ ቪ ኤድስ አብሮ በመብላት ፣ አብሮ በመጠጣት አይተላለፍም፣ ኤድስ አያራርቅም እየተባለ ሰዎች በሬድዮ እየደወሉ እያለቀሱ ሁሉ የተወያየዩበት ዘመን ነበር፡፡

9. የትዳር በሬድዮ ዘመን
- በዚህ ዘመን ሰዎች መልካቸውን ፣ቁመናቸውን ፣ ጸበያቸውን እየዘረዘሩ ትዳር በሬድዮ የፈለጉበት ዘመን ነበር፡፡

10. ቴሌቪዥን የማየት ዘመን
- ይህ ደግሞ ሰዎች ቴሌቭዥን አየሁኮ እያሉ እንደ ብርቅ ያወሩበት ዘመን ነበር፡፡ ዜና ፣ ፕሮግራም ፣ ዘፈን ሳይመርጡ ቴሌቭዥን ማየት ብቻ መታደል የነበረበት ዘመን ፡፡

11. የቴሌቭዥን ድራማ ዘመን
- ይህ ዘመን ሰዎች ሙሉ ጊዜያቸውን ለቴሌቭዥን ድራማ የሰጡበት ነው፡፡ እነ ገመና ፣ ሰው ለሰው የነገሱበት ዘመን ፡፡

12. የእግር ኳስን በሬድዮ ዘመን
- በዚህ ዘመን ሰዎች ኤርፎናቸውን ጆሯቸው ላይ ሰክተው እግር ኳስን በሬድዮ ተመልከቱ መሰለ መንግስቱ ን ያደመጡበት ነበር፡፡

13. መጽሔት የማንበብ ዘመን
- በዚህ ዘመን የተለያዩ የፍቅር ታሪኮች፣ ወንጀል ነክ ጽሁፎች በስፋት ተነበዋል፡፡

14. የዴርቶ ጋዳ ዘመን
- ይህ ደግሞ ሰው ሁሉ ልቦለድ ማንበብ ያበዛበት ጊዜ ነበር፡፡

በ ተሾመ ብርሃኑ
Teshome Birhanu
@maninet1

ልኑር በትዝታ ....!
*#*#*#*#*#*#
በተጋባን በአስራ ሁለተኛው ቀን :- እንደወጣ አልተመለሰም ። ድንገት መርዶ ነጋሪዎች መተው :-" ባለቤትሽ ከዚህ አለም ድካም አረፈ ! " አሉኝ ! ምንድነው ማረፍ ? ፍቅራችንስ ? በሱ ብቻ ተጠፍጥፎ የተሰራው የመኖር ጉጉቴስ ? ህልሞቼስ ? የኔስ ነገ ? ፍ..ቅ..ሬ...ስ ? አመመኝ ! ተሰበርኩ ! ጫግላዬን እንኳን በቅጡ ሳላየው ፣ ትኩስ ሙሽራ ሳለሁ ይህ በኔ ለምን ሆነ ? ከዛን ግዜ ወዲህ የኔ ህይወት በስብርባሪ ምላጭ ላይ እንደመራመድ ነበር ። እነሆ ዘጠኝ አመት ! ከበረዶ የቀዘቀዙ ዘጠኝ እሳት አመቶች ። እየተምታታሁ እዚህ ደረስኩ ። ቃልኪዳኔን ሳላፈርስ ፣ ቀለበቴን ለአፍታ እንኳን ሳላወልቅ ።

ዛሬ ግን ተረታሁ ! ውስጤ ተሸረሸረ ! ስምኦን ታግሎ ጣለኝ ። አራት አመት ሙሉ ሳይሰለች የልቤን በር አንኳኳ ! የጽናት ጥግን በእሱ እየሁት ! ፍቅር ለካ ተመን የለውም ? ይሄው ስምኦን ፍቅርን ከሚዛን በላይ ሲያውለው በአይኔ በብረቱ አየሁ ። ሰውን እስከ ምን ድረስ ነው መከተል ሚቻለው ? ሊያውም እኔን ሃዘን ያደቀቀኝን ፣ አጠውልጎ ያከሰለኝን ፣ አመለቢስ ያረገኝን መከተል እንዴት ቻለበት ? ምን አይቶብኝ ነው ?

ትዝ ይለኛል የዛሬ አራት አመት :- እሱ ድርጅት ጨረታ አሸንፌ ውል ለመዋዋል ስሄድ ነበር ያየሁት ! ምን ይወጣለታል ? ከመልክ መልክ ፣ ከጸባይ ጸባይ ፣ ትሁት ፣ ሁሉን አክባሪ ፣ ሲያወሩት ውሎ ሲያወሩት ቢያድሩ የማይጠገብ ! የሰው ልክ ! የወንድ መለኪያ !

እርግጥ ነው ገና ሲያየኝ ቀልቡ ሲገገፍ ታውቆኛል ! ግን ቀለበቴ ደሞ ገድቦታል ! እንዴት እንደሆነ በማላውቀው መልኩ :- የህይወት ታሪኬን በዝርዝር አወቀ ! ከዛ ማን ያስቁመው ? ቀን የለ ምሽት የልቤን በር ያንኳኳው ጀመር ! ቀን ቀንን እየተካ ሲመጣ ፣ ወራት አመታትን ሲያስቆጥሩ ፣ በበጋም በክረምትም የማይቀየር አንድ አይነት ሰው ነበር ስምኦን ! ስገፋው ማይገፋ : ፊቴ ቢጠለሽበት ፈገግታው የማይከስም ። ደጋግሞ እንዲህ ይለኝ ነበር " የህይወት ሰው እኮ ነሽ ! አረ እንዲያውም አንቺ እራስሽ ህይወትን እራሷን ነሽ ! የኔ ሁኚ አልልሽም ፣ ግን እባክሽ አጠገብሽ ልሁን ? " እኔስ ምን እለዋለሁ ? እባክህን ተወኝ ! በትዝታዬ ልኑርበት ! ...

ዛሬ ግን አቃተኝ :- ዘጠኝ የለቅሶ አመታት ማብቃት አለባቸው ! ወጣትነቴን የገበርኩበት የአጸደ ነፍስን ትዝታ ፣ ባዶ እቅፍ ይበቃኛል ! የሟቹን ቀለበት አወለኩት ! ህያው ነፍስ አጠገቤ አለ ! ህያው ፍቅር በሬን እያንኳኳ ነው ። ስምኦንን ልቤ ፈለገው ! ናፈቀኝ ! በቃኝ ከጻረሞት ትንቅንቅ ! ቴክስት አረኩለት ' አግባኝ ! ' ይሄው ነው ! ምን ይል ይሆን መልእክቴን ሲያይ ? የአመታት ጥበቃው ሲያከትም ? በቅጽፈት ስልኬ ላይ መልእክት ገባ ! ልቤ መታ ! አዎ እራሱ ነው ። ስምኦን !!!

by #Samifanta

@maninet1

ፍርደ ገምድል…

ሜሪ ፈለቀ

ፊደል ቆቅ ሳያደርገኝ በፊት እናቴ «ዝናብ የእግዚአብሄር እምባ ነው! አምላክ ሲያዝን ነው ዝናብ የሚዘንበው» ያለችኝን አምኜ ሲዘንብ ይከፋኝ ነበር። ሲያዝን ያለችው ሲራራ ማለቷ ይሁን ሲከፋ ማለቷ ጠይቄያት አላውቅም። ሲዘንብ የሳሎናችን መስኮት አጠገብ ተቀምጣ ውጪ ውጪውን በትካዜ የማየት ልምድ ነበራት። አምላክ ሲያለቅስ እናቴም አብራው ትከፋለች። ሁለቱም የሚከፉበት ሰበብ ሳይገባኝ አብሬያቸው እከፋለሁ። የሞተች እለት … ሲያለቅስ ያስተሳዘነችው አምላክ በሞቷ ያዘነ ይመስል ሲዘንብ ዋለ። እነዚህ ሁሉ ክስተቶች ተደማምረው አሁንም ድረስ ሲዘንብ ድብት ይለኛል። ዝናብ ሲመታኝ ደስ የማይል ስሜት ያፋነኛል።

እንዲያም ሆኖ በዶፍ ውስጥ የረጠበው ካፖርቴ ዝቅ ያደረገውን ትከሻዬን ተከትሎ ያቀረቀረ አንገቴን እየናጥኩ ስጓዝ ሰዓታት አለፈኝ። ፀፀቴ በዝናቡ እንዲታጠብልኝ ይሆን ወይ አምላክ አብሮኝ በመከፋቱ ልፅናና አልያም የሚሸክከኝን ዝናብ በመመታቴ ውስጥ ራሴን እየቀጣሁት ? አላውቅም! ዝናቡ አባርቶ ደመናው ገለል ማለት ሲጀምር አባትህ ያዘወትርበታል የተባልኩበት እርምጥምጥ ሰፈር ውስጥ ያለ መጠጥ ቤት ደረስኩ። ከተቀመጡት የሁለት እጅ ጣት የማይሞሉ ጠጪዎች ውስጥ አባቴ ያለመኖሩን ካየሁ በኋላ ትንሽዬ የሰፈር ሱቅ መስኮት የምታክለው ባንኮኒጋ ጠጋ ብዬ መጠጥ የሚሰፍረውን ወጣት ቢጤ

«ሞገስ የሚባል ሰው ታውቅ ይሆን?ደንበኛችሁ ነው» አልኩት እንዴት ብዬ እንደምጠይቅ ግራ ገብቶኝ እየተንተባተብኩ።

«ሞገስ ሞገስ? እኔእንጃ … ቀለም? ሞገስ የሚባል ደንበኛ ታውቂያለሽ እንዴ?» አለ የሙዚቃውን ድምፅ ለመብለጥ እየጮኸ በርቀት እያስተናገደች ላለችው ሴት ። ቀለም የተባለችው ዞር ብላ አይታኝ።

«ባውቅስ ለምን እንደተፈለገ ሳላውቅ መረጃ እሰጣለሁ እንዴ? እንዴት ያለ ጥያቄ ነው?» አለች እኔንም ጠያቂዋንም በመናኛ አስተያየት እያየች።

«እሱ ልክ ብለሻል። ለምንድነበር የፈለግከው ግን?» አለኝ ልጁ

«ማነው የፈለገኝ?» የሚል ድምፅ ተከተለ። ድምፁን ተከትዬ ወደሰውዬው አይኔን ላኩኝ። ቅድም ስገባ አይቼዋለሁ። ሲያየኝ እንደመደንገጥ ብድግ ብሎ ተመልሶ ተቀመጠ። ስላየኝ ምንም እንዳልመሰለው አስመሰለ። በቀስታ አጠገቡ ሄጄ ተቀመጥኩ።ያለምንም ቃል። በአንድ እይታ አይቼ እንደማላውቀው ሆኖ አባቴ ተለውጧል። 5 ዓመት እንዳልተያየ ልጅ እና አባት አልተቃቀፍንም። አልተጨባበጥንምም። አጠገብ ላጠገብ ተቀምጠን በዝምታ መሬት መሬቱን ስናይ ደቂቃዎች አለፉ። ባጠገቡ አልፌ ሳላውቀው መቅረቴ እንደጠዘጠዘኝ ገብቶት ነው መሰለኝ

«እርጅናውም፣ መጠጡም ፣ ኑሮውም ተደማምረው መልክ ያጠፋሉ። ከምታውቀኝ ብዙ ፈዝዣለሁ።» አለኝ አይኑን ከመሬት ሳይነቅል።

«ይቅርታ!» አልኩት። ስለየትኛው በደሌ ይቅርታ እንዳልኩ ሳልዘረዝር። አሁን ስለዘነጋሁት? ወይስ ለዚህ ጉስቁልናው ምክንያት ስለሆንኩኝ? 5 ዓመታት ስላልጠየቅኩት? በእናቴ ሞት ተጠያቂ ስላደረግኩት?

## ## ## ## ##

እናቴ ራሷን አጥፍታ እስከሞተችበት ቀን ድረስ ቤታችን ያልቀዘቀዘም ያልሞቀም ነገር ነበር። አንዳንዴ ሁሉም ሰላም እንደሆነ አባቴ ከውጪ ስጋ ገዝቶላት ይመጣል። እሷ ሳር ጎዝጉዛ ቡና ታፈላለች። ጎረቤት የሚያስቀና ሳቅ ባይኖረንም ደስ ብሎን ስጋ ጥብስ እንበላለን። እንዲህ ዓይነቱ ቀን ላይ ሞገሴ ብላ ትጠራዋለች። ዓይኔ ብሎ ያቆላምጣታል። ሌላውን ጊዜ እሷ ከፍቷት ጉልበቷን አቅፋ መስኮት ዳር ትቀመጣለች። እሱም ምን ሆንሽ አይላትም። ስም አይጠራሩም። «ደህና ዋልክ?» ትለዋለች። «ደህና! ልብስ ሰፊው ቤት ያስቀደድሽውን ጨርቅ አምጥቼልሻለሁ። ለክተሽ ችግር ካለው አምጪው ብሎሻል።» ብሎ ያመጣውን አጠገቧ አስቀምጦ ይቀመጣል። ጎርምሼም እናቴን የከፋት ሲመስለኝ በራሴ መንገድ ደስታዋን ልጨምርላት ከመፍጨርጨር ውጪ «ምን ሆናችሁ ነው?» ብሎ እናትና አባትን የመጠየቅ ያህል ቅርበትም ፊትም ሰጥተውኝ አያውቁም። ብዙ ጊዜ እሱ ነው ተለማማጭ ቢያንስ ይሞክራል።የሚቆጣውም የሚጨቃጨቀውም እሱ ነው። እሷ በትዳሯ ደስተኛ ያለመሆኗን ለማወቅ መጎርመስ ደረጃ ላይ መድረስ ሳያስፈልገኝ ገብቶኛል። የሆነ ከእርሱ ጋር መኖር ግድ ሆኖባት ዓይነት። ስልችት ያለው ፊት ነው የነበራት። የሁሉንም ቀን ጥቃቅን ክስተቶች እና ያልተሟሉ የቃላት ፀባቸውን ከላልሼ ሲጀመር …ሀሳብ … ቀጥሎ … ስሜት የደባለቀው ሀሳብ …., ብዙ ቀጥሎ ሲዳብር … እምነት ያደረግኩት ድምዳሜ

“ምክንያቱ ምንም ይሁን አባቴ ነው ያጠፋው። የሚለማመጣት ጥፋተኛው እሱ ስለሆነ ነው። ስልችት የሚላት እየደጋገመ አንድ ጥፋት እያጠፋ ቢሆን ነው። ከጊዜ እና ከጥፋቱ ብዛት ፍቅሯ እልቅ ብሎ ነው። “ የሚል ነው። እምነቴ በተግባር ሲደገፍ የ17 ዓመት ጎረምሳ ሆኜ አንድ ጠዋት ትምህርት ቤት ለመሄድ ውጪ ውሃ በጆግ ቀድቼ ፊቴን እየታጠብኩ ሲጨቃጨቁ ይሰማኛል። የሚለው በግልፅ ባይሰማኝም የሚቆጣው አባቴ ነው። ያለወትሮዋ የዛን ቀን ተለማማጭ ድምፅ ያላት እሷ ነበረች። ብዙ ጊዜ እኔ ፊት ስለማይጣሉ ታጥቤ ሳልጨርስ ፀባቸውን ለማብረድ በማሰብ ወደቤት ገባሁ። አባቴ አይቶኝ አላቆመም።

«ክብርም ካልገባሽ ፣ ፍቅርም ካልገባሽ ምንድነው የምትፈልጊው? ቤቴን ብዬ አንገቴን በደፋሁ?» አለ አባቴ በአይኗ እንዲተው ለመነችው። ይብስ እየጎፈላ ሲመጣ እሷም ከእርሱ እኩል እየጮኸች

«በልጄ ፊት አትጩህብኝ። በፍቅር የሞቀ ቤት የነበረን አታድርገው።» ስትለው እስክትንገዳገድ በጥፊ አጮላት። ዘልዬ እሷን ከማቀፍ ውጪ ማድረግ የቻልኩት አልነበረም። እሱ ኮቱን አንስቶ ወጣ። እሷም እጁ ያረፈበትን ጉንጯን እያሻሸች በመቆጣት አይነት ትምህርት ቤቴ እንድሄድ ልመና ያለበት ዓይነት ትእዛዝ ሰጠችኝ። እንደዛን ቀን ጸባቸው ከርሮ አይቼ አላውቅም። በፍፁም እጁን አንስቶባት አያውቅም። አባቴን ተቀየምኩት። እንዴት እጁን ያነሳባታል? ቀኑን ሙሉ አስብ የነበረው። «አሁን ትልቅ ሰው ነኝ። ምንድነው ችግራችሁ? እላቸዋለሁ። አስታርቃቸዋለሁ። እንቢ ካሉኝ የእናቴን እናት አያቴን ሁለቱም ይፈሯታል ለእሷ ነግሬ እንድታሸማግላቸው አደርጋለሁ።» እያልኩ ነበር። እቤቴ ስመለስ እናቴ ራሷን ሰቅላ ሰው እየተጯጯኸ ሲተራመስ ደረስኩ። የተፈጠረውን ጭንቅላቴ ውስጥ አብላልቼ ሆኗል ብዬ ለማመን ቸገረኝ።

እሱ አስቀይሟት ጠልታው አታስብለት። ለእኔ እንዴት አላሰበችልኝም? ዩንቨርስቲ ስትገባ እንዲህ እና እንዲያ እገዛልሃለሁ ያለችኝን ረስታው ነው? ለሰርጌ የምታደርገውን በተስፋና በፈገግታ የዘረዘረችልኝን ለማን አደራ ብላ ተወችኝ? ወልደህ አያት ስታደርገኝ ብላ የማላውቀውን ልጄን ያስናፈቀችኝንስ በአንድ ፀብ ረስታው ነው? ለእርሱ ብላ መኖር ብትጠላ እንዴት ለእኔ ብላ መኖር አልተመኘችም? የእርሱ ጥላቻ ከእኔ ፍቅር ጋር ተወዳድሮ በለጠባት?

ይቀጥላል

@maninet1

ፍርድ ገምድል
ክፍል ሁለት

ቀብሪያት ስመለስ ደስታዬንም ተስፋዬንም ወጣትነቴንም አብሬ ቀብሬ ስቃይ የተፈራረቀበት ህይወት የኖረ ሽማግሌ ዓይነት ስሜት እየተሰማኝ ተመለስኩ። ሞቷን ማስቀረት እችል እንደነበር እያሰብኩ ተንገበገብኩ። አንድ ቀንስ እንኳን «እናቴ ምንድነው እንዲህ ቁርምት ያደረገሽ?» ብዬ አልጠየቅኳትም «ደርሼልሻለሁ፣ እኔ መከታ እሆንሻለሁ፣ ደስ የሚልሽን ነገር አደርግልሻለሁ።» ብዬ ተስፋ አልሆንኳትም። እንዲህ ብያት ቢሆን ኖሮ: እንዲያ አድርጌላት ቢሆን ኖሮ …..
እያለ ውስጤ የሚንቀለቀል ቁጭቴን መወጫ አጠገቤ የነበረው እሱ ነው። ለተወሰኑ ወራት እሷ በህይወት እንደነበረችበት ጊዜ ሊንከባከበኝ ሞከረ። እናቴን የገደለብኝ እሱ እንደሆነ ደጋግሜ ነገርኩት። አልተቃወመኝም። ማስተባበያም አልሰጠኝም። እርሱም በልቡ ገዳይዋ እርሱ እንደሆነ ያውቃል። ትምህርቴን አቆምኩት። ቢቆጣም ፣ ቢለምነኝም ፣ ቢያስመክረኝም አልሰማ አልኩት። ተወኝ። እየቆየ እሱም ህመሙን ላለማዳመጥ አቅሉን ስቶ እየሰከረ መግባት ጀመረ። ከዓመት በኋላ አንድ ቀን ጠዋት ከስካር አዳሩ ሲነቃ ዝናብ እየዘነበ እናቴ ትቀመጥበት የነበረበት ወንበር ላይ ተቀምጬ አየኝ። እሷ ላይ ደንፍቶባት ከገደላት በኋላ እንዲህ ተናዶ ጮሆ አያውቅም።

«ቆይ ምን ሁን ነው የምትለኝ?የህሊናዬ ቅጣት አንሶኝ ነው በየቀኑ የምትቀጣኝ? ምን ባደርግ ነው ቁጣህ የሚበርድልህ? እኔም እንደእርሷ ሲጥ ልበልልህ?» ብሎ ጮኸብኝ

«የአንተ ሞት እሷን ቢያመጣልኝ አዎ እልህ ነበር። ቁጣ አይደለም የሚሰማኝ ጥላቻ ነው። መቼም ይቅር ልልህ የምችል አይመስለኝም።» ስለው ውስጤ መኖሩን ያላስተዋልኩት መንገፍገፍ ድምፄ ውስጥ ይሰማል። ቁጣው ወደ ድንጋጤ ተቀየረ። ከዛም ወደ ጥልቅ ሀዘን። ምንም አልመለሰልኝም። በቀስታ እግሩን እየጎተተ ከቤት ወጣ ። አልተመለሰም። ….. እኔም የምጠጣበትን ታክል ተፍ ተፍ ስል ውዬ ፣ማታውን ማሰብም መፀፀትም እስካልችል ጠጥቼ አምሽቼ፣ የእናቴንም ሀዘን የአባቴንም ጥላቻ የራሴንም ፀፀት የተሸከመችው የቀበሌ ቤታችን ገብቼ እጋደማለሁ። ጓደኛ ፣ ዘመድ አዝማድ ፤ ጎረቤት ሸሸሁ።
ይቀጥላል

@maninet1
@betsiroyal

ፍርድ ገምድ
የመጨረሻ ክፍል

ሜሪ ፈለቀ

ከአምስት ዓመት በኋላ የአባቴ አባት አያቴ አርፎ ለቅሶ ልደርስ ሄድኩ።ከማንም ሳላወራ ቀብሬ ልመለስ አቅጄ ነበር የደረስኩት። አባቴ ለቅሶው ላይ አልነበረምና ያለበትን አውቅ ከሆነ እየደጋገሙ በየተራ ያደናቁሩኝ ጀመር። እስከማስታውሰው ከአባቴ ጋር ብዙም የማይዋደዱት ወንድሙ ፤ ልጅ ሆኜ ከዘመዶቼ ሁሉ አብዝቼ የማቀርበው አጎቴ እጄን ይዞ እየመራ ወደውስጥ ይዞኝ ገብቶ በመጨነቅ ስለአባቴ ጠየቀኝ። ተፈጥሮ የነበረውን ሳስረዳው ግራ የተጋባ መሰለ። «በምን ሂሳብ ነው ሞገስን ለእናትህ ሞት ተጠያቂ ያደረግከው?» አለኝ። የሞቷ ቀን የተፈጠረውን እና የሀሳቤን መላ ምት እየነገርኩት አቋረጠኝ።

«ሞገስ በምን ምክንያት ነው የሞተችው አለህ?»
«ምንም አላለኝም። ማለትም አይጠበቅበትም ነበር።» እንደማመናጨቅ ዓይነት አቋረጠኝ። ሲጨናነቅ ከቆየ በኋላ «ሂድ እና አባትህን ካለበት ፈልገህ ይቅርታ ጠይቀው። ወይኔ ወንድሜን!! » ብሎ የሞተው አባቱ ሳይሆን ወንድሙ ይመስል ማልቀስ ጀመረ።

«ለምንድነው ይቅርታ የምጠይቀው? እናቴን ስለቀማኝ?»
«አንተ እንከፍ ሞገስ ለእናትህ ሞት ያበረከተው ምናምኒት አስተዋዕፆ የለም። ክፉ መገጣጠም ሆኖ የዛን እለት እርሙን እጁን ሲያሳርፍባት አየኸው እንጂ እናትህን ነፍሱ እስኪወጣ ነበር የሚወዳት። » አለኝ። ሲንቆራጠጥ ደቂቃ ፈጅቶ ደሜን ያቀዘቀዘ ታሪክ ነገረኝ።

«እናትህ ከሌላ ሰው ጋር ግንኙነት ነበራት። ከአባትህ በላይ የምትወደው ሰው ነበር። ከመሞቷ ከዓመታት በፊት ነው የምልህ። በኋላ አንድም አንተ ህፃን ስለነበርክ አንተን ከአባትህ ላለመለያየት ሁለትም በፍቅር የወደቀችለት ሰው በሰዓቱ ያልበሰለ እና ያልረጋ በመሆኑ ወደቤቷ ፊቷን መለሰች። ለአባትህ የተፈጠረውን ሁሉ ነግራው ይቅር ብሏት ነው አብረው የኖሩት። እሷን ከሚያጣ ዝቅ ማለትን ነበር የመረጠው። እሷ ግን እንደበፊቱ መሆን አቃታት። ከመሞቷ ከሳምንታት በፊት ከዛ ሰው ጋር መልሳ መገናኘት ጀመረች። አባትህም ለማወቅ ጊዜ አልፈጀበትም። እንደዛም ሆኖ ድጋሚ ይቅር ሊላት ዝግጁ ነበር። የዛን እለት ጠዋት ፀቡ ፍታኝ ብላው ነበር። አንተም ትልቅ በመሆንህ ደስተኛ ያልሆንኩበት ትዳር ውስጥ አልቆይም ብላ ስትወስን ያን ሁሉ ዘመን የጠበቃት ፍቅረኛዋ ሊቀበላት ቃል ገብቶላት ነበር። አብረው የሚኖሩትን የፍቅር ህይወት ሲያንሾካሽክላት ዓመታትን የባጀው ፍቅረኛዋ አባትህን ፍታኝ ብላ እቤቱ ስትመጣ ሀሳቡን ቀይሮ አገኘችው። ትነግረው የነበረው ሞገስም ትዳሩ እንዳንገሸገሸው፤ ትዳራቸው በሁለቱም በኩል እንዳበቃ ነበር። በመጨረሻዎቹ ቀናት ግን ድጋሚም እንደበደለችው እያወቀ ቤቱን ላለማፍረስ መታገሉን ሲሰማ ሞገስ ላይ እንደዛ የከፋ በደል መፈፀም አቃተው። ያኔ ነው ወደቤቷ ተመልሳ የዛን ከሰዓት ራሷን ያጠፋችው። »

«በፍፁም ይሄ ሊሆን አይችልም።እውነትስ ቢሆን ደግሞ አንተ ይሄን ሁሉ ነገር እንዴት አወቅክ?» እያልኩት ጭንቅላቴ መልሱን አቀበለኝ። እጄ ለቦክስ ተጨበጠ። ሸሸኝ።

«እንዳሰብከው ነው!! እኔን ለመቅጣት እና ለመበቀል የምታጠፋውን ጊዜ ያለበደሉ የቀጣኸውን አባትህን ለመካስ ተጠቀምበት።» ቢለኝም እጄ ታዝዞ አልተመለሰልኝም።

«የገዛ ወንድምህን ሚስት? እንዴት ዓይነት ክህደት ነው?» የራሴው እጅ እስኪያመኝ በጡጫ አንጉዬው ቀብሩን ሳልቀብር ወጣሁ። እንደእብድ ጭንቅላቴን ይዤ መንገድ ለመንገድ ብቻዬን እያወራሁ ተጓዝኩ። «አባቴ ሞቶ ቢሆን?» የሚል ሀሳብ ጭንቅላቴ ጓዳ ብልጭ ድርግም እያለ ጠጅ እንደጠጣ ሰው ጉልበቴን ይዞ አወለጋገደኝ።

ከቀናት ፍለጋ በኋላ ነበር መጠጥ ቤቱ ውስጥ ያገኘሁት።ለብዙ ደቂቃዎች ዝምም እንደተባባልን ቆየን። አሁንም ደግሜ

“ይቅርታ!” አልኩት። እጄን እጆቹ ላይ እያሳረፍኩ። አሁንም አልመለሰልኝም። የሚሞቅ እንባ እጄ ላይ ጠብ አለ። እናቴ ከሞተችበት ቀን በላይ ከፋኝ።

“ለምንድነው እውነቱን ያልነገርከኝ?” አልኩት

“እናትህ እኮ ነች! በህይወት ኖራ የማትክስህን ውድቀቷን ከቂም ውጪ ምን ሊጠቅምህ ልንገርህ?”

“ይቅር በለኝ!” አልኩት ድጋሚ

…….. ነገሩስ ጨርሰናል ….,,,

ውብ ዋሉልኝማ ❤️♥️♥️♥️

@maninet1
betsiroyal

ፍቅረኛዬ የተከራየችውን ቤት ቀይራ ወደ አዲሱ ቤት እቃ ስናጓጉዝ ሳለ በአጋጣሚ ዳጎስ ያለ ደብዳቤ እጄ ገባ ።

የሰው ልጅ የተሸጎጠ ነገር ለማወቅ ያለው ስምጥ ፍላጎት አይለካም ፤ ከተገለጠ ሙሉ ነገር የተሸፈነው ግማሽ ነገር ቀልቡን ያስተዋል።

በፍጥነት...

የዳጎሰ ወረቀቱን እና ፖስት ካርዶቹን መኪናዬ ውስጥ ሸጉጬው ተመለስኩ።

"የት ሄደህ ነው ?"

እንዳልሰማው ወደ እሷ እየተራመድኩ ሆን ብዬ ተደናቀፍኩ
"እኔን" አለች ተደናግጣ

አሁን ቀልቧን መበተኔን አየሁት ፤ "Attention divert" ማድረግ በተፈጥሮ መካኔን አውቃለሁ ።

አንዳንድ እውነት ውጤቱ ብቻ ምስክር ነው!!!

በጣም የናፈቀኝን ሰው ለማግኘት አይነት ሲመሽ ወደ ቤቴ በረርኩ የዳጎሰውን ወረቀት ለማንበብ።

ደረስኩ

የድሮ ፍቅረኛዋ የፃፈውን ደብዳቤ ማንበብ ጀመርኩ ፤ ፖስት ካርዱ ላይ የፃፋቸው ሃሳቦች ህይወት አላቸው ፤ ወረቀት ላይ ያሰፈራቸው ፅሁፎች ትናንት የሄዱበት መንገዶችን ይናገራል።

እንደሚያከብራት ፣

ሰርፕራይዝ ለማድረግ የሚሄድባቸው ልፋቶች ፣ ስለ ነገ ልጆቻቸው ስም ፤ ስለ ነገ መንገዳቸው የሚያወራት ፣

ስታኮርፍ የሚለማመጥበት መንገድ ፣ የእሷ የሆኑትን የሚያከብርበት ፤ የእሷን ጉዳይ ጉዳዩ አድርጎ መቁጠሩን ካነበብኩ በኋላ መለመላዬን የቀረው እስኪመስለኝ አስደነገጠኝ።

መቼ ነው የእሷ የሆነውን እንደምወድ በማስረጃ ያሳየኋት ፤ መቼ ነው ስለነጋችን እንድትናፍቅ አድርጌ የማውቀው ?

መቼ ነው ያልጠበቀችውን ባልጠበቀችው ሰዓት አድርጌ አስገርሜ የማውቀው ?

የጣዕም ልኬቷን ሰቅሎታል ፤ ሁሉም ሰው የራሱ የኑሮ ቀለም ቢኖረውም የእኔ እና የእሱ ሁኔታ ሩቅ ነው ።

እሷ ለእሱ የምትሆነውን ሩብ ያህል የምትሆንልኝ አይመስለኝም ፤ የጣዕም ልኬታችን በመጣንበት መንገድ መሞረዱ እሙን ሆኖ ሳለ የመጣችበትን መንግድ በጥንጡም ለመረዳት እንዴት አልሞከርኩም ?

አብሪያት ያለችውን ልጅ ትናንት እንዴት በጥበብ ለማወቅ አልጣርኩም ?

እንዴት ቀልቦን አልገዛኋትም ?

በዙሪያችን ፣ በእጃችን ያሉንን አለማወቅ የሚያክል ድክመት ያለ አልመስል አለኝ ።
© Adhanom Mitiku

@maninet1
@betsiroyal

የምናፈቅረው 'ሰውን' ወይስ 'ሰውነትን' ነው?
░▒▓█▓▒░▒▓█▓▒░▒▓█▓▒
..........በእኔ በኩል ከልባችን በላይ ሥጋችን የተዋኻደ ነበር፤ ጠረኗ ያሰክረኛል፡፡ ከንፈሯ ከንፈሬን ደርቆ ውሃን እንደተራበ መሬት ይናፍቀዋል፤ የዓይኖቿ ብሌኖች በመሐፀን እንዳለ ሕፃን በፈሳሽ የተከበቡ ናቸው። መቼ ነው የምታለቅሰው? የሚያስብሉ፤ ቸልተኝነቴ አጥንቷ ድረስ ዘልቆ እንደሚያማት ይገባኛል፡፡

ብዙ ጊዜ ዕንባ በዓይኖቿ ሲሞላ ታዝቢያለሁ፡፡ ግን አታለቅስም ነበር፣ ዕልኸኛ ናት፡፡ ዕልዃን እወደዋለሁ፡፡ ሲበዛባት አለቀሰች፤ ዕንባዋ እንደ ጠበል ከተጠናወተኝ የጅልነት መንፈስ የሚፈውሰኝ መስሏት፡፡ ሐዘኗ ውስጤን ያመኝ ነበር፡፡ ተገናኝተን በተለያዬን ቁጥር፣ ካላፈቀርኳት ለምን ጊዜዋን አባክናለሁ? እል ነበር ለራሴ... ያ ሐሳቤ ግን ከከንፈሬ አልፎ አያውቅም፡፡ ዛሬ ላይ ግን ቅጥ ያጣ ራስ ወዳድነት ነበረ እላለሁ።

ለሴት ልጅ ሰውነት በፍቅር መውደቅ፣ ማንነትን ከማፍቀርም በላይ ኃያል እና አደገኛ ነገር ነው፡፡ ብዙዎች ሰውነትን እና ሰውን በማፍቀር መካከል ያለውን ከጸጉር የቀጠነ መስመር መመልከት ተስኗቼው ሲወድቁ አይቻለሁ፡፡

ትዳር ሲፈራርስ፣ ልጆች ሲበተኑ ተመልክቻለሁ፡፡ ይመርመር ቢባል “የፍቅር” ተብለው የተገጠሙ ግጥሞቻችን እና የተዘፈኑ ዘፈኖቻችን የቆንጆዎችን ቆዳ ማለፍ የተሳናቼው የገላ አምልኮዎች ሳይሆኑ አይቀሩም፤እንደ ንቅሳት ቆዳ ላይ የተሳሉ ቆዳ ሲጨማደድ አብረው የሚኮማተሩ። ያቺን ቀጭን መስመር ማዬት የሚቻለው፣ እውነተኛ የፍቅር መነፅር ካጠለቅን፣ አልያም ከራስ ወዳድነት ሕመም ከተፈወስን ወይም ደግሞ ጸጉር ሰንጣቂ ነፍስ ካለን ብቻ ነው፤ ይቻላል ወይ? ይላሉ ብዙዎች፣ ካልቻላችሁ መጭውን ቻሉት ከማለት ሌላ ምን ይባላል?!
░▒▓█ ░▒▓█▓▒░▒▓█▓▓
📚 አልተዘዋወረችም
✍️ አሌክስ አብረሃም
📄 17

ፀጉር ቆራጩ ደምበኛውን ያዝናናል ብሎ ያሰባቸውን ነገሮች በማጫወት ላይ ነው።
“ያ ይታይሃል?...አስፖልቱ ዳር የተቀመጠው ልጅ..?”
“አዎ”
“ከምታስበው በላይ ጅል ነው”
“እንዴት? ”
“ቆይ ላሳይህ” አለና ፤ወጣ ብሎ ልጁን ጠርቶ ወደ ውስጥ አስገባው።
“ተመልከት እንግዲህ..”

ከኪሱ አንድ የአምስት ብርና አንድ የአስር ብር ኖት አወጥቶ ሁለቱንም መሬት ላይ ጣላቸው ከዛ ልጁን “ ከሁለቱ ትልቁን ብር አንስተህ ሂድ” አለው። ይሄኔ ያ ልጅ አምስቷን ብር ብድግ አርጎ ወደ መጣበት ይመለሳል።
“አየህ ይሄን ደደብ?...በዚ እድሜው አምስት ብርና አስር ብርን መለዬት አይችልም!!”
“በጣም ሚገርም ነው” አለ ፀጉሩን ሊቆረጥ የመጣው ሰውዬ ባዬው ነገር የእውነትም ተገርሞ።

አስተናግዶት ከጨረሰ በኋላ ተሰነባብተው ተለያዩ። ይሁን እንጂ ያ ሰውዬ ቅድም ባየው ነገር ተገርሞ ብቻ ሊቀር ስላልፈለገ ልጁ ወዳለበት ሄዶ ያሳሰበውን ነገር ጠየቀው
“እውነት አንተ..አስር ብር እና መቶብርን መለየት አትችልም?”
“አዪዪ..” አለ ልጁ
“አዪዪ..10 ብሩን ያነሳሁ ቀንማ ጨዋታው ያበቃል”

by Yosef Gezahegn

@maninet1
@maninet1
@betsiroyal

* ይለቀቅ?

📙የሀበሻ ቀልዶች
✍️አሰፋው መኮንን
@maninet1
@maninet1
@betsiroyal

አገባሁ...ወለድኩ...ደገምኩ...ሠለስኩ:: እሱን እያፈቀርኩ ከወንድሙ ሦስት ልጆች ወለድኩ:: እሱን እየተመኘው ወንድሙን አገባሁ:: ካሳለፍናቸው 3 የUniversity ጓደኝነት አመታት በኃላ እንደተመረቅን ነበር ላገኘው እንደምፈልግና ብቻውን እንዲመጣ የነገርኩት ገና ተደላድሎ ከመቀመጡ ነው " አፈቅርሀለው" ያልኩት ::ሳቀ በሀይል ሳቀ
"አንቺ ያምሻል እንዴ ለቁም ነገር ነው ምፈልግህ ስትይኝኮ ምን ሆነች ብዬ ስንት ነገር ነው ጥዬ የመጣሁት ትቀልጃለሻ አንቺ ሆሆ " አየሁት .. እነዛ መጀመሪያ ካየዋቸው ቅፅበት ጀምሮ ራሴን ያሳጡኝን አይኖቹን ትኩር ብዬ አየዋቸው ::ሚያረገው እየጠፋው ሁሌ እንደሚጠራኝ
" ቃሊ የምርሽን ነው እንዴ "
"አዎ አፈቅርሀለው" ፊቱን በአንዴ ወደ ግራ የተገባ ፊት ቀይሮ " ከመቼ ጀምሮ ቃሊ?"
"ከመጀመሪያው የሁለተኛ አመት የትምርት ቀናችን ከማክሰኞ ከመስከረም 22 ጀምሮ" ደነገጠ " ቃሊ please አታሹፊብኝ " ፊቱ ሲቀላ እየታወቀኝ መጣ
"ምንም እንድትለኝ አይደለም ብንጋባ ብታፈቅረኝ ምንምን በደስታ ልሞትብህ ስለምችል አላቅም ግን እህቴ ነሽ ምናምን እንዳትለኝ ደሞ" መንተባተብ ጀመርኩ ::
"ቃሊ"
"ወዬ" ልቤ በፍጥነት ስትመታ ይታወቀኛል
"ኤላኮ ያፈቅርሻል" ፊቱ ማላቀውን እሱን ሆነብኝ..ውስጤ ሲፈረከስ ተሰማኝ ኤላ ማለት? ኤላ የሱ ወንድም? ማለት መንታ ወንድሙ ኤላ ? ኤላ ጓደኛዬ? ኤላ ኤላ ውስጤ ተተራመሰ.....በመልክም በአመልም ምንም አለመመሣሠላቸው ሲገርመኝ ነበር ሶስቱን የጓደኝነት አመታት ያሳለፍነው :: ሁሌም አብረን ነበርን እሱም..ኤላም...እኔም :: በሁለት መንታ ወንድማማቾች መሀል ያለው ብቸኛ ጓደኛቸው በመሆኔ ጊቢ ውስጥ እንደኔ ደስተኛ ሰውም የነበረ መኖሩን እኔንጃ እኔን መሀል አርገው ሲተራረቡ መስማት...ሲበሻሸቁ...አንዳቸው እንዳቸው ላይ ሲቀልዱ ...እጄን የኔው ተፈቃሪ እንደቀልድ በቦክስ ሲመታኝ ኤላ ሲቆጣው...ተሸክመውኝ ሲሯሯጡ ላየን 3 መንታዎች እንጂ ማልዛመዳቸው መሆኔን ማንም አይጠረጥርም አንዳንዶቹ ደሞ የማንኛው ናት እንደሚሉም አቃለው :: የጊቢው ሴቶች ደሞ ኤላን ይወዱት ስለነበር እንዳጣብሳቸው ሚወተውቱት እኔን ነው ኤላ ግን ወይ ፍንክች ስለሚል ማጣበሱ አልተሳካልኝም ነበር :: ሲፈጥረኝ ከሴት አትዋደጂ ያለኝ ይመስል ከልጅነቴ ጀምሮ ሴት ጓደኛ ኖሮኝ አያውቅም ጊቢ ገብቼም የመጀመሪያውን freshman አመት ከማንም ጋር አልግባባም ነበር ከዛ ግን ሁለተኛ አመት ላይ ምንማረውን ትምርት መርጠን ስንመደብ እነሱን አገኘው ለዛም ነበር በጓደኝነታችን ደስተኛ የነበርኩት :: ከ6ኪሎ ጊቢ በታች ያሉ ማሚ ቤቶች ሄደን ምሳ ስንበላ በእጄ ከአንድ ጉርሻ በላይ ስጎርስ አላስታውስም በሁለቱ የፉክክር ጉርሻ ነበር ጠግቤ ምነሣው በዛ ላይ ሳየው ገና ልቤ የደነገጠለት ልጅ ጓደኛ ሆኜ ስስቅ መዋል ..ደስታ ማለት እኔ ነበርኩ:: "ጉድና ጅራት ወደ ኃላ ነው" አሉ....ያን ቀን "ኤላኮ ያፈቅርሻል " ሲለኝ ጉሮሮዬም ልቤም አይምሮዬም ደረቀብኝ ጎኔ ያለውን ግማሽ ኮካ አንስቼ ጨለጥኩት ::
"ኤላ የቱ" አይኖቼ ሲፈጡ ይታወቀኛል
"ቃሊ ኤላ የኛ ነዋ "ፊቱ የማላቀው ቋንቋ ፅሁፍ ሆነብኝ አየዋለው አይገባኝም ::
"ከመቼ ጀምሮ?" እሱ እንዳለኝ እኔም አልኩት ማወቄ ይቀይረው ያለ ነገር ይመስል
"ካየሽ ቀን ጀምሮ ቃሊ ትዝ ይልሻል class እንደጀመርን ካፌ አጊኝተንሽ ብቻሽን ከምትበዪ ከኛ ጋር ምሳ አብረን እንብላ ብዬሽ አብረሽን የዋልሽ ቀን " እንዴት እረሳዋለው ያን ቀን በአይን ካፈቀርኩት ሰውጋር አምላክ አገናኘኝ ብዬ በደስታ ስፈነድቅ ነበር የነጋው :: ፀጥ ብዬ ሳየው ወሬውን ቀጠለ "ያን ቀን ማለት ኤላ ካላስተዋወከኝ ብሎ ሲለምነኝ ነበር ታውቂያለሽ ቃሊ ኤላን ከማህፀን ጀምሮ ሳውቀው ከአፉ ወቶ ሚያውቀው የሴት ስም ያንቺ ብቻ ነበር :: ቃሊ ኤላ አንቺን ስለማግባት ካንቺ ስለመውለድ ብቻ ነውኮ ሚያልመው ደሞ እሱም ከዛሬ ነገ እነግራታለው እያለ ነውኮ የተመረቅነው ቃሊ ኤላን ያዢው ወንድሜ እስከነፍሱ የሚያፈቅራት ሴት ታፈቅረኛለች ብሎ ማሰቡ ለኔም በሽታ ነው ቃሊ ደና ዋይ ኤላን ያዢው" ብሎኝ ነበር በተቀመጥኩበት ጥሎኝ የሄደው "ኤላን ያዢው" ይሄን ነበር ያለኝ :: .....እኔም ኤላን በእጄ በልቤ እሱን ይዤ ይኸው ሶስተኛ ልጃችንን ወለድን:: .....ኤላ ህልሙን ኖረ እሺ እኔስ?? የሱ ህልም ማስፈጸሚያ ልሆን ነበር የተፈጠርኩት? ያፈቀሩትን ስለማግኘት ኤላ ያሟላው እኔ ያጎደልኩት መስፈርትስ ምን ነበር??? ልጆቼስ አጎታቸውን በልቤ አግብቼ እንደምኖር ያወቁ እንደሆነ እንዴት ይዳኙኝ ይሆን ? እንጃ....ሁሉም ያፈቀረውን አያገባም..ልክ እንደኔ::


By ቃል_ኪዳን


@maninet1

📓ርዕስ፦ በኢያሪኮ ከተማ
✍️ደራሲ፦ አዘርግ

በደራሲው ፍቃድ የቀረበ

📚 @maninet1

[ Cultic Poetry - A Letter To Thyself ]

ኮቴህ ደረቅ ነው ፥ ዳናህ የለው ገድ
እስኪ አርፈህ ውድቅ ፥ አትወላገድ
ምን ልትፈጥር ነው ፥ የምትታገል?
አውቀህ ተሰበር ፥ ድቀቅ እንደ ገል

በቄንጥ አትርገጥ ፥ መውደቅ ፍራቻ
መንገድ ዳር ፍሰስ ፥ እንዳራሙቻ
እንቅፋት ሆነህ ፥ ሌላውንም ጣል
እሱስ ከመውደቅ ፥ ለምን ያመልጣል?

ልብህን ሰብረህ ፥ በል ቅደማቸው
ደምህን ሲያዪ ፥ ይፍላ ደማቸው
ስልክህን ዝጋ ፥ ከደጃፍህ ጋር
ሳራህን ተዋት ፥ ግባ ወደ አጋር

ማነው ጓደኛ ፥ ወዳጅ ምንድነው?
ስሱ ልብህን ፥ በል አደንድነው!
ምን አውራ ቢሆን ፥ ዶሮ አይጠመድ
እርባና ቢስ ነው ፥ ዘመድና አመድ

በርህ ላይ ጠላት ፥ ይንከላወሳል
ሰይፍህን ሞርድ ፥ ሻሞላህን ሳል
ግራህን መትቶ ፥ ቀኙን ላለ ሰው
ለጥፊው ምላሽ ፥ ዐይኑን አፍስሰው

ከእሪያ ተማር ፥ ሁን ታጥበህ ጭቃ
የጲጥፋራ ሚስት ፥ ትርታህ ጨቅጭቃ
ፍቀድ ልብስህን ፥ ታውልቅ መንጭቃ

[
አንቺም
ዳግማዊት ማርያም ፥ ፅድቁ ሚርብሽ
የዘመኔ አዳኝ ፥ ሲሻ ሊያድርብሽ
ብስራት ያለልሽ ፥ ሆኗል ስብራት
ቁርሳችን ሆነ ፥ የሻገተ ራት
በሺ ፍለጋ ፥ በብዙ ትግል
አገኘኹ ብሎ ፥ ንፅኂት ድንግል
መላክ ሲመጣ ፥ ዜና ለፋፊው
"ወንድ አውቃለሁ" በይ ፥ ቀልቡን ግፈፊው
]

ሙንጨራህን ተው ፥ ግጥምህን ቅደድ
የማይወድህን ፥ አንተም አትውደድ
ቃል የሰነፍ ነው ፥ አፈሙዝ ታጠቅ
ዝረፍ ከደሀው ፥ ካለው ላይ ንጠቅ

ማንም አይኑርህ ፥ ማንም አትኑረው
እያሪኮህን ፥ ብቻህን ዙረው
አታልቅስብን ፥ አትነፋረቅ
በዝምታ ውስጥ ፥ ከሞትህ ታረቅ!

ጎልጎታ ጫፍ ላይ ፥ ወጥተህ ተራራ
"ልሞት ነው" ብለህ ፥ አታስፈራራ
ምን ይጎዳና ፥ አንድ ኃጥዕ ሞቶስ
እንኳን አንተና ፥ ሞቷል ክርስቶስ
ኡኡታ ጩኸት ፥ አያስፈልግም
ማለት ነው`ንጂ ፥ ዝም ብሎ ፍግም!

ቢወዱኝ ብለህ ፥ ታግለሀል ብዙ
በልብ ገፉህ ፥ ባፍ ቢጋብዙ
አይፈልጉህም ፥ አትፈልጋቸው
ለርኩስ አይሆንም ፥ ንፁህ አልጋቸው!
ዓለም ገፋችህ ፥ ካለም ገንጥላ
ልክ እንደራስህ ፥ ሌላውን ጥላ!

እርም እርሙን ብላ ፥ ወይንህን ጠጣ
ከቶ አይግደድህ ፥ ማንም ቢቆጣ
እንኳን ለነገ ፥ ለዛሬ አትስጋ
አርብ 'ሮብ ሳትል ፥ አነክት ሥጋ
ተፀየፋቸው ፥ ቄሱና ሼኹን
በግነት ሲሹ ፥ አንተ ፍየል ኹን

በሾላ ዛፍ ላይ ፥ አትንጠላጠል
ትበልጥሀለች ፥ አንዲቷ ቅጠል
መርዘሙንማ ፥ እረዝመኸዋል
ግን አዳኝህኝ ፥ መች አይተኸዋል?

አካልህ የለው ፥ የሥጋ ሙዳ
ችጋር ወዳጅህ ፥ ኪስህ ቤርሙዳ
የያዝከው ሁሉ ፥ ዋጋ አልባ ጠጠር
ባርኮቱን ሳይሆን ፥ ብጉርህን ቁጠር!

ሲያይህ ይድነቀው ፥ ይግረመው እግዜር
አፍርቶ ሲያየው ፥ የበተነው ዘር

፨ ፨ ፨

በዚህ ሁሉ ግን ፥ ይህን አትርሳ
ታመውት ነበር ፥ ያንተ ነቀርሳ
በ'ነሱም ነበር ፥ ባንተ ያየነው
የሆንከው ሁሉ ፥ የሆኑትን ነው!

፨ ፨ ፨

[የሁለት ዓመት ታዳጊ የሆነ ግጥም - ፌስቡክ እንዳስታወሰኝ]
ዮናታን ጌታቸው
ከራሱ ፌስቡክ ገጽ የተወሰደ

ብያት ነበር አንድሺ አንድ ጊዜ ነግሪያት፤ ትዳር ብለን ጎጆ ሳንመሰርት፣ ህይወትን በአንድ ጣራ ስር አሀዱ ብለን ሳንጀምራት በፊት............ደጋግሜ
ትዳር እጅጉን የከበረ የህይወት መዓድ ነው፣ ሊዳፈሩት የማይገባ በክብር የሚቋደሱት ቅዱስ ገበታ.........
ትዳር በፍቃድ መፍሰስ ነው፣ እንደውሀ........ በገዛ ፍቃድ ራስን ማፍሰስ፣ እንዳይታፈሱ ሆኖ፣ ሳይሰስቱ፣ ቆንጥረው ሳያስቀሩ አጋሬ ካሉት ሰው እግር ስር ካለስስስስት መፍሰስ፤ በፍቅር.........መቼም ላይታፈሱ..............

እንዳልኩት ሆነ........ እንዳልታፈስ ሆኜ ፈሰስኩ........
ግን.........ሳተች፤ የነገርኳትን ረስታው ይሁን ንቃው እንጃ..........ቆረሰቺኝ፣ እኔነቴን ሸራረፈችው፤ ሊጋሩት የማይገባን ተፈጥሮ አጋራችው። እሷነቷን፣ እኔነቴን ፣ሴትነቷን፣ ወንድነቴን በአንድ ሸክፋ አጋራቻቸው........... ለዛውም ከራሴ በላይ ለማምነው ወዳጄ። ወሬ አይደለም የሰማሁት፤ በአይኔ ነው ያየሁት በአይኔ በብረቱ............ ከዛስ ምን አደረኩ?

ሁለቱንም ባሉበት እጅ ከፍንጅ ፣ ከራሴ በላይ አምናችሁ ነበር እናንተ ግን.......፣ ፍቺ ምናምን.......... በፍጹጹጹም። ይልቁንስ.......... ምንም እንዳላየ እንዳልሰማ ሆኜ ከወትሮው ፍቅሬን ሳልቀንስ ተበቀልኳቸው። ለህሊና ዳኛ ለጸጸት ቁራኛ አሳልፌ ሰጠኋቸው። ከህሊና በላይ ተበቃይ ከወዴት አለ!? አንዳሰብኩት ነው የሆነው እንዳቀድኩት......

ከአንድም ስንቴ ራሴን ለሞት አሳልፌ እስከመስጠት መስዋትነት የከፈልኩለት ባልንጀራዬ ጸጸቱን መቋቋም ቢያቅተው በገዛ አንደበቱ ለፈለፈልኝ እግሬ ላይ ወድቆ እያለቀስ፣ “ባለቤትህን አስነወርኳት፤ ለውለታህ ይህን መለስኩልህ ማረኝ” አለኝ...........

እኔስ ምን አደረኩ? ፈነከትኩት አና......ቱን በጠርሙስ፣
ለምን እንደዛ አደረክ ብዬ አይደለም፤
አላምንህም ባለቤቴም አንተም ይህን አታደርጉም ከፈጣሪዬ እኩል ነው የማምናችሁ ብዬ............

ታሰርኩ........ባለቤቴ ልትጠይቀኝ መጣች። ከደህንነቴ በላይ የሰማቸው አሳስቧት ነው የመጣችው። ከገዛ አንደበቴ በገዛ ጆሮዋ ልታረጋግጥ............

«የሰማሁት እውነት ነው ወዴ?»
«ምን ሰማሽ»
«እሾህ ሲወጋው የምታነባለትን ጓደኛህን ፈነከትከው?»
«አዎ»
«ለምን?»
«ባንቺ መጣብኛ?»
«እ.......አ...አ...አመንከው?»(ተንተባተበች፤ ፈስ ያለበት....)
«ምኑን?»
«አ......ይ ማለቴ...... ባንቺ መጣብኝ ስትል!?»
«ባለቤትህን አስነወርኳት አለኝ»
«እ........»(በድንጋጤ ደርቃ ቀረች)
«ምነው?»
«አ....አ....አ.....ይ ምንም። ምን አይነት ባለጌ ሰው ነው! እንደዛ እየሆንክለት እንዴት ትዳርህን ለማፍረስ እዚህ ድረስ ይጓዛል.........? ሆሆሆሆሆ»

«እኮ እኔም ለዛ እኮ ነው አናቱን የፈነከትኩለት። ስፈነክተው ደሞ ዝም ብዬ አይደለም፤ ከፈጣሪዬ እኩል እንደማምንሽ እየነገርኩ፣ እንኳን እሱ አንቺ ራስሽ በገዛ አንደበትሽ አዎ እውነት ነው ብትዪኝ እንኳ እስከማላምንሽ ድረስ እንደማምንሽም ጭምር እየነገርኩት ነው የፈነከትኩት፤ ልክ አይደለሁ.........?»

ሳግ ተናነቃት.........እንባዋ አመለጣት.......... ስታለቅስ አለቅጥ ታሳዝነኝ ነበር.........ነበር ነው አሁን ግን አንዳች የደስታ ስሜት መላ ሰውነቴን አጥለቀለቀኝ፣ ደስስስስስ...... አለኝ። ጸጸት ሲሸነቁጣት፣ ስሜቷን መቆጣጠር እስኪያቅታት፣ በውብ ጉንጮቿ ላይ ኩልል በሚሉ የእንባ ዘለላዎቿ ውስጥ የጸጸት ረመጥ ይታየኛል........ሲፈጃት፣ ሲለበልባት..............

«ለምንድነው ምታለቅሽው የኔ እናት?»

«እሺ ነገሩ እ.....እውነት ቢሆንስ?(ሳግ እያደናቀፋት)»

ሆነ ነዋ በቃ........ሆነ። ከጸሀይ በታች አዲስ ነገር የለም፤ መኖር ይቀጥላል። ኢሄንን እኮ ነው ደጋግሜ የነገርኩሽ፤ ተንበርክኬ ቀለበት ያጠለኩልሽ እለት በገዛ ፍቃዴ እንዳልታፈስ ሆኜ ነው የፈሰስኩት ምንም እስካይቀረኝ፣ ጠብታ ስንኳ...........ታዲያ የትኛው የፈሰሰ ውሀ እንደታፈሰው ልታፈስ? የትኛውም በደል ፣ የትኛውም ስህተት ከፈሰስኩበት ትዳር፣ ከፈሰስኩበት ማንነትሽ አያፍሰኝም ካለሞት በቀር...........

የውስጧ ማዕበል ከቅድሙ በባሰ አናወጣት። እንባዋ በጉንጮቿ መንታ መንገድ አበጀ፣ ለቅሶዋ ሳግ ባፈነው ድምጽ ታጀበ...........

«እባክሽ አታልቅሽ የኔ እናት ነፍሴን አታስጨንቂያት»

አንዲት ቃል ተነፈሰች የመጨረሻ........የመሰናበቻ.....

«እኔ ላንተ የምገባ ሴት አይደለሁም።»

ሔደች........ቀናት አለፉ ሳምንታት...... ወራት...... ድምጿ ጠፋ ከነዘመድ አዝማዶቿ.......

ተፈታሁ.........ቤተሰቦቿ ከቤተሰቦቼ በአንድ ተሰባስበው ጠበቁኝ.........የሰላም ያይደለ፣ የደስታ ያይደለ ስብስብ፤ ጽልመት የወረረው፣ ጨለማ የነገሰበት ስብስብ፣ ጥቁር ግርማሞገስ የተጎናጸፈ ጭንቀትን የሚያነግስ ስብስብ........

እግሬ የቤቴን ደጃፍ እንደረገጠ ጫጫታና ወከባ........ ቤቱ ተተራመሰ.......ለቅሶ........ ወንድሟ መጣ

«ኤፍራታ ይህን አስቀምጣልህ ሔዳለች» ብሎ ደብዳቤ ሰጠኝና ተጠመጠመብኝ።
«ወዴት?»ልቤ ያሰበው እንዲሆን እየተመኘሁ ጠየኩ

«ራሷን አጥፍታለች»

እንደአዲስ ለቅሶ........ሶስት ወጣቶች ከበውኛል....... በድንጋጤ አንድ ነገር እንዳልሆን፣ ወይ ራሴን እንዳልጎዳ ሊይዙኝ........መሰለኝ...........

ደብዳቤውን ከፈቼ አነበብኩት ከዛስ?
ፈገግ.......... በዛ ሁሉ ሁካታ መሀል፣ በዛ ሁሉ ጫጫታ መሀል እንዳይሆን ይሆናል ተብዬ ስጠበቅ እኔ ግን ምን ሆንኩ?........... ፈገግ አልኩ............

እቅዴ ሰመረ..........ያባከኑኝን፣ ያጎደሉኝን፣ የካዱኝን፣ ያቆሰሉኝን የኔ ያልኳቸውን ሰዎች......... ሳልሰነዝር መታኋቸው........ከባድ ምት፣ ሊቋቋሙት የማይቻል......... ሳልነካ አቆሰልኳቸው፣ ከመሰረታቸው አነዋወጥኳቸው....... ናድኳቸው፣ ደረመስኳቸው..........በገዛ እጃቸው....... ከራሳቸው አፋጀኋቸው..........

ለወደዳቸው ካለስስት የፈሰሰ ማንነቴን ጠላሁት። በቃ ራሴን በምወድ ሰአት እንደራሴ ወደድኳቸው። ራሴን ስጠላ ደሞ እንደራሴ ጠላኋቸው።

ለዛም ነው ሞቷን ሲነግሩኝ ፈገግ ያልኩት ከወዳጄ እብደት ጋር ደሞ ይበልጥ ያስፈግጋል..........ህ...... ግን የውስጤን ማን ተረድቶልኝ!.........አሁን የት ነኝ?..........ጸበል ለምን? የሚስቱ መርዶ አሳቀው........ እናስ? እናማ በጤናው አይደለም.......... ስለዚህ ጸበል.........

አሁን ግን ጸበሉ ምኔን እንዳጠበው እንጃ ይጨንቀኝ ጀምሯል.....ጸጸት መልሶ ለኔ ሊሆን ነው መሰለኝ.....



ገፀ ሕይወት

አባቴ ካጠገቡ የማትጠፋ ራዲዮ ነበረችው። ኹለት ስፒከር አላት ካሴትም ታጫውታለች...

ፀሐይ በራኺን አስሬ ይሰማታል። አክስቴ ትመስለኝ ነበር፤ ድምጿ እኛ ቤት አይጠፋም ስትዘፍን እኩል እላለሁ ከሙዚቃው ጋር...

"መጀመርታ ፍቅሪ
ኣብ መን ተጀመረ
ኣዳምን ሔዋንን
አለም ምስተፈጥረ
ኣነ ከይፈለጥኩ
አብ ልበይ ሐደረ
እንታይ እሞ ክገብር
ዕድለይ ካብ ኮነ አይ..አይይ*

አባቴ ወታደር ነበር። ጠይም ነው መከፋቱ ፊቱ ላይ ብዙ አይታይም፤ ማጣቱ በየምክንያቱ አንደበቱ ላይ አይንፀባረቅም ....ዝምም ይላል

ረጋ ያለ ነው ።

ጥርሱን ሳያሳይ ነው ደስ ብሎኛል ፈገግታ ፈገግ የሚለው፤ ተገርሜያለሁ ፈገግታ ፈገግ የሚለው ተበድያለሁ ፈገግታ ፈገግ የሚለው አጠገቤ ሲሆን እረጋጋለሁ።

ሰሞኑን ሰውነቴ እንደከሳ፤ ፊቴ ማዘን እንደታከከው፤ ድብርት ነገር እንዳንጃበበብኝ አወቀ። አባትም አይደል? ንብረቱም አይደለሁ? ዋጋ ከፍሎብኝም የለ?

ፊቴን አይቶ "ደህና ነህ ህሉፌ ...?" አለኝ።

'እ ...ትንሽ ደከመኝ...
አሻግሬ ማየት እያቃተኝ... ቶሎ ቶሎ እጅ እየሰጠው ..." አልኩት።

ረጅም ሰዓት ዝም አለ ...

"ታስታውሳለህ በረሃ እያለሁ የምፅፍላችሁ ደብዳቤ፤ በርቱልኝ፥ ምን ጎደላችሁ፥ እወዳችኋላሁ፥ በቅርብ እደውልላችዋለሁ፥ እመጣለሁ፥ ዓይነት ይዘት ያለው ፅሁፍ ?! ።"

"ባሩድ እየሸተተኝ ነበር፥ አብሬው የዋልኩት ጓደኛዬ ሞቶብኝ፥ ፍንጣሪ ጥንት መ'ቶኝ፣ ጠላት ሊፈጀን እያቀደብን፣ ጀኔራላችን ምሽግ ሰብራችሁ ግቡ ሊለን እንደሚችል እያወቅን፥ የተቀበረ ቦንብ ልንረግጥ እንደምችል እያወኩ፥ ከአውሮፕላን የተወረወረ ፈንጅ ሊያወድመን እንሚችል እያወኩ፥ ነበር...አሻግሬ ተስፋ የማየው..."

ፋታ ወስዶ ቀጠለ...

"ልጆቼን እንደማገኛቸው፥ አባት እንደምሆንላቸው፥ ሚስቴን ዳግም እንደማገኛት ፤ቤተክርስትያን እንደምሳለም የፈንጂ ድምፅ ሳልሰማ እለት እለት የወደቀ ሬሳ ሳልሻገር እንደምኖር ተስፋ አደርግ ነበር ...

ስለመግደል የሚታቀድበት ስፍራ ላለመሞት የሚዘየድበት ቦታ አንድ ቀን እንደማልኖር አምን ነበር ...!

ተስፋን ሙጥኝ ብዬ ነው ዛሬን ያየሁት ። ያጋጠመኝን መውደቅ እና ሃዘን ህመም ችላ ብዬ ነው ያን በርሀ የተሻገርኩት !!

አጆኻ ዝወደይ ..
ሁሉም ሰው መስቀል አለው ልዩነቱ አይነቱ እና አሸካከሙ ነው !!"

By Adhanom Mitiku

@maninet1
@betsiroyal

ሌላ ሴት ልታገባ ያልክ ቀን እንኳ ብደውልልህ እሷን ትተህ እኔ ጋር ነው አይደል የምትመጣው? እለዋለሁ ሁሌ …. ፈገግ ብሎ ያየኝና “ደፋር ኮ ነሽ….ይለኛል።

ካለሁ ነገር ሁሉ እኔን አስበልጦ እንደሚወደኝ አውቃለሁ። ሲሳሳልኝ:ከራሱ ሲያስቀድመኝ: ሲጨነቅልኝ: ለኔ ሲኖር አይቻለሁ። ( በእርግጥ እንዲ ማለት ከባድ ይመስላል። እኔ ግን አይኑን ሳያርገበግብ : ይሄን ልጅ ግን ምን አስነክታው ነው እስኪባል የሚያውቁን ሁሉ እስኪገረሙ ድረስ ….ሳናድደዉ :ሳበሳጨው ችሎ በክፉ ቀናቶቼ ላይ ለደስታዬ ሲፈጋ: አብሮነታችንን ለማቆም ብዙ ሲለፋ አውቅ ነበር።)

ይመስለኛል የበዛ መውደዱ: የትም አይሄድም ብዬ እንዳስብ ለኛ እንዳልጨነቅና በተወዳጅነት ተኮፍሼ ለሚሰጠኝ መውደድና ክብር ትንሽ እንኳ አፀፌታን መስጠት የማልችል ሴት አደረገኝ።

ከዛ በአንዱ ቀን በትንሽ ነገር ተጋጨንና ….ሂድልኝ አልኩት። ለመነኝ:አስለመነኝ….ከቀልቤ መሆን ያልቻልኩት እኔ ግን ግድ አልሰጠኝምና ምንም እንደጎደለብኝ አልተሰማኝም። መሄዱ እንደሚያም: እንዴት እንደሚናፍቀኝ ለመረዳት ብዙ ረፈደብኝ።

ሄደ። ከዛ አልተመለሰም። ልመልሰዉ ሞከርኩ….መሄድ አለማምጄው ኖሮ መመለስ አቃተኝ።

እናማ አሁን የገፋሁት እኔ: ወዶኛል አይጠላኝም ያልኩት እኔ: በተራዬ እጅግ እየናፈቀኝ:እያመመኝ :እያስመሰልኩ አብሮነታችን ማክበር ያልቻልኩት እኔ … ሲያቅፈኝ ህይወት እንደሚቀለኝ: ችግሮቼን ችሎ ማሸነፍ ብቻን ያለማመደኝ እሱ እንደነበር:በጣም እንደሚናፍቀኝ :በጣም እንደማመሰግነው ያልነገርኩት እኔ የሄደበትን ቀን ሻማ እያበራሁ አከብራለሁ።

በስመአብ ጊዜው እንዴት ይሮጣል? አትመጣም በቃ?

By Ma Hi

@maninet1

ሲራክን አገባለው ብዬ ማልቀስ ከጀመርኩ ወዲያ እማዬም አባዬም ቤተሰቡም ጎረቤቱም  ሁሉ እኔን እንደ ሞኝ ነው የሚያዩኝ ። እማዬም ሞኝነቴን ከርዝመቴ ጋር እያገናኘች " ከኩዮቿ ስትረዝም ነውኮ ጉድ የመጣው ድሮም ረጅም ሰው ሞኝ ነው " ትላለች በርግጥ ሞኝ ምን ማለት እንደሆነም መጀመሪያ አካባቢ አላውቅም ነበር ቡሀላ የሆነቀን አክስቴ የኔን ካላገባው ወሬ ሰምታ
"አንቺ ሞኝ ጅላንፎ ጅል ሲራክኮ ቢወልድ ያደርስሻል በዛ ላይ እሱቴ ምን በወጣው ያቺን መልአክ መሳይ እጮኛውን ትቶ ሆሆሆሆ እኩያሽን ፈልጊ ምን ውርንጭላ ናት ይቺ" ብላኝ ነው ሞኝነት የጅልነት ተመሳሳይ ፍቺ መሆኑን የደረስኩበት ። አክስቴ ያን ቀን ስለ ሲራክ እጮኛ መልኣክ መምሰል ስትናገር መልአኮች ምን ይምሰሉ ምን ሳላውቅ እርግፍ አረገው ነው የደበሩኝ (ይቅርታ እንግዲ እግዚአብሔር ምን ላርግ በሲራክ መጡብኛ) ሴጣንንም ብትመስልኮ ያቺ ሚያገባት ሴትዮ ሴጣንን እጠላ ነበር ማን መልኣክ ምሰይ አላት  ብቻ ሲራክ መልአክ ምትመስል እጮኛ አለችው ። ግን እጮኛ ምንድን ነው ሚያረግለት? እጮኛ ማለት ሚገባ ሰው መሆኑን ከአክስቴ አወራር ገብቶኛል ሲራክ ግን እጮኛ ሲያስጠላበት !!
የዛን እለት እንባዬን እያዘራው ሄድኩ እነ ሲራክ ቤት ቀጥ ብዬ ቤታቸው ስገባ የሲራክ እናት ዳንቴላቸውን እየሰሩ አገኘዋቸው ሳግ በተናነቀው ድምፄ 
"እማማ ሲራክስ" እንባዬ በጉንጮቼ ያለማቋረጥ ይወርዳል።
" እንዴ በሞትኩት እመብርሀን ድረሽ ምንድን ነው ሚጡሻ ምን ሆነሽ ነው ምታለቅሽው ሲራክ ምን አርጎሽ ነው ልጄ" አሉኝ ዳንቴላቸውን ጥለው ወደኔ እየመጡ ።
"ሲራክ ሌላ ሚያገባት እጮጬኛም አለችው ደሞ ደሞ መልኣክ ነው የምትመስለው ብላኛለች አክስቴ ደሞ ሲራክ እኔን አያገባኝማ " ብዬ ለቅሶዬን አቀለጥኩት
" ምን ጉድ ነው ዘንድሮ ኧረ ተይ ሚጡ ተይ (ለኔ)
ምነው አፌን ቢቆርጠው እንደው ለሲራኬ ነው ምድርሽ ያልኳት ቀን (ለራሳቸው)" እንባዬን እና ንፍጤን በለበሱት ነጠላ እየጠረጉ
ሲራክን እንደማገባ እንጂ ማን አንደዛ ብሎ እንደነገረኝ ረስቼው ነበር አሁን እሳቸው እንዳሉኝ ራሳቸው አስታወሱኝ ። አዎ እሳቸው ናቸው እነሱ ደጃፍ ላይ ባልና ሚስት እቃቃ እየተጫወትን እኔና ስምረት እኔ ነኝ ሚስት ምሆነው ተባብለን ስንጣላ  የገላገሉ መስሏቸው እኔን ረጅምም ስለሆንኩ ባል ከሚሆነው ከሄኖክ ጋር ስለማልመጣጠን ለዛሬ እኔ ሚዜ እንድሆን ሲነግሩኝ " እኽ እና ሁሉም ሚጫወቱት ወንዶችኮ አጭር ናቸው መቼም ላላገባ ነው እንዴ " ብዬ ለንቦጬን ስጥል(እማዬ ናት ሳኮርፍ ለንቦጭሽን አትጣዪ ምትለውእንደውነታው ከሆነ ግን ምንም አልጣልኩምኮ ሲጀመር ለንቦጭ ሚባልም እቃ የለኝም ) ብቻ እሱን ነገር ስጥል ራሳቸው ናቸው በቃ አንቺ ሲራክን  ታገቢያለሽ ብለው የነገሩኝ ። ይኸው አሁንም አክስቴ ያለችው ውሸት መሆኑን እንዲያረጋግጡልኝ  ጎናቸው አለቅሳለው
" ደሞ ደሞ እኔ ሚካኤን አልመስልማ እማማ "በእንባ በታመቁ አይኖቼ እያየዋቸው መልሳቸውን እጠብቃለው ከማውቃቸው መልኣክት ሚካኤልን ለምን እንደመረጥኩ ግን እንጃ
"ማለት ሚካኤልን ደሞ እዚ ምን አመጣው"
"ሲራክ ሚፈልገው መልኣክ ማግባት አይደል" መሀል መሀል ላይ ሳግ እያቋረጠኝ
" ቅዱስ ሚካኤል ድረስ  ምን ስትይ አመጣሽው አንቺ ልጄን ልታስቀፅፊ ነው እንዲ ምትይ አበስኩ ገበርኩት እንደው እመብርሀን ይቅር ትበልሽ ሆሆ  "
"ታዲያ እጫጩ ኛውስ "
ሳያስቡት ሳቃቸው እያመለጣቸው " እጮኛ ማለት እንኳን ማትችዪ ድንቢጥ እንደው ምን ብለሽ ነው ይሄን ሲራክን ምታገቢው በይ "
" ችግር የለውምኮ እማማ እስኪያገባኝ እለማመዳለው " ለቅሶዬን አቁሜ
" ሚጣሹ እንግዲያውስ እረፊው ሲራክ አያገባሽም !!"
"ለምን?" እየተኮሳተርኩ
"ማግባት ምን እንደሆነ ግን ታውቂያለሽ " አይኖቼን እያዩ
ደነገጥኩ ግን ምንድን ነው መጋባት ወዲያው አይምሮዬ ላይ የመጡት ጓደኞቼ የቃቃ ባልና ሚስቱ ነበሩ ቀልጠፍ ብዬ
"እንደ ሄኖክና ስምረት መሆን ነዋ"
"እኮ በቃ ሲራክ ደሞ ካንቺጋ እንደዛ አይሆንም"
"ኧህ እኮ ለምን ?"
" አንቺ ሄኖክን ያላገባሽው ከሱ ስለምትረዝሚ አይደል ሚጢሹ ሲራክም ቁመት ስለምበልጣት አላገባትም ብሏል እንግዲ እረፊው " አሳመኑኝ እውነታቸው ትንሿ ጭንቅላቴ ውስጥ ነብስ ዘራች
"እንጂ መልኣክ ስላለው አደለማ ?" የመላእክ መምሰሉ ጉዳይ እየከነከነኝ
" ኧረ እቴ ረዥም እኩያውን ሊያገባ ፈልጎ ነው አንቺም የቁመት እኩያ ስታገኚ ታገቢያለሽ እሺ ሚጢሹ" አመንኩበት ።
በቃ እንደውም ሲራክን አላገባም!

by kalkidan solomon

@maninet1

#መቄዶንያ

" ሰውን ለመርዳት ሰው መሆን በቂ ነው !! "

መቄዶንያ የአረጋዊያንና የአእምሮ ህሙማን መርጃ ማዕከል በሚያስገነባው ሆስፒታል ጭምር ያለው ህንፃ ለማጠናቀቅ የገንዘብ እጥረት ስለገጠመው እግዛ እንዲደረግ ለመላው ኢትዮጵያውያን ጥሪ መቅረቡ ይታወሳል።

ዛሬ “ በሰይፉ ኢቢኤስ የዩቱብ ቻነል ” ድጋፍ ማድረጊያ መርሀ ግብር እየተካሄደ ነው።

ደጋጎች ሁሉ ድጋፍ እንድታደርጉ ጥሪ እናቀርባለን።

የድጋፍ ማድረጊያ አማራጮች ከላይ ተያይዘዋል።

መቄዶንያ “ ህንፃው ለማጠናቀቅ ገንዘብ ተቸግረናል። ለማጠናቀቅ ወደ 5 ቢሊዮን ብር ያስፈልገናል ” ማለቱ አይዘነጋም።

በቀጥታ ይከታተሉ 👇
https://www.youtube.com/live/q0bMjwt9PvM?feature=shared

@maninet1