#Tigray

የኢትዮጵያ መንግስት ለሰብዓዊነት ሲባል ግጭት ለማቆመ መወሰኑ ይታወቃል።

ከመንግስት ውሳኔ በኃላም ከትግራይ ክልል በኩል በጎ ምላሽ መኖሩ ለበርካታ ወራት አስከፊ ሁኔታ ውስጥ ለሚገኙ ዜጎች እና ከክልሉ ውጭ ላሉ ቤተሰቦች በጎ ተስፋን ያጫረ እንደሆነ ይታመናል።

ነገር ግን ከዚህ በፊት የመከላከያ ኃይል ባለበት ፀንቶ ይቆያል ከሚለው ውሳኔ በምን ይለያል የሚል ጥያቄ የሚነሳ ሲሆን የመንግስት ኮሚኒኬሽን ሚኒስትር ዶ/ር ለገሰ ቱሉ ከቀናት በፊት ለቪኦኤ በሰጡት ቃል፦

" የመጀመሪያው ወደ ትግራይ አካባቢ አልገባም አለ እንጂ የተለያዩ ትንኮሳዎች ካሉ አፀፋ አልመልስም አላለም።

የተለያዩ አካባቢዎች ላይ አደጋዎች ሊኖሩ ይችላሉ ብሎ በሰጋ በየትኛውም ጊዜ እርምጃ ከመውሰድ የሚያግድ ነገር አልነበረም።

የአሁኑ ግን ለበረራዎች ደህንነት ሲባል፣ የህወሓት ሚሊሻም በተለያየ መልክ ስጋት ውስጥ ገብቶ መንገዱን እንዳይዘጋው የትኛውም አይነት ግጭት ከማድረግ እቆጠባለሁ ነው ያለው " ሲሉ አስረድተዋል።

ከውሳኔው በኃላ እርዳታ አቅርቦት እንዲሻሻል የሚደረግ ጥረት በተመለከተ ዶ/ር ለገሰ፥

"...በሳምንት እስከ3 ጊዜ ይካሄድ የነበረ በረራ አሁን መጠኑን የመጨመር አንዱ ነው።

ሌላው ከእርዳታ ሰጪ ድርጅቶች የገንዘብ ፍሰት ጋር የተያያዘ የታገዱ ነበሩ እነሱ በተወሰነ ደረጃ የመጨመር እንቅስቃሴ ነው። ገደቦች ነበሩ ገደቦቹን የማሻሻል ስራ ይሰራል " ብለዋል።

ሌላው ፥ መንግስት ለሰብዓዊ እርዳታው መቀላጠፍ የህወሓት ኃይሎች በጉልበት ከያዛቸው አካባቢዎች ለቀው እንደሚወጡና ዋናውን የ " አብዓላ ኮሪደር " መስመርን እንዲከፍቱ ጠይቋል፤ ከያዙት ቦታ ባይለቁ ለሚለው ጥያቄ ዶ/ር ለገሰ " እሱን በሂደት ብናየው ይሻላል ከአሁኑ መገመት ተገቢ አይሆንም " የሚል ምላሽ ሰጥተዋል።