tgoop.com/mlk_MokshonjErekshisj/61
Last Update:
🫂 Мокшетне – тя ушетксстонь калксь, башка аф путф ломатнень класс! Минь башка ломаттама, эсь кяленьконь, культураньконь, пингелувсконьконь эди коеньконь мархта. Мокшетне аф лувсазь пряснон "мордвань" афток лия калконь субъэтносокс, лувсаськ "мордва" валть сюцемакс, конань повфтазь лангозонк.
🕰 2001-це кизоста сявомок миндеенк аш кода тиендемс эсень ломаньтъналонь полгат, 2018-це кизоста сявомок тонафтома вастатнень эса калконь республикань кирдимасторонь кяльхне арасть аф кошардоманькс тонафнеманди. Марстоптф кирдимасторонь варжамать тонафтома вастаста туйхненди ули кода маскомс аньцек рузонь кяльса. Тяда башка, теенк аф мярьгови нолдамс тевс латинань азбукать тядянь-алянь кяльсонк, Москусь мярьги тяштемс аньцек кириллицаса.
🇷🇺 Рузмасторонь паспортсь мярьги сембонди: тон – рузонь ломанят, тон – Сталинонь, Михалковонь, Суриковонь, Аксаковонь, Глинкань, Пушкинонь, Ломоносовонь эди лиятнень оцю юромснон эса поладыят. Аф ваномок, кият тон, афкуксонь рузт, Чуважень афток Сахань тякавастонь эряйхне, Таджыкистанонь эли Узбэкистанонь мигрантат афток мокшет, тон – рузт! (А сявок тинь няйсазь мить кода рдазу, шава эди "вирень-велень" ломанькс).
👮🏻♀️ Лятфатсть эсь прянтень, теентьке вдь мярьгихть рузонь ломанькс паспортонь коряс. А сяка рузонь ломаттне лангозонк лиякс ваныхть, кой-коста каболшись мархта, тяда васькафне, васьфнеде... Кати-мзярда Мокшень мастор ульсь кирдемасторкс (Moxel Principatus), мзярс ашезь пачкотькшне васенце Ордась (монголонь ушмось), а Моску меле.
📜 Мокшетнень инголе ащихть стака прябалат: шовордамань кеме политика, ломаттнень кирьфтамасна, республикань эди федералонь кoшардомвийхнень аф шарфты мяль минь эсь видьгеньконь лангс. Тяфтама прябалатне аф машфтовихть активисттненди ськамост. Оцю масторса мокшень калкть сяда тов касоманцты кржа ванфтомс калконь койхнень аньцек тъналса; ёрат эрямс – эста аш кода ащемс фкя вастса.
🫵🏻 Мокшетненди эряви марстомомс, или XXI-це сядокизось ули мекольцекс ломаньтъналоньконь пингелувксонза. Кивок аф тисы тейнек мастороньконь, кда минь минць аф тисаськ. Кивок миньфтемонк аф тисы воляшинь ломаньтъналть, кда минь минць аш мяленьке арамс ломаньтъналкс.
🔰 Мокшень Калконь Комитетть инь оцю вешфксоц – мокшень ломаттнень калконь, политикань, экономикань, культурань эсь видьгеснон ваномасна эди тевс нолдамасна. Тяфта же ётксост, эсь эряма вастсост ломаньтъналонь эди кирдимасторонь сембоньгирдинь лангс эсь видьгесь. Кда пингелукссь нинге мезендивок тонафты, сон тонафты аф сёлгондомс сельмотнень, мзярда шавихть мала ломаттнень эса, аф мишендемс эсь прятанаднень эди питнетнень.
#мокша #МокшеньМастор #мокшет
©️Мокшень Ломаньтналонь Комитетсь
BY Мокшень Ломаньтналонь Комитетсь
Share with your friend now:
tgoop.com/mlk_MokshonjErekshisj/61