سكروا الفيس والأنستا ♥️

بكفي توتر.. نحن بفترة حساسة جداً
وكلنا بحاجة ماسّة نتوازن ونستقر نفسياً حتى نأنجز ونقدر نقدم كل شي منقدر عليه..

بعدوا عن كل مصادر الإزعاج والإشاعات.

• في كلام خطر عبالي احكيه اسمي قاعدة وآخدة اليوم بريك..

• تعملوا شاي وتسمعوا فويسات؟
ولا بكتب كتابة؟

• الموضوع اللي حابة اسرد عنه هلأ.. بتخيل كتير بنات ممكن تحس بمسها وبحاجة تسمع عنوو لأن بشوفو أنا إنه هو فعلاً مشكلة..

شايفين لما تقرروا تلتزموا؟

تغيروا لبسكم، تلتزموا بالصلاة، ما في مكياج عالطريق، تسمعوا دروس لشيوخ ودعاة وتوقفوا الأغاني؟

وحتى لما البنات تقرر تحط الحجاب وتضل مترددة؟ أو لما بدها تغير رفقاتها لأنهم غير مناسبين؟

هالقصص بالذات كتير ما بتكمل لأن المحيط اللي حوالينا ممكن يكون سيء بالأصل فما نقدر نكفي بهالطريق أو ناخد الخطوة هي.. لأن منخاف نسمع كلمة مو ظريفة

• وهالطريق لما بدنا نمشي فيه لازم يكون في ببالنا جملة مترسخة:

(لا طاعة لمخلوق في معصية الخالق)

شهد أختي كان إلها الفضل بعد رب العالمين إني اتغير..

كنت قبل شغل الأغاني كل الوقت عالبفلة، فبوقتها تكون جازمة وحادة إنو أغاني عالبفلة لا تشغلي ما بدنا نسمع.. اسمعي لحالك إذا بدك

فصرت فعلاً ما شغل كرمال ما اتخانق معها، واسمع لحالي بالسماعات..

لاقيها عم تشغل قرآن أغلب الوقت،
فبلش البيت يتعود عالقرآن الحمد لله والأغاني بطلت تتشغل لا بسماعات ولا عالبفلة..

خلص أنا تلقائيا حوّلت عالأناشيد
ومن وقتها الحمد لله ما عاد سمعت

كتير قصص كانت تاخد قرار حازم فيهم، إنو لاء.. هي الشغلة لاء وحرام

وفعلاً ما ترضى تغير رأيها بولا شكل، وطبعا هي نعمة من رب العالمين إنه الواحد ما يميل لما يكون قدام خيار حلال وحرام..

ومن وقتها خلص أنا حسيت صار عندي القوة إني ما اتنازل عن شي إلا ليكون هالشي بيرضي الله ولو الكل كانت شايفتو صح بمقياس الدنيا..

تاني شغلة، يكون قلبك رادار بيلقط كل شي خير وين ما شافه وفوراً بثبته بقلبك..

ياما منمر بمواقف وإشارات من رب العالمين إنه يا فلان صار وقت تتغير، بس نحن منطنش ومنقول لسا ما اجا وقت الهداية!

بدي نبطل نخاف نقول لاء لما يكون حرام، ما في شي اسمو بخجل لما اتعرض لموقف ما بيرضي رب العالمين..

(اللاء) لازم تطلع بكل قوة وحزم بدون ما خلي شيطاني ونفسي الأمارة بالسوء تقول خلينا نفكر

ونصيحة يا بنات نصيحة:
(إذا هبت رياحك فاغتنمها)


لما رب العالمين ييسرلك خير بمكان ما، ييسرلك شي بيرضيه وبيرفع مكانتك بالآخرة، لا تتواني عن قَول (أي) وتبادري تعمليه..

لمجرد تجيكِ خاطِرة لعمل خير، فوراً اركضي ونفذي هالخاطرة قبل ما تروح..

ما تتركي مجال للقصة تاخد وقت، لأن رح تروح وتبرد همتك ونفسك تاخد قرار إنه لبعدين 💘

• ولزيدكم من الشعر بيت..

وقت وحدة قريبة مني التزمت وغيرت لباسها وصار مستّر ومحتشم..

قالتلي والله يا مايا تغيرت معاملة الأشخاص معي (مع إنو قبل كان لبسها مو فاحش )..

قالتلي.. أبسط مثال بالمكرو صار الشب وقت بدو ياخد مني المصاري يكون حريص ما يلمس إيدي.. وغيره من المواقف كمان.

فيعني اللباس بعبر عن انتمائك للدين وبيرسم حد بعقل اي حدا بدو يتعامل معك، وبصير في حساب قبل أي تصرف من غيرك.

على عكس البنات اللي مفكرين الحجاب بس غطا عالراس ومياعة، وريلات مليانة أمور ما بتنحكى.

🌸 وأخيرًا.. هاد الوقت المناسب لتبلشي تتغيري للأفضل.

• لا تترددي هي أول نصيحة، واستعيني بالله لأنو لولا توفيقه إلنا ما منقدر نكمل بشي.

• تاني نصيحة، بعدي عن محيطك اللي كل ما تعملي شي منيح بقلك شيخة، وبضل يتمسخر.. وإذا ما قدرتِ تبعدي شوفي النصيحة التالتة واحفظيها بقلبك.

• لا طاعة لمخلوق في معصية الخالق.

• لا تنطري نتيجة أي عمل بتساويه، واتذكري إنه العقبات بالبداية صعبة وتقيلة بس هي كلها اختبارات وغايتنا بتستحق نصبر.

• اتذكري الغاية الكبرى اللي هي: (الجنة) واللي كرمالها بهون كل شي 🩷.

• قوّي علاقتك بالصديقات الصالحات، رح يعينوكِ كتير لتمشي بهالطريق.

• إذا ما في التزام بأسرتك، اصبري بالبدايات رح تكون صعبة عليكِ، بس اتذكري إنو رب العالمين بس يلمس منك صدق نيتك ما رح يخيبك.

• ضل شغلاية لازم لازم احكيها، مع إنو ما كنت بدي احكيها بس غيرت رأيي..

قبل ما غير لبسي.. بقيت ٣ شهور كاملة عم فكر معقول بدي اترك كل تيابي خلص واثبت على نمط معين كل حياتي؟

بعد ما أخدت قراري بفضل الله وإنو خلص يا بنت هاد الصح، صدقاً قلت يا ريت ما طولت كل هالوقت.. وكنت بقمة سعادتي إنو رب العالمين يسّر الخير.


اتذكري شغلة..
ما شرط يكون عندك مية قطعة تلبسيها، وما حدا دخله بلبسك إذا انعاد ألف مرة..

المهم أنتِ محتشمة وعم ترضي ربك وملتزمة بدينك صح 💕

واللباس الشرعي لا يعني إنه نلبس مانطو وبس.. وكأنه هو الخيار الوحيد.

بتقدري تلبسي شي طويل محتشم، فضفاض، غير ملفت للنظر.. وأنيق! ✨

يعني قصة التنورة اللي تحتها جرابات شفافة هاد مو حجاب، واللفات اللي بتظهر جمال البنت ما ظابطة..

والمناطي اللي بتجي ضيقة جداً هي ما دخلها بلباس الأنثى المحجبة، وغيره من القصص اللي عم تدرج هلأ..

وكتير من التياب اللي عم تظهر جمال الأنثى بدال ما تسترها، عم تنزل باسم الألبسة المحتشمة وهي ما دخلها فيه.


بالنهاية، بدي قلك أي خطوة بطريق الخير رح تجلبلك سعادات لا متنهاية وتنقلك شوي شوي لدرب مليان ورد والحكي هاد مو من الأحلام.. عم احكي عن محبة خالِصة كالعادة 🩷.

_
نُذكّر بالمُقاطعة من جديد 🫡♥️

• رح أنصحكم بمتابعة أفضل صانع محتوى من اليمن،
لا أملّ من المحتوى الذي يُقدمه..

- فداءالدين يحيى:

https://www.facebook.com/fedaaadeen?mibextid=ZbWKwL

• الدرس الثاني: تلقي القرآن على منهاج النبوة ✨.

ولِمن أراد حضورها على يوتيوب،
اضغط (هُـنا)

لمن يريد رابط الكتاب.. (هُـنا)

ضع/ي "تم" في التعليقات
عند الانتهاء من سماع الدرس ✅.

#ميراث_النبوة.
#أحمد_السيد.

@MayaDreamer.